افغانستان میں عید، کابل سمیت ممختلف شہروں میں سیکیورٹی کے سخت انتظامات

افغانستان میں آج عیدالفطر مذہبی جوش و خروش کے ساتھ منائی جا رہی ہے، جہاں ملک بھر میں نماز عید کے بڑے اجتماعات جاری ہیں۔ شہریوں کی بڑی تعداد مساجد اور عیدگاہوں میں شریک ہو کر اللہ تعالیٰ کا شکر ادا کر رہی ہے۔
افغان سپریم کورٹ کی جانب سے مختلف صوبوں میں شوال کا چاند نظر آنے کے اعلان کے بعد عیدالفطر آج بروز جمعرات منائی جا رہی ہے۔ طالبان حکومت کے ترجمان ذبیح اللہ مجاہد کے مطابق فرح، ہلمند اور غور سمیت کئی علاقوں میں چاند دیکھے جانے کی تصدیق کی گئی تھی۔
دارالحکومت کابل سمیت مختلف شہروں میں سیکیورٹی کے سخت انتظامات کیے گئے ہیں تاکہ شہری پرامن ماحول میں عید کی خوشیاں منا سکیں۔ عید کے موقع پر طالبان حکومت نے 4 ہزار 596 قیدیوں کو رہا کرنے اور 4 ہزار 407 قیدیوں کی سزاؤں میں کمی کا اعلان بھی کیا ہے، جسے عوامی سطح پر خوش آئند اقدام قرار دیا جا رہا ہے۔
افغان حکام نے عوام سے اپیل کی ہے کہ عید کی تقریبات کے دوران نظم و ضبط برقرار رکھا جائے اور سرکاری ہدایات پر عمل کیا جائے۔