کھیلوں کے فروغ میں کردار، سکواش کورٹ آصف شہاب کے نام منسوب کرنے کی تجویز

پشاور میں سپورٹس حلقوں نے مطالبہ کیا ہے کہ حیات آباد اسپورٹس کمپلیکس کے سکواش کورٹ کو سینئر بیوروکریٹ اور کھیل دوست شخصیت آصف شہاب کے نام سے منسوب کیا جائے۔ آصف شہاب گزشتہ روز سکواش کھیلتے ہوئے دل کا دورہ پڑنے سے انتقال کر گئے تھے۔
مرحوم گریڈ 19 کے سینئر افسر اور خیبرپختونخوا ہیومن کیپیٹل انویسٹمنٹ پروجیکٹ میں بطور پراجیکٹ ڈائریکٹر خدمات انجام دے رہے تھے۔ وہ کھیلوں خصوصاً سکواش کے فروغ میں گہری دلچسپی رکھتے تھے اور کورٹ کی تعمیر میں بھی ان کا اہم کردار رہا۔
سپورٹس حلقوں نے کہا ہے کہ آصف شہاب کی خدمات کے اعتراف میں سکواش کورٹ کو ان کے نام سے منسوب کرنا مناسب خراجِ عقیدت ہوگا۔

پی ایس ایل: حیدرآباد کنگزمین نے راولپنڈیز کو 5 وکٹوں سے شکست دے دی

پاکستان سپر لیگ (پی ایس ایل) 11 کے چوبیسویں میچ میں حیدرآباد کنگزمین نے راولپنڈیز کو5 وکٹوں سے شکست دے دی۔نیشنل بینک اسٹیڈیم کراچی میں کھیلے گئے میچ میں حیدرآباد کنگزمین کے کپتان مارنس لبوشین نے ٹاس جیت کر راولپنڈیز کو پہلے بیٹنگ کرنے کی دعوت دی۔راولپنڈیز کی ٹیم نے مقررہ 20 اوورز میں 9 وکٹوں کے نقصان پر 121 رنز بناتے ہوئے حیدرآباد کنگزمین کو جیت کے لیے 122 رنز کا ہدف دیا۔ سیم بلنگز 26 اور یاسر خان 24 رنز بناکر نمایاں رہے۔حیدرآباد کنگزمین کی جانب سے محمد علی اور حنین شاہ نے 3، 3 جبکہ گلین میکسویل اور آصف محمود نے ایک ایک وکٹ حاصل کی۔حیدرآباد کنگزمین نے شاندار بیٹگ کا مظاہرہ کرتے ہوئے 122 رنز کا ہدف 17ویں اوور میں 5 وکٹوں کے نقصان پر پورا کیا۔حیدرآباد کنگزمین کی جانب سے عرفان خان نیازی 34 رنز کے ساتھ ناٹ آوٹ رہے جبکہ کپتان مانوس 32 رنز بنا کر نمایاں رہے۔راولپنڈیز کی جانب سے آصف آفریدی نے دو کھلاڑیوں کو آوٹ کیا جبکہ محمد عامر اور سعد مسعودنے ایک ایک وکٹ لی

شان مسعود ٹیسٹ کپتان برقرار، سرفراز احمد ہیڈ کوچ مقرر

پاکستان کرکٹ بورڈ (پی سی بی) نے شان مسعود کو ٹیسٹ ٹیم کا کپتان برقرار رکھنے کا فیصلہ کیا ہے جبکہ سابق کپتان سرفراز احمد ہیڈ کوچ کی ذمے داریاں سنبھالیں گے۔پاکستان کرکٹ بورڈ بنگلا دیش کے ساتھ سیریز کے شیڈول کے اعلان کے بعدکپتان اور ہیڈ کوچ کا باضابطہ اعلان کرے گا۔ذرائع کے مطابق سرفراز احمد ،اظہر محمود کی جگہ پہلی بار ہیڈ کوچ کا عہدہ سنبھالیں گے، وہ اس وقت قومی سلیکٹر بھی ہیں جبکہ شان مسعود پہلے ہی قیادت کی ذمے داریاں سنبھال رہے ہیں ممکنہ طور پر پاکستانی ٹیم بنگلا دیش،ویسٹ انڈیز اور انگلینڈ کے خلاف تین ٹیسٹ سیریز کھیلے گا۔اکتوبر میں پاکستان نے آخری ٹیسٹ سیریز جنوبی افریقا کے خلاف کھیلی تھی،جو ایک ایک سے برابر ہوئی تھی۔ذرائع کے مطابق شان مسعود کو کپتان برقرار رکھ کر مستقل مزاجی کی پالیسی برقرار رکھی جائے گی۔ اس وقت وائٹ بال کے ہیڈ کوچ نیوزی لینڈ کے مائیک ہیسن ہیں جبکہ ون ڈے کی کپتانی شاہین شاہ آفریدی اور ٹی ٹوئینٹی کے کپتان سلمان علی آغا ہیں۔سرفراز احمد کی قیادت میں اس وقت لاہور میں نیشنل کرکٹ اکیڈمی (این سی اے) میں ریڈ بال کیمپ لگاہوا ہے جس میں قومی اکیڈمی کے کوچز بھی شامل ہیں۔

