30 Jun
Pakistan

سٹی میئر سسٹم ختم؟ خیبرپختونخوا میں نیا بلدیاتی نظام زیرغور

ویب ڈیسک: خیبرپختونخوا حکومت نے مجوزہ طور پر نیا بلدیاتی نظام کا مسودہ تفصیلی جائزہ لینے کے لیے خصوصی کابینہ کمیٹی کے سپرد کر دیا۔وزیراعلیٰ خیبرپختونخوا کی زیر صدارت کابینہ اجلاس میں محکمہ بلدیات نے آئندہ بلدیاتی نظام کا مسودہ پیش کیا، جس میں سٹی میئر کے عہدے کی جگہ دوبارہ ڈسٹرکٹ ناظم کے نظام کو بحال کرنے کی تجویز بھی دی گئی ہے۔اجلاس میں مسودے پر تفصیلی غور کے بعد وزیراعلیٰ نے بلدیاتی نظام میں موجود خامیوں کا جائزہ لینے، اصلاحات تجویز کرنے اور نئے نظام کو مزید مؤثر بنانے کے لیے خصوصی کابینہ کمیٹی تشکیل دے دی۔یہ کمیٹی اپنی سفارشات تیار کر کے حتمی منظوری کے لیے دوبارہ کابینہ کے سامنے پیش کرے گی۔ذرائع کا کہنا ہے کہ محکمہ بلدیات نے موجودہ ڈھانچے کے تحت سٹی کونسل، تحصیل کونسل اور ویلج کونسل سمیت نیبرہوڈ کونسل کو برقرار رکھنے کی تجویز دی ہے، اس کے ساتھ تحصیل اور ویلج کونسلوں کی حدود کو آبادی کے تناسب سے بڑھانے کی سفارش بھی مسودے میں شامل ہے۔

30 Jun
Pakistan

اڈیالہ جیل کے قیدیوں کے فرار کا معاملہ، ڈی ایس پی معطل،5 اہلکار گرفتار

راولپنڈی میں کہوٹہ عدالت سے پیشی کے بعد واپسی پر اڈیالہ جیل کے 14 قیدیوں کے جیل وین سے فرار ہونے کے معاملے میں اہم پیشرفت سامنے آئی ہے۔پولیس حکام کے مطابق ڈیوٹی پر مامور اڈیالہ جیل کے گارڈ انچارج سمیت 5 اہلکاروں کو حراست میں لے لیا گیا ہے جبکہ ان کے موبائل فونز بھی قبضے میں لے لیے گئے ہیں۔حکام کا کہنا ہے کہ واقعے کے بعد ایس پی ہیڈکوارٹر کو عہدے سے ہٹا کر لاہور رپورٹ کرنے کے احکامات جاری کر دیے گئے ہیں جبکہ ڈی ایس پی ہیڈکوارٹر امتیاز احمد کو فوری طور پر معطل کر دیا گیا ہے۔اس حوالے سے آئی جی پنجاب نے آر پی او راولپنڈی سے واقعے کی تفصیلی رپورٹ طلب کر لی ہے جبکہ فرار ہونے والے قیدیوں کی گرفتاری کے لیے آپریشن جاری ہے۔واضح رہے کہ گزشتہ شام کہوٹہ عدالت میں پیشی کےبعد 14 قیدی وین سے فرار ہوگئے تھے جن میں سے 4 قیدیوں کو دوبارہ گرفتار کرلیا گیا تھا

30 Jun
World

وینزویلا کے ہلاکت خیز زلزلے میں مرنے والوں کی تعداد 10 ہزار ہونے کا خدشہ

وینزویلا میں گزشتہ ہفتے آنے والے 7.2 اور 7.5 شدت کے زلزلوں سے ہلاکتوں کی تعداد 10 ہزار ہونے کا خدشہ ہے۔
اقوام متحدہ حکام کے مطابق 10 ہزار لاشوں کے لیے بیگز حاصل کیے جا رہے ہیں، امریکی جیولوجیکل سروے نے بھی اموات کی تعداد 10 ہزار سے ایک لاکھ کے درمیان تک ہونے کا خدشہ ظاہر کیا ہے۔
مقامی حکام کے مطابق فی الحال ہلاکتوں کی تعداد 1719 ہوگئی ہے جب کہ 5 ہزار 34 زخمی اور 15 ہزار 866 افراد بےگھر ہوگئے، تباہ کن زلزلے کے نتیجے میں ڈھائی ہزار عمارتیں متاثر ہوئی ہیں۔
متاثرہ علاقوں میں امدادی سرگرمیاں جاری ہیں اور ہلاکت خیز زلزلے کے 106 گھنٹوں بعد 21 سالہ شخص کو زندہ نکال لیا گیا۔
یورپی یونین نے زلزلہ متاثرین کے لیے 50 لاکھ ڈالر سے زائد کی ہنگامی امداد جاری کردی ہے تاہم یونیسیف کا کہنا ہے کہ زلزلے سے متاثرہ 18 لاکھ افراد کو انسانی امداد کی ضرورت ہے۔

