ایک ایسے زمانے میں جب وقت دیکھنے کے لیے اسمارٹ فونز اور ڈیجیٹل اسکرینز ہر جگہ موجود ہیں، نوجوان نسل یعنی جین زی روایتی کلائی پر باندھنے والی گھڑیوں کی طرف تیزی سے مائل ہورہی ہے۔ حیران کن طور پر وہی گھڑیاں جنہیں کبھی پرانا اور غیر ضروری سمجھا جانے لگا تھا، آج کے نوجوانوں کے لیے ایک خاص کشش اور جذباتی اہمیت اختیار کرچکی ہیں۔امریکا کی ریاست یوٹاہ سے تعلق رکھنے والے 22 سالہ یوٹیوبر ایون فرائی اس رجحان کی واضح مثال ہیں، جن کے پاس 35 سے زائد قیمتی گھڑیاں موجود ہیں۔ ان کے کلیکشن میں سب سے نمایاں ’ٹیگ ہیور کیریرا‘ ہے، جسے انہوں نے ہالی ووڈ اداکار ریان گوسلنگ سے متاثر ہو کر خریدا۔ ایون کے مطابق گھڑیاں محض وقت بتانے کا ذریعہ نہیں بلکہ یادوں اور تاریخ کو اپنے اندر سموئے ہوتی ہیں۔مارکیٹ رپورٹس بھی اس رجحان کی تصدیق کرتی ہیں۔ لگژری گھڑیوں کے ری سیل پلیٹ فارم ’بیزل‘ کے مطابق ان کی فروخت کا تقریباً ایک تہائی حصہ 30 سال سے کم عمر خریداروں پر مشتمل ہے، جو نہ صرف گھڑیاں خرید رہے ہیں بلکہ مہنگی گھڑیوں پر زیادہ خرچ بھی کر رہے ہیں۔اسی طرح ’کرونو 24‘ کے اعداد و شمار ظاہر کرتے ہیں کہ کلاسک ڈریس واچز کی خریداری میں گزشتہ چند برسوں کے دوران نمایاں اضافہ ہوا ہے۔ماہرین کے مطابق چونکہ جین زی مکمل طور پر ڈیجیٹل ماحول میں پلی بڑھی ہے، اس لیے اس میں ایسی چیزوں کی خواہش زیادہ ہے جو حقیقی ہوں، جنہیں چھوا جا سکے اور جو وقت کے ساتھ قائم رہیں۔ یہی وجہ ہے کہ نوجوان اکثر ایسی گھڑیاں تلاش کرتے ہیں جو ماضی کی یادوں سے جڑی ہوں، جیسے وہ ڈیزائن جو ان کی دادی یا نانی استعمال کیا کرتی تھیں۔دلچسپ بات یہ بھی ہے کہ اب گھڑیوں میں مردانہ اور زنانہ کی تفریق بھی دھندلا رہی ہے۔ نوجوان لڑکے بھی باریک اور نفیس ڈیزائن کی گھڑیاں پہننے لگے ہیں، جس کا رجحان معروف شخصیات کے انداز سے مزید مضبوط ہوا ہے۔ بڑے ایوارڈ شوز میں جب اداکار منفرد گھڑیاں پہن کر نظر آتے ہیں تو ان ڈیزائنز کی مانگ میں فوری اضافہ دیکھا جاتا ہے۔مزید حیرت کی بات یہ ہے کہ آج کی نسل کے لیے گھڑی کا مقصد صرف وقت دیکھنا نہیں رہا۔ کچھ نوجوان ایسی گھڑیاں بھی خرید لیتے ہیں جو چلتی بھی نہیں، کیونکہ وہ انہیں فیشن ایکسیسریز یا زیور کے طور پر استعمال کرنا چاہتے ہیں۔ یہاں تک کہ بعض کم عمر صارفین یہ بھی تسلیم کرتے ہیں کہ انہیں سوئیوں والی گھڑی سے وقت پڑھنا نہیں آتا، مگر اس کے باوجود وہ اسے پہننا پسند کرتے ہیں۔یہ بدلتا ہوا رجحان اس حقیقت کو اجاگر کرتا ہے کہ جدید ٹیکنالوجی کے اس دور میں بھی کلاسک اور مکینیکل چیزوں کی اہمیت ختم نہیں ہوئی بلکہ وہ ایک نئے انداز میں دوبارہ مقبول ہو رہی ہیں، جہاں گھڑی صرف وقت نہیں بلکہ شخصیت، یاد اور انداز کی نمائندگی بن چکی ہے۔

ماہرینِ صحت نے ایک سادہ مگر مؤثر عادت کی نشاندہی کی ہے جو روزمرہ زندگی میں شامل کر کے بڑی بیماریوں سے بچا جا سکتا ہے۔ماہرین کے مطابق کھانے کے بعد محض 10 سے 15 منٹ کی ہلکی چہل قدمی جسم پر مثبت اور دیرپا اثرات مرتب کرتی ہے، جو نہ صرف ہاضمے بلکہ مجموعی صحت کو بھی بہتر بناتی ہے۔تحقیقی نتائج سے معلوم ہوا ہے کہ کھانے کے فوراً بعد تھوڑی دیر چلنے سے معدہ اور آنتوں کی کارکردگی تیز ہو جاتی ہے، جس سے کھانا جلد ہضم ہوتا ہے اور بدہضمی یا بھاری پن کی شکایت کم ہو جاتی ہے۔اسی کے ساتھ یہ معمول خون میں شوگر کی سطح کو متوازن رکھنے میں بھی اہم کردار ادا کرتا ہے کیونکہ چہل قدمی کے دوران پٹھے گلوکوز کو توانائی کے طور پر استعمال کرتے ہیں، جس سے شوگر لیول اچانک بڑھنے سے بچ جاتا ہے۔