امریکی شہر نیویارک میں ہونے والے میٹ گالا میں دنیا بھر سے مختلف آرٹسٹوں نے شرکت کی جس میں ایک تھیم کے تحت اپنےلباس کے آرٹ کی نمائش کی گئی۔
میٹ گالا میں بھارت سے تعلق رکھنے والی مختلف شوبز اور کاروباری شخصیات نے اپنے کلچر اور آرٹ کا مظاہرہ کیا۔
بھارتی ارب پتی تاجر مکیش امبانی کی صاحبزادی ایشا امبانی بھی ان ہی میں سے ایک تھیں جنہوں نے سونے کی تار، 1800 ہیروں اور قیمتی پتھروں سے سجی ساڑھی کا انتخاب کیا۔
صرف اتنا ہی نہیں ایشا امبانی کے سفید رنگ کے پھولوں کے گجرے اور20 سال پرا اسٹیل سے بنا آم بھی توجہ طلب رہا جسے کریشیے میں بُنا گیا تھا، آم مشہور بھارتی فنکار سبودھ گپتا کا ایک مجسمہ ہے جو روزمرہ کی چیزوں کو اعلیٰ فن میں تبدیل کرنے کے لیے جانے جاتے ہیں۔
اسی حوالے سے ایک ویڈیو بھی وائرل ہورہی ہے جس میں ایشا امبانی نے بتایا کہ ان کی ساڑھی کا بلاؤز والدہ کی جیولری سے بنایا گیا ہے جب کہ انہوں نے تمام تر زیورات اپنی والدہ کے پہنے۔
ایشا امبانی نے مزید بتایا کہ یہ ساڑھی ڈیزائنر گورو گپتا کی تیار کردہ ہے اور یہ ساڑھی سودیش کے کاریگروں کے ذریعے تیار کروائی گئی ہے۔

رجب بٹ اس سے قبل بھی جوئے سمیت متعدد مقدمات کا سامنا کر رہے ہیں پاکستان کے متنازع یوٹیوبر رجب بٹ کو اسلام آباد ہائیکورٹ سے اہم قانونی ریلیف مل گیا، جہاں عدالت نے ان کا نام پاسپورٹ کنٹرول لسٹ سے فوری طور پر نکالنے کا حکم دے دیا۔اسلام آباد ہائی کورٹ میں جسٹس اعظم خان نے محفوظ فیصلہ سناتے ہوئے چھ صفحات پر مشتمل تحریری حکمنامہ جاری کیا۔ فیصلے میں قرار دیا گیا کہ رجب بٹ کا نام پاسپورٹ کنٹرول لسٹ میں برقرار رکھنا غیر قانونی، غیر ضروری اور ان کے بنیادی حقوق کے منافی ہے۔سماعت کے دوران رجب بٹ کی جانب سے بیرسٹر زاہد کھوکھر عدالت میں پیش ہوئے۔ عدالتی کارروائی میں بتایا گیا کہ نیشنل سائبر کرائم انویسٹی گیشن ایجنسی کی درخواست پر رجب بٹ کا نام پی سی ایل میں شامل کیا گیا تھا۔تاہم ڈپٹی اٹارنی جنرل نے عدالت کو آگاہ کیا کہ این سی سی آئی اے حکام کو رجب بٹ کا نام پاسپورٹ کنٹرول لسٹ سے ہٹانے پر کوئی اعتراض نہیں۔ عدالت نے اپنے فیصلے میں واضح کیا کہ چونکہ رجب بٹ متعلقہ ادارے کے سامنے پیش ہو چکے ہیں، اس لیے ان کا نام فہرست میں برقرار رکھنے کا مزید کوئی قانونی جواز موجود نہیں۔عدالت نے درخواست منظور کرتے ہوئے متعلقہ حکام کو فوری طور پر رجب بٹ کا نام پاسپورٹ کنٹرول لسٹ سے حذف کرنے کی ہدایت جاری کر دی

بھارتی کامیڈین و اداکار کپل شرما کے کینیڈا میں قائم کیفے کے قریب مبینہ فائرنگ اور قتل کی دھمکیوں کی اطلاعات نے سوشل میڈیا پر تشویش پیدا کر دی ہے۔