30 Jun
World

بھارتی آئل ریفائنری میں آگ کا بڑا حادثہ، کئی زخمیوں کی حالت تشویشناک

بھارتی ریاست مغربی بنگال کے شہر ہلدیہ میں واقع ہلدیہ پیٹروکیمیکل لمیٹڈ کی آئل ریفائنری میں آتشزدگی کے واقعے میں کم از کم 15 افراد زخمی ہوگئے، جن میں بعض کی حالت تشویشناک بتائی جا رہی ہے۔
بھارتی میڈیا رپورٹس کے مطابق آتشزدگی کا واقعہ منگل کی صبح تقریباً 4 سے 5 بجے کے درمیان پیش آیا، جب ریفائنری کی ایک پائپ لائن میں اچانک آگ بھڑک اٹھی۔ آگ نے دیکھتے ہی دیکھتے شدت اختیار کر لی، جس کے باعث جائے وقوع پر موجود متعدد کارکن جھلس گئے۔
اطلاع ملتے ہی فائر بریگیڈ اور ریسکیو ٹیمیں موقع پر پہنچ گئیں اور کئی گھنٹوں کی کوشش کے بعد آگ پر قابو پایا گیا۔ زخمی ہونے والے تمام افراد کو فوری طور پر قریبی اسپتال منتقل کیا گیا، جہاں انہیں طبی امداد فراہم کی جا رہی ہے۔ اسپتال ذرائع کے مطابق بعض زخمیوں کی حالت تشویشناک ہے۔
ریفائنری انتظامیہ کا کہنا ہے کہ ابتدائی معلومات کے مطابق آتشزدگی ممکنہ طور پر پائپ لائن سے تیل چوری کی کوشش کے دوران پیش آئی تاہم واقعے کی اصل وجہ جاننے کے لیے باقاعدہ تحقیقات شروع کر دی گئی ہیں۔
حکام نے واقعے کے بعد متاثرہ حصے کو سیل کر دیا ہے اور ماہرین تکنیکی معائنہ کر رہے ہیں تاکہ مستقبل میں ایسے حادثات سے بچنے کے لیے ضروری اقدامات کیے جا سکیں۔
یہ ریفائنری مشرقی بھارت کے اہم صنعتی مراکز میں شمار ہوتی ہے، جہاں مختلف پیٹروکیمیکل مصنوعات تیار کی جاتی ہیں۔ حکام نے یقین دہانی کرائی ہے کہ واقعے کی مکمل تحقیقات کے بعد ذمہ دار عناصر کے خلاف قانونی کارروائی کی جائے گی۔

30 Jun
World

فیفا ورلڈکپ، پیراگوئے کی تاریخ ساز فتح، ملک بھر میں عام تعطیل کا اعلان

پیراگوئے کے صدر سانتیاگو پینا نے قومی فٹبال ٹیم کی شاندار کامیابی پر 30 جون کو ملک بھر میں عام تعطیل کا اعلان کردیا۔ پیراگوئے نے ناک آؤٹ مرحلے میں جرمنی کو سنسنی خیز مقابلے کے بعد پنالٹی شوٹ آؤٹ میں شکست دے کر بڑا اپ سیٹ کیا۔
جنوبی امریکی ٹیم بہترین تیسری پوزیشن حاصل کرنے والی ٹیموں میں شامل ہو کر آخری 32 مرحلے تک پہنچی تھی لیکن اس نے عالمی طاقت سمجھی جانے والی جرمن ٹیم کو ٹورنامنٹ سے باہر کردیا۔
یہ ورلڈ کپ کی تاریخ میں پہلی بار ہے کہ جرمنی کو پنالٹی شوٹ آؤٹ میں شکست کا سامنا کرنا پڑا۔
پنالٹی شوٹ آؤٹ میں دونوں ٹیموں پر دباؤ نمایاں رہا لیکن آخرکار جوزے کانالے نے فیصلہ کن پنالٹی اسکور کر کے اپنی ٹیم کو یادگار فتح دلا دی۔
صدر سانتیاگو پینا نے سوشل میڈیا پلیٹ فارم ایکس پر اپنی خوشی کا اظہار کرتے ہوئے لکھا، ’پیراگوئے کبھی ہار نہیں مانتا، آج قومی تعطیل ہے‘۔اب پیراگوئے پری کوارٹر فائنل میں فرانس یا سویڈن میں سے کسی ایک ٹیم کا سامنا کرے گا

30 Jun
World

امریکا سے جامع معاہدے پر باضابطہ مذاکرات ابھی شروع نہیں ہوئے: ایران

تہران: ایران نے واضح کیا ہے کہ امریکا کے ساتھ کسی بھی جامع معاہدے پر باضابطہ مذاکرات کا آغاز تاحال نہیں ہوا۔ ایرانی وزارت خارجہ کے ترجمان اسماعیل بقائی نے کہا کہ دونوں ممالک ابھی اس مرحلے میں داخل نہیں ہوئے جہاں کسی حتمی یا جامع معاہدے پر باقاعدہ بات چیت ہو رہی ہو۔ انہوں نے کہا کہ موجودہ سفارتی رابطوں کو جامع معاہدے کے لیے باضابطہ مذاکرات قرار دینا درست نہیں، جبکہ مستقبل میں کسی بھی پیش رفت کا انحصار دونوں ممالک کے آئندہ سفارتی رابطوں اور باہمی فیصلوں پر ہوگا۔

