سی سی پی او پشاور ڈاکٹر میاں سعید کی عوام کو عید کی مبارکباد

سی سی پی او پشاور ڈاکٹر میاں سعید احمد نے عیدالفطر کی نماز ملک سعد شہید پولیس لائن میں ادا کی۔ نماز کے بعد پولیس افسران و جوانوں سے فرداً فرداً ملاقات کی، انہیں عید کی مبارکباد دی، یادگارِ شہداء پر پھول چڑھائے اور خیبرپختونخوا پولیس کے شہداء کے بلند درجات کیلئے خصوصی دعا کی۔ اس موقع پر انہوں نے پولیس اہلکاروں کے ہمراہ عید کے بڑے کھانے میں بھی شرکت کی۔بعد ازاں سی سی پی او نے چیف ٹریفک آفیسر ڈاکٹر زاہد اللہ اور ایس ایس پی آپریشنز فرحان خان کے ہمراہ ریڈ زون سمیت شہر کے مختلف علاقوں اور ناکہ بندی پوائنٹس کا دورہ کیا۔انہوں نے ڈیوٹی پر موجود پولیس، ٹریفک اور پاک آرمی کے جوانوں سے ملاقات کی، انہیں عید کی مبارکباد دی اور مٹھائیاں تقسیم کیں۔ عوامی مقامات پر شہریوں سے بھی ملاقات کر کے سکیورٹی انتظامات کا جائزہ لیا۔سی سی پی او پشاور کا کہنا تھا کہ عید جیسے خوشیوں بھرے موقع پر اپنے گھروں سے دور رہ کر عوام کی جان و مال کے تحفظ کو یقینی بنانے والے اہلکار ہمارا قیمتی اثاثہ ہیں۔ پشاور پولیس عوام کی خدمت، امن و امان کے قیام اور شہریوں کے تحفظ کیلئے ہمہ وقت پُرعزم ہے۔