میڈیا رپورٹس کے مطابق برٹش کولمبیا کے شہر سرے میں واقع ایک قریبی آؤٹ لیٹ کے نزدیک فائرنگ کا واقعہ رپورٹ ہوا، جبکہ بعض سوشل میڈیا پوسٹس میں دعویٰ کیا گیا کہ کپل شرما اور کیفے انتظامیہ کو سنگین دھمکیاں موصول ہوئی ہیں۔
بعض غیر مصدقہ رپورٹس میں اس معاملے کو مبینہ طور پر لارنس بشنوئی گینگ سے جوڑا جا رہا ہے، تاہم اب تک ان دعووں کی آزادانہ تصدیق سامنے نہیں آئی۔
رپورٹس کے مطابق دھمکی آمیز پیغامات میں کپل شرما کو خبردار کیا گیا کہ اگر انہوں نے مخصوص ہدایات پر عمل نہ کیا تو انہیں سنگین نتائج کا سامنا کرنا پڑ سکتا ہے۔ تاحال حکام یا کپل شرما کی جانب سے اس معاملے پر کوئی باضابطہ بیان جاری نہیں کیا گیا۔

غیر ملکی میڈیا کے مطابق نیویارک ایئرپورٹ پر روس سے تعلق رکھنے والے آسکر ایوارڈ کے فاتح اداکار اور ہدایت کار پیول تالانکن کو ایوارڈ کی تلاشی پر مجبور کیا گیا، جس کے بعد ان کا آسکر غائب ہوگیا۔
پیول تالانکن نے بتایا کہ وہ بدھ کو امریکا سے جرمنی جانے والی پرواز میں آسکر ایوارڈ اپنےکیری آن بیگ میں رکھا تھا لیکن جان ایف کینیڈی انٹرنیشنل ایئرپورٹ پر سیکیورٹی نے انہیں روک لیا اور انہیں بتایا کہ یہ ایوارڈ بطور ہتھیار استعمال ہو سکتا تھا۔
انہوں نے بتایا کہ جب وہ جرمنی پہنچے تو ان کی دستاویزی فلم مسٹر نوبڈی اگینسٹ پوٹن کے لیے ملنے والا آسکر ایوارڈ غائب تھا۔
رپورٹ کے مطابق ایئرلائن نے تکلیف پہنچنے پر مالک سے معذرت کرتے ہوئے بتایا کہ آسکر کا مجسمہ اب مل گیا ہے اور فرینکفرٹ میں ہماری تحویل میں محفوظ ہے اور بتایا کہ ایئرلائن اپنے مہمان کے ساتھ براہ راست رابطے میں ہے تاکہ مجسمہ جلد از جلد واپس کیا جا سکے اور ہمارے مہمانوں کے سامان کی محفوظ دیکھ بھال ہمارے لیے انتہائی اہم ہے اور مذکورہ واقعے کے حوالے سے محکمہ جاتی چھان بین کی جا رہی ہے۔
دستاویزی فلم کے شریک ہدایتکار ڈیوڈ بورینسٹین نے بتایا کہ وہ ہنگامہ خیزی کے بعد آسکر ایوارڈ کا مجسمہ مل جانے پر مطمئن ہیں اور کہا کہ انہوں نے بس ایک کمزور سا ڈبہ ڈھونڈا اور اسے کہا کہ اس میں رکھ دو حالانکہ سب لوگ کہہ رہے تھے یہ آسکر ہے، آپ ایسا کیوں کر رہے ہیں۔
انہوں نے کہا کہ معاملہ خاصا بگڑ گیا تھا کیونکہ فلم کی ایگزیکٹو پروڈیوسر روبین ہیسمن فون پر تھیں اور ٹرانسپورٹیشن سیکیورٹی ایڈمنسٹریشن پر چلا رہی تھیں کہ آپ ایسا نہیں کر سکتے۔
روبین ہیسمن نے بتایا کہ پیول تالانکن اس سال ملنے والے اپنے آسکر اور برٹش اکیڈمی آف فلم اینڈ ٹیلی ویژن دونوں ایوارڈز کے ساتھ امریکا اور بین الاقوامی پروازوں میں کئی بار سفر کر چکے ہیں لیکن کبھی بھی آسکر جہاز میں ساتھ لے جانے میں کوئی مسئلہ پیش نہیں آیا تھا۔