30 Jun
Pakistan

خیبرپختون خوا میں جمعہ کی چھٹی ختم

میڈیا رپورٹس کے مطابق ایڈمنسٹریشن ڈیپارٹمنٹ خیبر پختون نے جمعہ کی چھٹی ختم کرنےکے ضمن میں باقاعدہ اعلامیہ جاری کر دیا ہے۔
اعلامیے میں کہا گیا کہ سرکاری دفاتر میں جمعہ کی چھٹی توانائی بحران کی وجہ سے دی گئی تھی جسے اب ختم کیا جارہا ہے۔
علاوہ ازیں صوبائی حکومت نے چھٹی کے ساتھ ستاھ ورک فرام ہوم کی سہولت بھی ختم کرنے کا اعلان کیا ہے۔

30 Jun
Showbiz

ٹیلر سوئفٹ کی شادی پر تنازعات شروع، سٹوں کا بازار گرم

عالمی شہرت یافتہ امریکی گلوکارہ، نغمہ نگار اور متعدد گریمی ایوارڈز یافتہ پاپ اسٹار ٹیلر سوئفٹ ایک بار پھر دنیا بھر کے ابلاغ عامہ اور سوشل میڈیا کی توجہ کا مرکز بن گئی ہیں۔ اس بار وجہ ان کا نیا میوزک البم یا ریکارڈ توڑ کنسرٹ نہیں، بلکہ این ایف ایل اسٹار ٹریوس کیلس کے ساتھ ان کی متوقع شادی سے متعلق گردش کرنے والی قیاس آرائیاں ہیں۔

30 Jun
Latest

ایران کی خلیجی ممالک کو نئے سیکیورٹی اتحاد کی پیشکش

تہران: ایران نے خلیجی خطے کے لیے نئے علاقائی سیکیورٹی نظام کی تشکیل کی تجویز دیتے ہوئے خطے کے ممالک کو مشترکہ اتحاد کی پیشکش کر دی ہے۔ایرانی میڈیا کے مطابق ایرانی وزیر خارجہ عباس عراقچی نے عراقی قومی سلامتی کے مشیر قاسم العبودی سے ملاقات کے بعد کہا کہ حالیہ واقعات نے واضح کر دیا ہے کہ خطے کے ممالک کو اپنی سلامتی کی ذمہ داری خود سنبھالنی چاہیے اور مستقبل کے سیکیورٹی انتظامات بھی باہمی مشاورت سے طے کرنے چاہییں۔انہوں نے کہا کہ ایران خلیج فارس کے ممالک کے ساتھ مل کر ایسا علاقائی سیکیورٹی فریم ورک قائم کرنے کے لیے تیار ہے جس میں صرف دفاعی تعاون ہی نہیں بلکہ اقتصادی شراکت داری بھی شامل ہو۔عباس عراقچی نے اس بات پر بھی زور دیا کہ خطے کے امن و استحکام کے لیے ضروری ہے کہ بیرونی فوجی طاقتوں کو علاقائی سیکیورٹی معاملات سے دور رکھا جائے جبکہ علاقائی ممالک باہمی اعتماد اور تعاون کے ذریعے اپنے مستقبل کا تعین کریں۔

30 Jun
Latest

دوحا میں امن مذاکرات؛ ٹرمپ اور وائٹ ہاؤس کی تصدیق؛ ایران کی تردید

وائٹ ہاؤس نے تصدیق کی کہ امریکی صدر کے خصوصی ایلچی اسٹیو وِٹکوف اور مشیر جیرڈ کشنر قطر کے دارالحکومت دوحہ میں ایرانی حکام کے ساتھ اعلیٰ سطح کے مذاکرات میں شرکت کریں گے۔عالمی خبر رساں ادارے کے مطابق یہ بات وائٹ ہاؤس کی ترجمان کیرولین لیویٹ نے فاکس نیوز کو انٹرویو میں بتائی۔ انھوں نے بتایا کہ امریکی وفد دوحا روانہ ہو گا۔انھوں نے مزید بتایا کہ مفاہمتی یادداشت پر جاری بات چیت کے سلسلے میں اعلیٰ سطح کے اجلاسوں میں شرکت کریں گے۔ ان اعلیٰ سطح کے مذاکرات کے ساتھ ساتھ تکنیکی سطح کے مذاکرات بھی ہوں گے جن میں مختلف امور پر پیش رفت کا جائزہ لیا جائے گا۔یاد رہے کہ اس سے قبل صدر ڈونلڈ ٹرمپ بھی سوشل میڈیا پر اعلان کرچکے ہیں کہ ایران نے ملاقات کی درخواست کی اور دونوں ممالک کے درمیان مذاکرات منگل کو دوحا میں ہوں گے۔