ماہرین کا کہنا ہے کہ اگرچہ یہ مکمل ورزش کا نعم البدل نہیں، لیکن روزانہ کی بنیاد پر مختصر واک وزن کو قابو میں رکھنے میں مدد دیتی ہے۔ یہ اضافی کیلوریز جلانے کے ساتھ ساتھ غیر ضروری کھانے کی عادت کو بھی کم کرتی ہے۔ اس کے علاوہ ہلکی پھلکی چہل قدمی ذہنی سکون میں اضافہ کرتی ہے کیونکہ اس سے خوشی کے ہارمونز خارج ہوتے ہیں جو تناؤ کو کم کرتے ہیں اور توجہ بہتر بناتے ہیں۔دل کی صحت کے حوالے سے بھی یہ عادت نہایت مفید قرار دی گئی ہے۔ چہل قدمی خون کی روانی کو بہتر بناتی ہے، بلڈ پریشر کو متوازن رکھنے میں مدد دیتی ہے اور دل کے امراض کے خطرات کو کم کر سکتی ہے۔ اس کے ساتھ ساتھ یہ نیند کے معیار کو بھی بہتر بناتی ہے، خاص طور پر اگر شام کے وقت ہلکی سرگرمی اپنائی جائے۔ماہرین کے مطابق کھانے کے بعد 30 سے 60 منٹ کے اندر ہلکی یا درمیانی رفتار سے واک کرنا بہترین نتائج دیتا ہے۔ اگر فوری طور پر چلنا ممکن نہ ہو تو چند منٹ انتظار کے بعد چہل قدمی شروع کی جا سکتی ہے۔ ان کا کہنا ہے کہ کھانے کے بعد فوراً لیٹنے یا موبائل میں مصروف ہونے کے بجائے یہ چھوٹی سی عادت اپنانا طویل مدت میں صحت کے لیے نہایت فائدہ مند ثابت ہو سکتا ہے۔

وزارت خزانہ کے ذرائع نے کہا ہے کہ تمام شرائط پوری کیے جانے کے بعد اب پاکستان کے لیے آئی ایم ایف فنڈ کی منظوری میں کوئی رکاوٹ نہیں ہے۔بین الاقوامی مالیاتی فنڈ(آئی ایم ایف) کے ایکسٹنڈڈ فنڈ فسیلیٹی پروگرام کے تحت پاکستان کے تیسرے اقتصادی جائزہ پر ہونے والے اسٹاف لیول معاہدے اور ایک ارب 20 کروڑ ڈالر کی منظوری دینے کے لیے آئی ایم ایف کے ایگزیکٹو بورڈ کا اجلاس آئندہ ماہ( مئی )کے پہلے ہفتے منعقد ہوگا۔اس حوالے سے وزارت خزانہ ذرائع کا کہنا ہے کہ پاکستان نے بین الاقوامی مالیاتی فنڈ(آئی ایم ایف)کی تمام شرائط پوری کردی ہیں اور آئی ایم ایف کو دوست ممالک کے قرض کے رول اوور کی یقین دہانی کرا دی گئی ہے، اس لیے اب آئی ایم ایف سے قرضے کی اگلی قسط کے اجرا کی منظوری کی راہ میں کوئی رکاوٹ نہیں ہے۔ذرائع نے بتایا کہ توقع ہے کہ آئندہ ماہ ہونے والے آئی ایم ایف ایگزیکٹو بورڈ کے اجلاس میں ای ایف ایف کے تحت قرضے کی اگلی قسط اور کلائمیٹ فنانسنگ کے آر ایس ایف پروگرام کی 21 کروڑ ڈالر کی اگلی قسط بھی ملے گی۔ذرائع کا مزید کہنا ہے کہ آئی ایم ایف کو پیٹرولیم پر ٹارگٹڈ سبسڈی سے متعلق اعتماد میں لیا گیا ہے۔ اسی طرح تیل کی عالمی قیمتوں میں اضافہ صارفین کو منتقل کرنے سے پہلے آئی ایم ایف سے مشاورت کی گئی ہے۔ٹارگٹڈ سبسڈی کی رقم رواں مالی سال کے بجٹ سے خرچ ہوگی اور مشکل حالات کے لیے 300 ارب کے ہنگامی فنڈز بھی دستیاب ہیں۔ ذرائع کے مطابق سعودی عرب اور یو اے ای کے ڈیپازٹس طویل مدت کے لیے روول اوور کرنے پر بات چیت جاری ہے اور توقع ہے کہ یو اے ای پاکستان کے ذمہ قرضہ جلد رول اوور کر دے گا۔ذرائع نے بتایا کہ آئی ایم ایف کو دوست ممالک کے قرض کے رول اوور کی یقین دہانی کرا دی گئی ہے جبکہ اس وقت اسٹیٹ بینک آف پاکستان میں سعودی عرب کے 5 ارب ڈالر کے ڈیپازٹس ہیں، چین کے 4 ارب ڈالر اور یو اے ای کے 3 ارب ڈالر کے ڈیپازٹس ہیں۔یو اے ای کے 2 ارب ڈالر رواں ماہ اور ایک ارب ڈالر کی واپسی جولائی میں ہونا ہے اور اس حوالے سے کسی قسم کی کوئی مشکل درپیش نہیں ہے۔ تمام ادائیگیاں بروقت ہوں گی۔