راولپنڈی میں کھیلے گئے میچ میں پاکستان نے آسٹریلیا کے خلاف ٹاس جیت کر پہلے فیلڈنگ کا فیصلہ کیا۔
پاکستان کے خلاف آسٹریلیا کی پوری ٹیم 45 ویں اوور میں 200 رنز پر آؤٹ ہوگئی۔
آسٹریلیا کی جانب سے میھتیو رن شا نے61، میتھیو شارٹ نے55 رنز بنائے۔میتھیو کوہنمین نے 24 رنز کی اننگز کھیلی۔
پاکستان کی جانب سے ڈیبیو کرنے والے عرفات منہاس نے 32 رنز کے عوض 5 وکٹیں حاصل کیں۔ ان کے علاوہ ابرار احمد نے 2 جب کہ کپتان شاہین آفریدی، سلمان آغا اور حارث رؤف نے ایک ایک وکٹ حاصل کی۔
پاکستان نے 201 رنز کا ہدف 43 ویں اوور میں 5 وکٹ کے نقصان پر حاصل کرلیا۔
پاکستان کی جانب سے بابر اعظم 69 اور غازی غوری 65 رنز بنا کر نمایاں رہے۔ ان کے علاوہ صاحبزادہ فرحان نے 28 اور عرفات منہاس نے 18 رنز بنائے۔
پاکستان کو تین میچوں کی سیریز میں ایک صفر کی برتری حاصل ہوگئی ہے۔ سیریز کا دوسرا ون ڈے دو جون کو لاہور میں کھیلا جائےگا۔
خیال رہےکہ پاکستان ٹیم نے آج ون ڈے کرکٹ میں ایک نئی تاریخ رقم کی ہے، پاکستان ایک ہزار ون ڈے میچز کھیلنے والی دنیا کی تیسری ٹیم بن گئی ہے۔ اس سے قبل آسٹریلیا اور بھارت ایک ہزار ون ڈے میچز مکمل کرچکے ہیں۔

انڈر 18 ایشیا کپ میں پاکستان کا فاتحانہ آغاز

جاپان کے شہر کاکامیگاہارا میں کھیلے جانے والے ایونٹ میں پاکستان نے اپنے پہلے میچ میں چین کو 0-3 سے شکست دے دی۔
پاکستان کی جانب سے پہلا گول پہلے ہاف کے چھٹے منٹ میں عثمان نے، دوسرا گول 11ویں منٹ میں عدیل نے جبکہ تیسرا گول 56ویں منٹ میں یاسین نے اسکور کیا۔
پاکستان اپنا دوسرا میچ ملائیشیا کے خلاف 31 مئی کو جبکہ تیسرا میچ بنگلادیش کے خلاف 3 جون کو کھیلے گا۔
دونوں میچز دوپہر 3 بجے کھیلے جائیں گے۔
ایشین ہاکی فیڈریشن کے زیر اہتمام انڈر 18 ایشیا کپ 29 مئی سے 6 جون تک جاری رہے گا۔

پاکستانی کرکٹ شائقین کے لیے بڑی خوشخبری، تاریخ ساز لمحہ قریب

پاکستان اور آسٹریلیا کے درمیان تین میچز پر مشتمل ون ڈے سیریز کا آغاز آج راولپنڈی سے ہوگا، سیریز کا پہلا ون ڈے آج شام ساڑھے 4 بجے راولپنڈی کرکٹ اسٹیڈیم میں کھیلا جائے گا۔ پاکستان کی قیادت شاہین شاہ آفریدی جبکہ آسٹریلیا کی قیادت جوش انگلس کریں گے۔
پاکستان ون ڈے کرکٹ میں آج ایک نئی تاریخ رقم کرے گا، پاکستان ایک ہزار ون ڈے میچز کھیلنے والی دنیا کی تیسری ٹیم بن جائے گا۔
اس سے قبل آسٹریلیا اور بھارت ایک ہزار ون ڈے میچز مکمل کرچکے ہیں۔
اگر دونوں ٹیموں کے درمیان کھیلے گئے ریکارڈ پر نظر ڈالیں تو دونوں ٹیموں کے درمیان اب تک 111 ون ڈے انٹرنیشنل میچز کھیلے جاچکے ہیں، مجموعی طور پر پاکستان نے 36 ون ڈے میچز جبکہ آسٹریلیا نے 71 ون ڈےمیچز میں کامیابی حاصل کی۔
راولپنڈی کرکٹ اسٹیڈیم نے اس سے قبل 1994 میں پاکستان اور آسٹریلیا کے درمیان ون ڈے میچ کی میزبانی کی تھی، پاکستان راولپنڈی کرکٹ اسٹیڈیم میں اپنے گزشتہ پانچ ون ڈے میچز میں ناقابلِ شکست رہا ہے۔

