اسلام آباد: امیر جماعت اسلامی حافظ نعیم الرحمان نے کہا ہے کہ مہنگائی کے خلاف احتجاج کرینگے اور ہڑتال کا آپشن بھی موجود ہے۔ اسلام آباد میں پریس کانفرنس کرتےہوئے حافظ نعیم الرحمان نے کہا کہ پیٹرولیم مصنوعات کی قیمتوں میں اضافے کے باعث مہنگائی آرہی ہے۔ انہوں نے کہا کہ عالمی مارکیٹ کےمطابق تیل کی قیمت 271 بنتی ہے مگر 117 روپے لیوی اور دیگر ٹیکسز لگاکر عوام کو 401 روپے فی لیٹر پیٹرول مل رہا ہے۔امیر جماعت اسلامی کا کہنا تھا کہ بھارت اور بنگلا دیش میں قیمتیں نہیں بڑھیں، جنگ کے اثرات کیا صرف پاکستان پر ہی پڑ رہے ہیں؟ حافظ نعیم الرحمان نے کہا کہ بجلی اور گیس پر فکس چارجز لگائے گئے ہیں، تین سال میں بجلی کے ٹیکسز کی مد میں 19کھرب روپے وصول کے گئے۔ان کا کہنا تھا کہ 100 میں سے 15 آئی پی پیز سےحکومت نے ڈیل کیا، باقی آئی پی پیز کے معاہدے ختم ہونے کا انتظار کر رہے ہیں، یہ اپنی کرپشن کیلئے آئی پی پیز کے معاہدوں میں توسیع کریں گے۔ حافظ نعیم الرحمان نے کہا کہ 15 مئی کو اسلام آباد میں مہنگائی کے خلاف بڑا احتجاج کریں گے جبکہ ہڑتال اور پہیہ جام کا آپشن بھی موجود ہے

اپر سوات کے علاقے بیدرہ میں ایک غیر معمولی اور حیران کن واقعہ سامنے آیا ہے جہاں ایک 7 سالہ بچی طبی معائنے اور بعد ازاں آپریشن کے بعد لڑکا قرار دی گئی۔
بچّی کے والد سیف الرحمان کے مطابق ان کی بیٹی نور بچپن سے ہی لڑکوں جیسی عادات و اطوار رکھتی تھی، جس پر انہوں نے ڈاکٹروں سے رجوع کیا۔ ان کے مطابق طبی معائنے کے دوران ڈاکٹروں نے بتایا کہ بچہ 99 فیصد لڑکا ہے۔
بعد ازاں مزید طبی کارروائی اور آپریشن کے بعد بچے کو مکمل طور پر لڑکا قرار دے دیا گیا، جس کے بعد اس کا نام تبدیل کر کے محمد نور رکھ دیا گیا۔
واقعے کے بعد خاندان، عزیز و اقارب اور اہلِ محلہ میں خوشی کی لہر دوڑ گئی۔ والد کا کہنا ہے کہ وہ اپنی تمام اولاد سے خوش ہیں، تاہم اس تبدیلی کو وہ اللہ کی خاص نشانی اور کرم سمجھتے ہیں۔
دوسری جانب اس معاملے پر کسی بھی ڈاکٹری یا متعلقہ میڈیکل ادارے کی جانب سے باضابطہ مؤقف سامنے نہیں آیا۔

انسپکٹر جنرل آف پولیس خیبرپختونخوا ذوالفقار حمید نے ضلع بنوں کا دورہ کیا اور پولیس جوانوں سے خطاب کرتے ہوئے کہا کہ شہداء ہمارا فخر ہیں اور ان کے خون کا بدلہ لیا جائے گا۔
انہوں نے شہداء کے لواحقین سے تعزیت کی اور یقین دہانی کرائی کہ انہیں تنہا نہیں چھوڑا جائے گا۔ آئی جی پی نے واقعے کی تفصیلی رپورٹ طلب کرتے ہوئے بنوں میں وسیع پیمانے پر کارروائیوں اور تمام تھانوں و چوکیات کے سیکیورٹی آڈٹ کا حکم دیا۔
انہوں نے مزید کہا کہ پولیس فورس کو جدید سہولیات اور اسلحہ فراہم کیا جائے گا جبکہ دہشتگردوں کے خلاف کارروائیاں مزید تیز کی جائیں گی۔