پی ایس ایل: پی سی بی نے زمبابوین کھلاڑی پر پابندی

پاکستان کرکٹ بورڈ (پی سی بی) نے زمبابوے کے کرکٹر بلیسنگ مزارابانی کو فوری طور پر اگلے دو ایڈیشنز میں شرکت کے لیے نااہل قرار دے دیا۔ تفصیلات کے مطابق یہ فیصلہ پی ایس ایل میں کیے جانے والے معاہدے کی خلاف ورزی پر کیا گیا ہے۔ پی سی بی کا کہنا ہے کہ فیصلہ پی ایس ایل کے معاہدے کے لیے متفقہ وعدوں کا احترام کرنے میں ناکامی پر کیا پی سی بی کا موقف ہے کہ پیشہ ورانہ کرکٹ اعتماد کی بنیاد اور معاہدوں کی یقین دہانی پر چلتی ہے، مذکورہ کرکٹر نے ذمہ داریوں کو نظر انداز کیا ضروری شرائط بشمول معاوضے اور ڈھانچے پر تحریری خط و کتابت کے ذریعے اتفاق کے بعد اس کی پابندی کرنا ذمہ داری بن جاتی ہے، چنانچہ درست وجہ کے بغیر اس طرح کے وعدوں سے ہٹنے کی کوشش متضاد ذمہ داریوں اور نیک نیتی کے اصولوں کی خلاف ورزی ہے۔ پی سی بی کا کہنا ہے کہ اخلاقی فریم ورک پر سمجھوتہ نہیں کیا جائے گا جبکہ دو سال کی پابندی خلاف ورزی کی سنگینی کو ظاہر کرتی ہے۔زمبابوین کرکٹر نے پی سی بی کے ساتھ معاہدے کی خلاف ورزی کی تھی جس پر قانونی ایکشن لیا گیا۔رواں سیزن میں اسلام آباد یونائٹیڈ کی نمائندگی کرنے پر رضامندی کے باوجود 29 سالہ بولر مزاربانی نے بھارتی لیگ کے ساتھ معاہدہ کرلیا تھا۔واضح رہے کہ پی سی بی نے گزشتہ سال جنوبی افریقا کے کرکٹر کوربن بوش کے خلاف بھی معاہدے کی خلاف ورزی پر قانونی کارروائی کی تھی۔

سری لنکن اسٹار چارتھ اسالنکا کی پاکستان سپر لیگ میں انٹری

لاہور قلندرز نے اپنی اسکواڈ کو مضبوط بنانے کے لیے سری لنکا کے مایہ ناز آلراؤنڈر چارتھ اسالنکا کو ٹیم میں شامل کر لیا ہے۔ دفاعی چیمپئن لاہور قلندرز نے یہ اہم فیصلہ ٹیم کے توازن کو برقرار رکھنے اور آنے والے میچز میں کارکردگی بہتر بنانے کے پیش نظر کیا ہے۔
رپورٹس کے مطابق اسالنکا کو انجری کا شکار ہونے والے کھلاڑی پرویز حسین ایمون کی جگہ متبادل (ریپلیسمنٹ) پلیئر کے طور پر سائن کیا گیا ہے۔ ٹیم مینجمنٹ کو امید ہے کہ اسالنکا اپنی بیٹنگ اور آلراؤنڈ صلاحیتوں سے ٹیم کو تقویت دیں گے۔
چارتھ اسالنکا محدود اوورز کرکٹ میں اپنی جارحانہ بیٹنگ اور کارآمد باؤلنگ کی بدولت خاص پہچان رکھتے ہیں، اور ان کی شمولیت لاہور قلندرز کے لیے ایک بڑا اضافہ سمجھی جا رہی ہے۔ شائقین کرکٹ کو بھی ان سے شاندار کارکردگی کی توقع ہے، خاص طور پر اہم مقابلوں میں ان کا کردار فیصلہ کن ثابت ہو سکتا ہے۔