بھارتی فاسٹ بولر بمراہ کے نام ایک اور ناپسندیدہ اعزاز

بھارت کے معروف فاسٹ بولر جسپریت بمراہ کے لیے آئی پی ایل 2026 کا سیزن کافی مشکل ثابت ہوا ہے، جہاں انہوں نے ایک ایسا ریکارڈ اپنے نام کرلیا جو کسی بھی بولر کے لیے پسندیدہ نہیں مانا جاتا۔
آئی پی ایل 2026 کے سیزن میں ان کی کارکردگی توقعات کے برعکس رہی اور وہ مسلسل مشکلات کا شکار نظر آئے۔
وہ ٹورنامنٹ کی تاریخ میں کم از کم 40 اوورز کرانے والے بولرز کی فہرست میں شامل ہیں، لیکن اس بار انہیں ہروکٹ کے لیے 100 سے زیادہ رنز دینے پڑے۔
اس پورے ٹورنامنٹ میں ممبئی انڈینز کی نمائندگی کرتے ہوئے جسپریت بمراہ نے 13 میچ کھیلے اور ان میچوں کے دوران انہوں نے مخالف ٹیموں کے خلاف 294 رنز دیے، جبکہ ان کے رنز دینے کی اوسط رفتار بھی پچھلے سالوں کے مقابلے میں کچھ زیادہ رہی۔
ان 13 میچوں میں وہ مجموعی طور پر صرف 4 کھلاڑیوں کو آؤٹ کرنے میں کامیاب ہو سکے اور کسی بھی ایک میچ میں وہ ایک سے زیادہ وکٹ حاصل نہیں کر پائے۔ وکٹیں نہ ملنے کی اس کم رفتاری کی وجہ سے ان کی بولنگ کی اوسط اور اوورز کی کارکردگی کا گراف تکنیکی بنیادوں پر کافی منفرد سطح پر چلا گیا ہے۔
کھیل کے ماہرین کے مطابق اس خراب ریکارڈ کے پیچھے ایک خاص وجہ یہ بھی رہی کہ ممبئی انڈینز کے دوسرے بولرز نے میچوں میں کافی زیادہ رنز دیے، جس کی وجہ سے مخالف ٹیم کے بلے بازوں نے جسپریت بمراہ کے خلاف کوئی بڑا خطرہ مول لینے کے بجائے بہت احتیاط سے کھیلنے کی حکمت عملی اپنائی۔
بلے بازوں نے ان کے اوورز میں رنز بنانے کی زیادہ کوشش نہیں کی بلکہ صرف اپنا دفاع کیا، جس کی وجہ سے بمراہ کو وکٹیں حاصل کرنے کے مواقع نہیں مل سکے۔ اگرچہ ان کے نام یہ غیر معمولی ریکارڈ درج ہوا ہے، لیکن اس کے باوجود وہ بیشتر میچوں میں رنز کی رفتار کو روکنے اور بلے بازوں کو دباؤ میں رکھنے میں کامیاب رہے۔

پشاور سے اسکردو تک تاریخی دوڑ، نوجوان ایتھلیٹ کی عالمی سطح پر کامیابی

پشاور سے اسکردو 800 کلومیٹر نان اسٹاپ دوڑ لگا کر نوجوان ایتھلیٹ مسعود خان نے عالمی ریکارڈ اپنے نام کر لیا۔
مسعود خان نے پشاور سے اسکردو تک کا طویل اور دشوار گزار راستہ بغیر رکے کامیابی سے طے کرکے یہ غیر معمولی چیلنج مکمل کیا۔ نوجوان نے قراقرم ہائی وے کے دشوار گزار پہاڑی راستوں، دریائے سندھ کے دلکش مناظر اور گلگت بلتستان کی وادیوں کو عبور کیا۔
مسعود خان نے پاکستان میں روس، جاپان اور چین سمیت متعدد ممالک کے ایتھلیٹس کے ساتھ مقابلہ کر کے بے شمار تمغے اپنے نام کیے۔ نوجوان ایتھلیٹ مسعود خان کا کہنا تھا کہ آج پاکستان کا نام دنیا بھر میں روشن کیا، پشاور سے اسکردو تک طویل دوڑ ایک انوکھا اور اپنی نوعیت کا پہلا کارنامہ ہے۔ انتہائی مشکلات کے باوجود 810 کلومیٹر کا یہ عالمی ریکارڈ صرف 9 دن میں مکمل کیا۔
نوجوان ایتھلیٹ مسعود خان نے کہا کہ مسلسل دوڑ کی وجہ سے قدم ڈگمگائے، لیکن پاکستان اور اپنی قوم کی خاطر کبھی ہمت نہیں ہاری، آج 800 کلومیٹر کا ہدف پورا ہونا میرے اور پورے ملک کے لیے باعثِ فخر ہے۔
یہ کارنامہ پاکستان کے نوجوان کھلاڑیوں کی صلاحیتوں اور عالمی سطح پر ملک کے مثبت تشخص کو اجاگر کرنے میں ایک اہم پیش رفت سمجھا جا رہا ہے۔