واضح رہے کہ 35 سالہ پیول تالانکن بہترین فیچر ڈاکیومنٹری جیتنے والی فلم کے شریک ہدایت کاراور مرکزی کردار بھی ہیں اور وہ اس ایوارڈ کو اکثر تقریبات اور اسکریننگز میں دکھانے کے لیے اپنے ساتھ رکھتے ہیں اور نیویارک کے حالیہ دورے میں انہوں نے ایک یونیورسٹی میں سوال و جواب کے سیشن کے دوران طلبہ کے درمیان بھی اسے گھمایا تھا۔
رپورٹ کے مطابق ایک اکیڈمی ایوارڈ کی لمبائی 13.5 انچ (34 سینٹی میٹر) اور وزن 3.9 کلوگرام ہوتا ہے، اور اس کی تیاری کی لاگت تقریباً 400 ڈالر سے 1000 ڈالر تک بتائی جاتی ہے۔
پیول تالانکن نے آسکر جیتنے والی دستاویزی فلم مسٹر نوبڈی اگینسٹ پوٹن ایک روسی اسکول میں جنگی پروپیگنڈے کے بڑھتے ہوئے رجحان کو ریکارڈ کرتے ہوئے بنایا ہے، جہاں وہ روس کی یوکرین کے خلاف فروری 2022 میں جنگ شروع ہونے کے بعد بھی کام کرتے تھے۔
رپورٹ میں بتایا گیا کہ روس میں اسکول استاد کے طور پر کام کرنے والے 35 سالہ اداکار اب سیکیورٹی خدشات کے باعث روس سے جلاوطنی اختیار کر کے یورپ میں مقیم ہیں۔
روس نے مذکورہ دستاویزی فلم کو انتہا پسندی اور دہشت گردی کو فروغ دینے کی حامل قرار دے کر تین اسٹریمنگ پلیٹ فارمز پر پابندی عائد کردی ہے۔

بھارتی اداکارہ ریم شیخ کا کہنا ہے وہ کسی بھی غیر مسلم کے ساتھ زندگی نہیں گزار سکتیں۔بھارتی میڈیا کے مطابق اداکارہ نے ایک انٹرویو میں بین المذاہب تعلقات کے بارے میں اپنے تاثرات شیئر کرتے ہوئے کچھ انکشافات بھی کیے۔ریم شیخ سے میزبان نے سوال کیا کہ اگر آپ کو کسی دوسرے مذہب سے تعلق رکھنے والے آدمی سے محبت ہوگئی تو معاملات پیچیدہ ہو جائیں گے؟اداکارہ نے اس سوال کا بہت واضح انداز میں جواب دیتے ہوئے کہا کہ میں ایسا کر ہی نہیں پاؤں گی کیونکہ میں بہت مذہبی شخصیت کی مالک ہوں۔اُنہوں نے کہا کہ میں 5 وقت کی نماز پڑھتی ہوں اور اب میں نے روزے بھی رکھنا شروع کر دیے ہیں تو مجھے نہیں لگتا کہ میں کسی دوسرے مذہب سے تعلق رکھنے والے آدمی سے شادی کر سکوں گی۔محبت کے حوالے سے بات کرتے ہوئے ریم شیخ نے کہا کہ میرے پاس محبت پر یقین نہ کرنے کی وجوہات ہیں کیونکہ میں نے اپنے گھر میں طلاق دیکھی ہے، میں نے اپنے آس پاس رشتوں کو ٹوٹتے ہوئے دیکھا ہے، میرے پاس محبت پر یقین نہ کرنے کی ہر وجہ ہے۔انہوں نے مزید کہا کہ خدا سے جڑنے کے لیے بھی آپ کو محبت کی ضرورت ہے، اگر محبت نہیں ہے تو آپ خدا کے ساتھ یا اپنے آس پاس کے لوگوں کے ساتھ رشتہ نہیں بنا پائیں گے۔واضح رہے اداکارہ کا ایک ایسے خاندان سے تعلق ہے جہاں ان کی والدہ ہندو اور والد مسلمان ہیں۔