ویب ڈیسک: محکمہ خزانہ خیبرپختونخوا کی جانب سے بجٹ سٹریٹیجی پیپر جاری کر دیئے گئے، جس میں خیبرپختونخوا معیشت میں بہتری کا زکر کیا گیا ہے، ساتھ ہی ترقیاتی اہداف اور اخراجات کی تفصیلات بھی اس میں شامل ہیں۔سٹریٹیجی پیپر کے مطابق صوبے کی مجموعی پیداوار (GPP) 11 ہزار 885 ارب روپے ہے، جبکہ فی کس آمدنی 2 لاکھ 90 ہزار روپے اورع مالی سرپلس ہدف157 ارب روپے حاصل بتائی گئی ہے۔معاشی شرح نمو میں زرعی شعبہ کا حصہ 30 فیصد ، روزگار، لیبر سیکٹر کی شراکت 32 فیصد، خدماتی شعبہ میں 3 فیصد اضافہ ہوا ہے، اس کے علاوہ تعلیم شعبہ میں شرح نمو میں 14 فیصد جبکہ محنت میں 19 فیصد اضافہ ریکارڈ کیا گیا ہے۔سٹریٹیجی پیپر کے مطابق شرح خواندگی 56.7 فیصد کی حد تک پہنچ گئی ہے، صحت کارڈ پر خرچ41 ارب اور صحت کارڈ سے مستفید ہونے والے افراد کی تعداد 3 کروڑ 20 لاکھ تک جا پہنچی ہے۔پولیس کیلئے مجموعی اخراجات 164.520 ارب اور امن و امان کیلئے مجموعی بجٹ 191 ارب روپے مختص کیا گیا ہے۔بجٹ میں سالانہ ترقیاتی فنڈز 524 ارب روپے ، جاری اخراجات 1645 ارب روپے اور ضم قبائلی اضلاع کیلئے 35 ارب روپے مختص کئے گئے ہیں، جبکہ مجموعی خسارہ48 ارب روپے بتایا جاتا ہے۔سرکاری ملازمین کی تنخواہوں و پنشن میں 7، 7 فیصد اضافہ جبکہ کم سے کم ماہانہ اجرت بڑھا کر 45 ہزار روپے کرنے کی تجویز دی گئی ہے۔پشاور بحالی پروگرام کیلئے 36 ارب روپے ، بی آر ٹی کیلئے 7.5 ارب روپے ، خوشحال ہزار پروگرام کیلئے 4 ارب روپے ، احساس مستحق پروگرام15 ارب روپے ، صحت کارڈ 50 ارب روپے اور ایم ٹی آئی ہسپتالوں کیلئے 80 ارب روپے تجویز کئے گئے ہیں۔صوبائی بجٹ میں زراعت کیلئے 29ارب روپے ، 42 ارب روپے توانائی کیلئے، 90 ارب روپے بلدیات کیلئے، داخلہ امور کیلئے 29 ارب روپے ، ٹرانسپورٹ 14 ارب روپے اور زکواۃ کیلئے 28 ارب روپے تجویز کئے گئے ہیں۔ماہرین کے مطابق سٹریٹیجی پیپر میں سماجی شعبے پر بھاری سرمایہ کاری ظاہر کی گئی ہے، اس میں صحت اور تعلیم کو مرکزی حیثیت دی گئی ہے ، جن میں ترقیاتی بجٹ میں انفراسٹرکچر اور فلاحی منصوبے شامل ہیں ، تاہم 48 ارب روپے خسارہ مالی دباؤ کی نشاندہی کرتا ہے