سابق پاکستانی کرکٹر محمد عامر آئی پی ایل میں کھیلنے کے اہل بن گئے

پاکستانی فاسٹ بولر محمد عامر برطانوی شہری بن گئے، برٹش حکومت کی جانب سے انہیں پاسپورٹ جاری کردیا گیا۔تفصیلات کے مطابق محمد عامر نے چند برس قبل پاسپورٹ کے لیے اپلائی کیاتھا، تمام قانونی تقاضے اور مقررہ وقت مکمل ہونے کے بعد اب ان کو پاسپورٹ مل گیا ہے۔36 ٹیسٹ، 61 ون ڈے اور 62 ٹی ٹوئنٹی میچز میں پاکستان کی نمائندگی کرنے والے محمد عامر کی اہلیہ نرجس خان برطانوی شہری ہیں۔محمد عامر اب بطور برطانوی شہری آئی پی ایل میں بھی کھیلنے کے اہل بن گئے ہیں۔یاد رہے کہ محمد عامر نےگزشتہ سال انٹرنیشنل کرکٹ سے دوسری بار ریٹائرمنٹ کا اعلان کیا تھا۔

قومی ٹیم ایک بار پھر ناکام، بنگلادیش کے ہاتھوں کلین سوئپ

بنگلادیش نےسلہٹ ٹیسٹ میں رنز سے شکست دیکر پاکستان کو وائٹ واش کردیا۔
پاکستان اور بنگلا دیش کے درمیان سلہٹ کے مقام پر جاری دوسرے ٹیسٹ میچ کے آخری دن بنگلا دیش کو جیت کے لیے 3 وکٹیں درکار تھیں جبکہ پاکستان کو جیت کے لیے 121 رنز کی ضرورت تھی۔
ٹیسٹ میچ کے 5 ویں دن پاکستان ٹیم 437 رنز کے ہدف کے تعاقب 359 بنا کر آل آؤٹ ہوگئی اور اس طرح بنگلادیش نے قومی ٹیم کو 78 رنز سے شکست دی۔
بنگلا دیش ٹیسٹ ٹیم نے تاریخ رقم کرتے ہوئے پاکستان ٹیم کو دو ٹیسٹ میچوں کی سیریز میں کلین سوئپ کردیا۔
مہمان ٹیم پاکستان کو پہلے ٹیسٹ میں ڈھاکا کے مقام پر 104 رنز جبکہ دوسرے اور آخری ٹیسٹ میں سلہٹ میں 78 رنز سے شکست کا سامنا کرنا پڑا۔

