پاکستان کی جگہ بنگلادیش ایونٹ میں شامل

بنگلادیش نے ایشین ہاکی چیمپئنز ٹرافی میں پاکستان کے متبادل کے طور پر شرکت کی دعوت قبول کرلی ہے۔ ایشین ہاکی فیڈریشن نے بنگلادیش ہاکی فیڈریشن کو باضابطہ دعوت دی تھی۔
ٹورنامنٹ 27 اکتوبر سے 5 نومبر تک بھارت میں کھیلا جائے گا۔ پاکستان ہاکی فیڈریشن نے موجودہ صورتحال کے پیشِ نظر ٹیم بھارت بھیجنے سے انکار کرتے ہوئے ایونٹ کا مقام تبدیل کرنے یا پاکستان کے میچز کسی غیر جانب دار مقام پر کرانے کا مطالبہ کیا تھا۔
پاکستان کے مؤقف میں تبدیلی نہ آنے کے بعد ایشین ہاکی فیڈریشن نے بنگلادیش کو ایونٹ میں شامل کرلیا۔ ٹورنامنٹ میں بھارت، چین، جاپان، ملائیشیا، جنوبی کوریا اور بنگلادیش کی ٹیمیں شریک ہوں گی۔