خیبر پختونخوا کے ضلع بنوں میں پولیس چوکی پر شدت پسندوں کے حملے کے نتیجے میں ہلاک ہونے والے پولیس اہلکاروں کی تعداد 15 تک پہنچ گئی ہے۔
میڈیکل اینڈ ٹیچنگ انسٹیٹیوٹ بنوں کے ترجمان نعمان خان نے تصدیق کی ہے کہ فتح خیل چوکی پر حملے میں ہلاک ہونے والوں کی تعداد 15 ہو گئی ہے۔
ان کے مطابق ہلاک ہونے والے تمام افراد پولیس اہلکار ہیں۔
اس کے علاوہ تین زخمیوں کو بھی ہسپتال لایا گیا تھا جن کی حالت خطرے سے باہر بتائی جا رہی ہے۔
اس سے قبل بنوں کے رینجل پولیس افسر سجاد خان کے دفتر سے جاری بیان میں بتایا گیا تھا کہ فتح خیل چوکی کی عمارت کے ملبے سے 12 پولیس اہلکاروں کی لاشیں نکالی جا چکی ہیں جبکہ تین اہلکاروں کو زندہ ملبے سے نکال لیا گیا ہے۔

سپریم کورٹ نے اپنے ایک فیصلے میں ریمارکس دیے ہیں کہ ایک بے گناہ کو سزا دینے کے بجائے 10 گنہگاروں کو بری کردینا زیادہ بہتر ہے۔20 سال پرانے قتل کیس میں ٹرائل کورٹ اور سندھ ہائی کورٹ کی سزائیں کالعدم قرار دیتے ہوئے سپریم کورٹ نے ملزم کو فوری رہا کرنے کا حکم دے دیا۔سپریم کورٹ نے 8 صفحات پر مشتمل تحریری فیصلہ جاری کردیا، جسے جسٹس اشتیاق ابراہیم نے تحریر کیا۔ملزم محمد اقبال کو 2 افراد کے قتل کے الزام میں گرفتار کیا گیا تھا۔ عدالت نے قرار دیا کہ شکایت کنندہ عینی شاہد نہیں ہے جب کہ گواہان کے بیانات میں بھی تضاد پایا گیا ہے۔عدالت نے مزید کہا کہ جائے وقوع اور پولیس اسٹیشن کے درمیان 2 سے 3 کلومیٹر کا فاصلہ تھا۔ اس کے باوجود ایف آئی آر اسی دن کیوں نہیں درج کرائی گئی، اس بات کی وضاحت نہیں کی گئی۔ یہ وضاحت بھی نہیں کی گئی کہ زخمی گواہ نے کیوں ایف آئی آر درج نہیں کرائی، گولیوں کے 5 خالی خول بھی فرانزک کے لیے لیبارٹری نہیں بھجوائے گئے۔سپریم کورٹ نے قرار دیا کہ استغاثہ بغیر شک و شبہ کیس ثابت کرنے میں ناکام رہا۔ ہائی کورٹ کا یہ کہنا کہ وقوعے کے 14 سال بعد ملزم کا گرفتار ہونا ثابت کرتا ہے وہ قصوروار ہے، اسے قانونی طور پر قابل تائید نہیں قرار دیا جاسکتا۔ ملزم سے 342 کے بیان میں مبینہ مفروری کے بارے میں نہیں پوچھا گیا۔عدالت عظمیٰ کے فیصلے میں کہا گیا ہے کہ یہ طے شدہ اصول ہے کہ وہ شہادت یا واقعہ جو ملزم کے 342 کے بیان میں اس کے سامنے نہ رکھا جائے وہ ملزم کے خلاف استعمال نہیں ہوسکتا۔ ملزم گرفتاری کے خوف سے یا پولیس کے ہراساں کیے جانے کے خوف سے مفرور رہے تو اس بنیاد پر اسے قصوروار قرار نہیں دیا جاسکتا۔عدالت نے کہا کہ استغاثہ کے پیش کیے گئے شواہد نقائص اور شکوک شبہات سے بھرپور ہیں۔ فوجداری فقہ قانون میں طے شدہ اصول ہے کہ کوئی واقعہ جو شک پیدا کرے اس کا فائدہ ملزم کو ہی جاتا ہے۔ 14 سو سال سے طے شدہ ہے کہ ایک بے گناہ کو سزا کے بجائے 10 گنہگاروں کو بری کر دینا بہتر ہے۔عدالت نے حکم دیا کہ اگر درخواست گزار محمد اقبال کسی اور مقدمے میں نامزد نہیں ہے اسے فوری رہا کیا جائے۔واضح رہے کہ اس مقدمے کی ایف آئی آر 29 اپریل 2006 کو بلدیہ ٹاؤن کراچی میں درج کی گئی تھی۔ بعد ازاں ملزم محمد اقبال کو 2 افراد کے قتل کے الزام میں گرفتار کیا گیا تھا، جس کے بعد ٹرائل کورٹ نے ملزم کو عمر قید کی سزا سنائی تھی اور سندھ ہائی کورٹ نے بھی بعد ازاں یہ سزا برقرار رکھی تھی