مریم نواز کی تنقید پنجاب اے آئی دور میں، خیبرپختونخوا پتھر کے دور میں ہے، وزیراعلیٰ پنجاب

وزیراعلیٰ پنجاب مریم نواز نے کہا ہے کہ پنجاب مصنوعی ذہانت (اے آئی) کے دور میں داخل ہو رہا ہے، جبکہ خیبرپختونخوا پتھر کے دور میں ہے۔ ان کا کہنا تھا کہ پاکستان تحریک انصاف نے عوام کو شعور دینے کے دعوے کیے، لیکن اس کی حکومت نے عوام کی زندگیاں تباہ کر دیں۔
ساہیوال میں طلبہ میں لیپ ٹاپ تقسیم کرنے کی تقریب سے خطاب کرتے ہوئے مریم نواز نے کہا کہ پی ٹی آئی کی حکومت کسی نے ختم نہیں کی بلکہ اس نے خود اپنی حکومت ختم کی۔ انہوں نے کہا کہ یہ پہلا لانگ مارچ ہے جو اپنی ہی حکومت کے خاتمے پر ختم ہوا۔ ان کے بقول، ایسا پہلے کبھی نہیں دیکھا گیا کہ ایک صوبہ دوسرے صوبے یا وفاق پر حملہ آور ہو جائے۔
وزیراعلیٰ پنجاب نے کہا کہ اب خیبرپختونخوا کے عوام کو معلوم ہوگا کہ ترقی کسے کہتے ہیں۔ انہوں نے دعویٰ کیا کہ وہ خدمت کے جذبے کے ساتھ میدان میں آئی ہیں اور نواز شریف نے ملک میں موٹرویز کا جال بچھایا۔ ان کا کہنا تھا کہ دوسرے صوبوں سے آنے والے افسران بھی پنجاب کے محکموں میں عوامی سہولت اور توجہ کو سراہتے ہیں۔
مریم نواز نے بتایا کہ پنجاب میں 3 ہزار الیکٹرک بسیں چلائی جائیں گی اور ان کا کرایہ 20 روپے برقرار رکھا گیا ہے۔ ان کے مطابق صوبے کی تمام تحصیلوں میں الیکٹرک بسیں چلانے کا منصوبہ ہے، جبکہ نوجوانوں کو مختلف ترقیاتی منصوبوں میں شامل کیا جا رہا ہے۔ انہوں نے کہا کہ طلبہ کو فراہم کی جانے والی الیکٹرک اسکوٹیز کی ماہانہ قسط 3 ہزار روپے رکھی گئی ہے تاکہ ان پر مالی بوجھ نہ پڑے۔
انہوں نے مزید کہا کہ پنجاب میں مصنوعی ذہانت کی لیبارٹریاں قائم کی جا رہی ہیں اور صوبہ جدید ٹیکنالوجی کی جانب بڑھ رہا ہے۔ مریم نواز کے مطابق وزیراعلیٰ بننے کے وقت انہیں معلوم ہوا کہ 80 فیصد جامعات میں وائس چانسلرز تعینات نہیں تھے، تاہم اب جامعات میں میرٹ کی بنیاد پر وائس چانسلرز مقرر کیے گئے ہیں۔
وزیراعلیٰ پنجاب نے کہا کہ وہ اپنے گھر سے آنے والی سفارش بھی قبول نہیں کرتیں اور ان کا مشن عوام کو ان کی دہلیز پر سہولتیں فراہم کرنا ہے۔ انہوں نے بتایا کہ پنجاب میں ادویات مریضوں کے گھروں تک پہنچائی جا رہی ہیں تاکہ شہریوں کو علاج معالجے کی سہولت حاصل کرنے میں آسانی ہو۔