پی ایس ایل 11: 20 میچز مکمل، پوائنٹس ٹیبل پر کس کا راج؟

پاکستان سپر لیگ (پی ایس ایل) سیزن 11 میں ٹیموں کے درمیان دلچسپ مقابلے جاری ہیں اور ابتدائی مرحلے میں پوائنٹس ٹیبل نے واضح شکل اختیار کرنا شروع کر دی ہے۔ پاکستان سپر لیگ (پی ایس ایل) سیزن 11 کے 20 میچز مکمل ہو چکے ہیں جن میں سے شروع کے 14 میچز لاہور میں کھیلے گئے جبکہ باقی میچز کراچی میں کھیلے جا رہے ہیں۔ تازہ ترین پوائنٹس ٹیبل کے مطابق پشاور زلمی سرفہرست ہے جس نے اب تک شاندار کارکردگی کا مظاہرہ کرتے ہوئے 5 میچز میں 4 فتوحات حاصل کیں اور ایک میچ بارش کی نذر ہوا، اس وقت پشاور زلمی 9 پوائنٹس کے ساتھ سرفہرست ہے۔ ملتان سلطانز بھی 5 میچز میں 4 کامیابیوں کے ساتھ 8 پوائنٹس لے کر دوسرے نمبر پر موجود ہیں کیونکہ ایک میچ میں سلطانز کو شکست کا سامنا کرنا پڑا جبکہ اسلام آباد یونائیٹڈ 7 پوائنٹس کے ساتھ تیسرے نمبر پر ہے۔
کراچی کنگز نے 5 میچز میں 3 فتوحات حاصل کر کے 6 پوائنٹس کے ساتھ چوتھی پوزیشن سنبھال رکھی ہے، جب کہ کوئٹہ گلیڈی ایٹرز اور لاہور قلندرز 4،4 پوائنٹس کے ساتھ بالترتیب پانچویں اور چھٹے نمبر پر ہیں۔ پوائنٹس ٹیبل کے نچلے حصے میں حیدرآباد کنگز اپنی پہلی فتح کے ساتھ ساتویں نمبر پر ہے جبکہ ٹیم راولپنڈیز تاحال کوئی میچ جیتنے میں کامیاب نہیں ہو سکی اور بغیر کسی پوائنٹ کے آٹھویں نمبر پر موجود ہیں۔
واضح رہے کہ پی ایس ایل 11 میں اس بار 8 ٹیمیں شریک ہیں اور ٹورنامنٹ 26 مارچ سے 3 مئی تک کھیلا جا رہا ہے جبکہ ٹاپ 4 ٹیمیں پلے آف مرحلے کے لیے کوالیفائی کریں گی۔

رائلی روسو کا بیان: آئی پی ایل، کرکٹ سے زیادہ بالی ووڈ شو

کوئٹہ گلیڈی ایٹرز کے مایہ ناز بیٹر رائلی روسو نے آئی پی ایل کے مقابلے میں پی ایس ایل کے معیار کی تعریف کردی اور بھارتی لیگ کو کرکٹ سے زیادہ فلم قرار دے دیا۔
انہوں نے کہا کہ آئی پی ایل بہت طویل ٹورنامنٹ ہے اور پی ایس ایل بہت زیادہ کمپیکٹ ٹورنامنٹ ہے جہاں مقابلہ بہت زیادہ سخت ہوتا ہے۔
رائلی روسو نے کہا کہ آئی پی ایل میں ظاہر ہے کہ اس کے پیچھے پورا بالی ووڈ ہے لہٰذا یہ اصل کرکٹ سے کہیں زیادہ فلم لگتا ہے۔
واضح رہے کہ آئی پی ایل اور پی ایس ایل کا موازنہ اس سے قبل بھی کیا جاتا رہا ہے اور سابق کرکٹرز کی جانب سے پی ایس ایل کے معیار کو اچھا قرار دیا جاتا ہے۔