کوہ پیمائی کی دنیا میں نیا ریکارڈ، نیپالی کوہ پیما کی 32ویں بار ایورسٹ فتح

نیپالی کوہ پیما کامی ریتا شیرپا نے یہ کارنامہ انجام دیتے ہوئے اپنا ہی ریکارڈ توڑ دیا ہے جو انہوں نے 2025 میں 31ویں بار ماؤنٹ ایورسٹ سر کرکے بنایا تھا۔
56 سالہ نیپالی شیرپا گائیڈ کامی ریتا کو ایورسٹ مین کے نام سے بھی پہچانا جاتا ہے۔ انہوں نے پہلی بار 1994 میں ماؤنٹ ایورسٹ پر چڑھائی کی تھی اور تب سے یہ سلسلہ چلا آ رہا ہے۔
کامی ریتا نے ناصرف خود چوٹی سر کی بلکہ انہوں نے ٹیم کے آخری رکن تک کی قیادت اور رہنمائی کی۔مہم کے منتظمین، سیون سمٹ ٹریکس نے 32ویں بار دنیا کی بلند ترین چوٹی سر کرنے پر انہیں مبارک باد بھی پیش کی۔
اس سے قبل پاکستان سے تعلق رکھنے والی کوہ پیما نائلہ کیانی نے نیپال میں واقع دنیا کی تیسری بلند ترین چوٹی کینچن جنگا کو سر کیا تھا، جس کی بلندی 8,650 میٹر ہے۔
پاکستانی کوہ پیما نائلہ کیانی یہ کارنامہ انجام دینے والی پہلی پاکستانی خاتون کوہ پیما بن گئیں،جنہوں نے آٹھ ہزار میٹر سے بلند بارہ چوٹیاں سر کرلی، وہ ماؤنٹ ایورسٹ، کے ٹو، ناگا پربت سمیت دیگر بلند ترین چوٹیاں بھی سر کرچکی ہیں۔
نائلہ کی یہ کامیابی نہ صرف پاکستانی خواتین کے لیے باعثِ فخر ہے بلکہ ملک کے کوہ پیمائی کے شعبے میں ایک نئی تاریخ بھی رقم کر رہی ہے۔

عالمی کپ میں نئی تاریخ؛ میسی اور رونالڈو کا انوکھا اعزاز

دنیا کے دو عظیم ترین فٹبالرز لیونل میسی اور کرسٹیانو رونالڈو ایک نیا ریکارڈ اور منفرد ریکارڈ اپنے نام کرنے کو تیار ہیں۔ رواں سال ہونے والا ورلڈکپ ممکنہ طور پر دونوں اسٹارز کے لیے کیریئر کا چھٹا اور ممکنہ طور پر آخری ورلڈکپ ہوگا۔
فٹبال کی دنیا میں گزشتہ دو دہائیوں سے حکمرانی کرنے والے پرتگال کے کرسٹیانو رونالڈو اور ارجنٹائن سے تعلق رکھنے والے لیونل میسی ایک مرتبہ پھر عالمی فٹبال کے میدان میں جلوہ گر ہونے کے لیے تیار ہیں، جہاں دونوں کھلاڑی 2026 کے فیفا ورلڈ کپ میں شرکت کر کے ایک نئی تاریخ قائم کر سکتے ہیں۔
اگر یہ دونوں کھلاڑی ورلڈ کپ کے میچز میں میدان میں اترتے ہیں تو یہ فٹبال کی تاریخ میں 6 مختلف ورلڈ کپ ایڈیشنز (2006، 2010، 2014، 2018، 2022 اور 2026) کھیلنے والے دنیا کے پہلے کھلاڑی بن جائیں گے۔ شائقینِ فٹبال اس ٹورنامنٹ کو ان دونوں کا ’دی لاسٹ ڈانس‘ قرار دے رہے ہیں کیوں کہ یہ ممکنہ طور پر ان کا آخری بین الاقوامی ورلڈ کپ ہوگا۔

فیفا ورلڈکپ 2026 کا آفیشل گانا “دائی دائی” جاری، آمدن کہاں خرچ ہوگی؟

فیفا ورلڈ کپ 2026 کا آفیشل گانا “دائی دائی” باضابطہ طور پر جاری کردیا گیا۔فیفا گلوبل سٹیزن ایجوکیشن فنڈ کی سپورٹ میں جاری فیفا کا سونگ “دائی دائی” معروف گلوکارہ شکیرا اور برنا بوائے نے ترتیب دیا ہے۔فیفا کے مطابق گانے کی آمدنی دنیا بھر کے بچوں کی تعلیم پر خرچ کی جائے گی، شکیرا اس گانے سے اپنی رائلٹی ایجوکیشن فنڈ میں عطیہ کریں گی جبکہ میوزک پروڈکشن کمپنی ابتدائی ڈھائی لاکھ ڈالر عطیہ کرے گی۔فیفا کا کہنا ہے کہ ورلڈ کپ 2026 فائنل میں پہلی بار ہاف ٹائم شو بھی ہوگا جس میں گلوکارہ شکیرا بھی شریک ہوں گی۔دوسری جانب “دائی دائی” تمام بڑے اسٹریمنگ پلیٹ فارمز پر دستیاب کردیا گیا ہے، فیفا ورلڈ کپ 2026 البم کے مزید گانے آئندہ ہفتوں میں جاری ہوں گے۔