امریکی میڈیارپورٹس کےمطابق امریکی صدرڈونلڈ ٹرمپ اوراسرائیلی وزیراعظم نیتن یاہو کے درمیان لبنان کی صورتحال پر ایک انتہائی کشیدہ ٹیلیفونک گفتگو ہوئی،جس میں ٹرمپ نےاسرائیلی اقدامات پر شدید برہمی کا اظہار کیا۔
امریکی نیوزویب سائٹ نےدعویٰ کیاہےکہ ٹرمپ نے نیتن یاہوکو “پاگل” اور “ناشکرا” قرار دیا اور سخت الفاظ استعمال کرتے ہوئےکہا کہ لبنان میں اسرائیلی کارروائیاں خطےمیں جاری سفارتی کوششوں کو نقصان پہنچا رہی ہیں۔
امریکی خبر رساں ادارے Axios کےحوالے سے بتایا گیا کہ ٹرمپ نےنیتن یاہو کو خبردارکیا کہ اگر اسرائیل نے بیروت پرحملوں میں مزید شدت لائی تو عالمی سطح پر اسرائیل کی تنہائی بڑھ سکتی ہے۔
رپورٹس کے مطابق گفتگو کےدوران ٹرمپ نےنیتن یاہو سےکہاکہ “اگرمیں نہ ہوتا تو تم جیل میں ہوتے” اور “میں تمہاری مدد کر رہا ہوں”ہرشخص اب تم سےنفرت کرتاہے،ہرشخص اسرائیل سےنفرت کرتاہے،تم کیا احمقانہ کام کررہےہو۔۔

کاکروچ جنتا پارٹی (سی جے پی) کے بانی ابھیجیت دپکے نے اعلان کیا ہے کہ وہ 6 جون کو امریکا سے بھارت واپس آ کر نئی دہلی کے جنتر منتر پر پرامن احتجاج کریں گے۔ ان کا کہنا ہے کہ یہ احتجاج مرکزی وزیر تعلیم دھرمیندر پردھان کے استعفے کے مطالبے کے لیے کیا جائے گا۔
سی جے پی کے قیام کے بعد یہ دپکے کا بھارت کا پہلا دورہ ہوگا، جبکہ ان کی جماعت کو سوشل میڈیا پر خاصی توجہ حاصل ہوئی ہے۔
ابھیجیت دپکے نے سوشل میڈیا پلیٹ فارم ایکس پر جاری ایک ویڈیو پیغام میں کہا کہ وہ ملک واپس آ کر ان طلبہ کے حق میں آواز اٹھانا چاہتے ہیں جو مختلف امتحانات سے متعلق تنازعات اور مسائل سے متاثر ہوئے ہیں۔ انہوں نے خاص طور پر ”نِیٹ“ امتحان کے پرچہ لیک ہونے کے معاملے کا حوالہ دیتے ہوئے کہا کہ اس واقعے سے لاکھوں طلبہ کی محنت متاثر ہوئی اور کئی طلبہ شدید ذہنی دباؤ کا شکار ہوئے۔ اس بڑے بحران کی ذمہ داری قبول کرتے ہوئے مرکزی وزیرِ تعلیم دھرمیندر پردھان کو فوری طور پر اپنے عہدے سے استعفیٰ دے دینا چاہیے۔
انہوں نے کہا کہ اب وقت آ گیا ہے کہ لوگ آئین کے دائرے میں رہتے ہوئے پرامن انداز میں اپنی آواز بلند کریں اور حکومت سے جوابدہی کا مطالبہ کریں۔ ان کے مطابق اگر شہری متحد ہو کر اپنی بات رکھیں تو حکومت کو ان کی آواز سننی پڑے گی۔