وکٹ کے بعد نامناسب جشن، جہانداد خان پر جرمانہ

ایچ بی ایل پی ایس ایل 11 کی فرنچائز کوئٹہ گلیڈی ایٹرز کے جہانداد خان پر میچ فیس کا 10 فیصد جرمانہ عائد کردیا گیا۔
کوئٹہ گلیڈی ایٹرز کے جہانداد خان نے راولپنڈیز کے خلاف میچ میں کوڈ آف کنڈکٹ کی شق 2.5 کی خلاف ورزی کی۔
میچ ریفری نے جہانداد خان پر میچ فیس کا 10 فیصد جرمانہ عائد کردیا۔
یاد رہے کہ کوئٹہ گلیڈی ایٹرزکے کھلاڑی جہانداد خان نے سعد مسعود کی وکٹ حاصل کرنے کے بعد نامناسب انداز میں جشن منایا تھا۔

کوئٹہ گلیڈی ایٹرز کی شاندار فتح، راولپنڈی کو 61 رنز سے شکست

پی ایس ایل کے 18 ویں میچ میں کوئٹہ گلیڈی ایٹرز نے راولپنڈیز کو 61 رنز سے شکست دیدی،ٹورنامنٹ میں راولپنڈیز کی یہ مسلسل پانچویں شکست ہے ۔
تفصیلات کے مطابق راولپنڈیز کی پوری ٹیم 183 رنز کے ہدف کے تعاقب میں 17.3 اوورز میں 121 رنز بنا کر آوٹ ہو گئی جس میں ڈیرل مچل 30 رنز کے ساتھ ٹاپ سکورر رہے جبکہ یاسر کان نے 22 ، سعد مسعود نے 31 اور عبداللہ فضل نے 20 رنز بنائے ۔
راولپنڈیز نے ٹاس جیت کر فیلڈنگ کا فیصلہ کیا جس پر کوئٹہ گلیڈی ایٹرز نے 20 اوورز میں 6 وکٹوں کے نقصان پر 182 رنز بنائے جس میں ریلی رسوو 63 رنز کے ساتھ نمایاں رہے جبکہ سعود شکیل نے 42 اور حسن نواز نے 39 رنز کی اننگز کھیلی۔

پی ایس ایل 11: پشاور زلمی کی سنسنی خیز فتح، حیدرآباد کنگز مین شکست سے دوچار

پاکستان سپر لیگ (پی ایس ایل) 11 میں پشاور زلمی نے حیدرآباد کنگز مین کو سنسنی خیز مقابلے کے بعد 4 وکٹوں سے شکست دے دی۔ نیشنل اسٹیڈیم کراچی میں کھیلے گئے میچ میں پشاور زلمی نے 146 رنز کا ہدف 6 وکٹوں کے نقصان پر میچ کی آخری گیند پر حاصل کیا۔
زلمی کی جانب سے کپتان بابر اعظم 43 رنز بنا کر نمایاں رہے۔ کوشل مینڈس 27، مائیکل بریس ویل 25، فرحان یوسف 15، محمد حارث 11 اور عبدالصمد 1 رن بنا کر آؤٹ ہوئے۔
افتحار احمد 15 اور عامر جمال 6 رنز کے ساتھ ناٹ آؤٹ پویلین لوٹے۔
کنگز مین کی جانب سے صائم ایوب نے 2 کھلاڑیوں کو آؤٹ کیا۔ محمد علی، حنین شاہ، حسان خان اور مہیش ٹھیکشانا نے 1، 1 حاصل کی۔ اس سے قبل حیدرآباد کنگز مین کی ٹیم پشاور زلمی کی دعوت پر پہلے بیٹنگ کرتے ہوئے 18.2 اوورز میں 145 رنز بنا کرآؤٹ ہوگئی۔
کنگز مین کی جانب سے کوشل پریرا 58 رنز بنا کر نمایاں رہے۔ کپتان مارنس لبوشین 27، معاذ صداقت 17، صائم ایوب 14، عرفان خان 9، حسان خان 9 جبکہ عثمان خان، مہیش ٹھیکشانا اور حنین شاہ بغیر کوئی رن بنائے آؤٹ ہوئے۔
پشاور زلمی کی جانب سے افتحار احمد اور سفیان مقیم نے 4، 4 کھلاڑیوں کو آؤٹ کیا۔ افتخار احمد مین اف دی میچ رہے۔ میچ سے قبل پاکستان سپر لیگ کے سی ای او سلمان نصیر نے ٹاس کے موقع پر علامتی طور پر امن کی فاختہ اڑائی۔ اس موقع پر بابر اعظم، مارنش لبوشین اور میچ ریفری روشن ماہنامہ بھی موجود تھے۔ ایران امریکا جنگ بندی میں پاکستان حکومت کےکردار کو خراج تحسین پیش کیا گیا۔