ایرانی صدر مسعود پزشکیان کے استعفے کی مبینہ خبروں نے ہلچل مچا دی ہے۔ تاہم، ایرانی حکام نے ان دعوؤں کو بے بنیاد قرار دیا ہے۔
میڈیا آؤٹ لیٹ ’ایران انٹرنیشنل‘ نے دعویٰ کیا ہے کہ ایرانی صدر نے اتوار کے روز رہبرِ اعلیٰ کے دفتر کو اپنا استعفا بھجوا دیا ہے۔
رپورٹ میں دعویٰ کیا گیا کہ صدر پزشکیان نے اپنے استعفے میں ملک کے اہم فیصلوں میں حکومت کے کم ہوتے کردار اور اقتدار کے ڈھانچے میں پاسدارانِ انقلاب کے بڑھتے ہوئے اثر و رسوخ پر شدید مایوسی کا اظہار کیا۔
رپورٹ کے مطابق، ایرانی صدر نے اپنے خط میں اس بات پر افسوس ظاہر کیا کہ صدر اور حکومت کو بڑے قومی فیصلوں سے عملی طور پر الگ کر دیا گیا ہے، جس کی وجہ سے پاسدارانِ انقلاب یعنی آئی آر جی سی نے ریاستی معاملات پر اپنا کنٹرول بڑھا لیا ہے۔
ایران انٹرنیشنل کی رپورٹ کے مطابق، مسعود پزشکیان نے اپنے خط میں لکھا ہے کہ ان موجودہ حالات کے تحت وہ حکومت کو مؤثر طریقے سے چلانے یا اپنی آئینی ذمہ داریاں پوری کرنے سے قاصر ہیں، اسی لیے انہوں نے فوری طور پر اپنے عہدے سے الگ ہونے کی اجازت مانگی ہے۔ دوسری جانب، ایران کے صدارتی دفتر نے ان تمام خبروں کو یکسر مسترد کرتے ہوئے ان کی شدید الفاظ میں تردید کی ہے۔
ایران کے سرکاری حکام نے استعفے کی خبروں کو مکمل طور پر بے بنیاد قرار دیتے ہوئے غیر ملکی میڈیا پر من گھڑت خبریں پھیلانے کا الزام لگایا ہے۔
میکسیکو میں قائم ایرانی سفارت خانے ایک پر جاری ایک بیان میں لکھا کہ ”پزشکیان کا استعفا محض ایک افواہ ہے۔“
آئی آر جی سی سے وابستہ نیوز ایجنسی ’تسنیم‘ نے ایک باخبر حکومتی ذریعے کے حوالے سے بتایا ہے کہ صدر مسعود پزشکیان اپنے عہدے پر برقرار ہیں اور اپنی صدارتی ذمہ داریاں معمول کے مطابق نبھا رہے ہیں۔

ایرانی مہر نیوز ایجنسی کے مطابق پاسدارانِ انقلاب نے ایک امریکی فضائی اڈے کو نشانہ بنایا جہاں سے ایران کے صوبہ ہرمزگان کے جزیرے سِرک پر ٹیلی کمیونیکیشن ٹاور پر حملہ کیا گیا۔
پاسدارانِ انقلاب نے کہا کہ اس کی ایرو اسپیس فورس نے اس اڈے کو نشانہ بنایا اور تباہ کر دیا جہاں سے امریکی افواج نے مواصلاتی سہولت کے خلاف آپریشن شروع کیا تھا۔
پاسدارانِ انقلاب نے کہا کہ یہ حملہ امریکی حملے کی اطلاع کے چند گھنٹے بعد کیا گیا اور پہلے سے طے شدہ اہداف کو کامیابی سے نشانہ بنایا گیا ہے۔
دوسری جانب امریکی سینٹرل کمانڈ (سینٹکام) نے ایکس پر دعویٰ کیا کہ امریکی فوج نے ایران کے گوروک اور قشیم جزیرہ میں ایرانی اہداف کو نشانہ بنایا جو آبنائے ہرمز کے ساتھ واقع ہیں۔
سینٹکام کے مطابق یہ حملے ایران کی جانب سے امریکی ڈرون کو مار گرائے جانے کے جواب میں کیے گئے ہیں۔

آج عالمی امن کے لیے کوشاں اقوام متحدہ کے امن دستوں کا عالمی دن منایا جا رہا ہے۔پاکستان عالمی امن مشن میں خدمات سرانجام دینے والے بہادر افسران، جوانوں اور خواتین کو خراج تحسین پیش کرتا ہے۔ پاکستان اقوامِ متحدہ کے امن مشن میں اپنی افواج کے ذریعے سب سے زیادہ تعاون کرنے والا ملک ہے۔یہ امن دستے ڈیموکریٹک ریپبلک آف کانگو، جنوبی سوڈان، وسطی افریقی جمہوریہ، قبرص، مغربی صحارا اور صومالیہ کے امن مشنز میں خدمات سر انجام دے رہے ہیں۔1960 سے لے کر اب تک پاکستان نے دنیا کے تقریباَ تمام براعظموں سمیت 29 ممالک میں اقوامِ متحدہ کے 48 امن مشنز میں 2 لاکھ 37 ہزار فوجیوں کو تعینات کیا۔ اس دن کا مقصد عالمی امن کے لیے ان دستوں کے کردار کو اجاگر کرنا ہے۔پاکستان واحد ملک جس نے پسماندہ ملکوں میں مشکل حالات سےنمٹنے کے لئے امن کےقیام کے حوالے سے جاری آپریشنز میں خواتین کی نمائندگی اور درجہ بندی پرخصوصی توجہ دی ہے۔پاکستانی امن فوجی دستے اقوامِ متحدہ کے مشنوں کو مہارت اور لگن کے ساتھ مکمل کرنے میں اہم کردار ادا کر رہے ہیں۔ اقوام متحدہ کے امن مشنوں کے دوران 183 افسران و جوانوں نے عالمی امن کی بحالی کے لیے اپنی جانیں قربان کیں جبکہ عالی سطح پر امن کی بحالی کے لیے پاکستانی پیس کیپرز نے اپنا کلیدی کردار ادا کیا جو مستقبل میں بھی بھر پور انداز سے جاری رہے گا