دو گواہوں نے انمول عرف پنکی کو شناخت کر لیا

کراچی میں منشیات فروشی میں سہولت کاری کے مقدمے میں پراسیکیوشن کے دو گواہوں نے ملزمہ انمول عرف پنکی کو شناخت کر لیا۔ کیس کی سماعت ایڈیشنل ڈسٹرکٹ اینڈ سیشن کورٹ میں ہوئی، جہاں ملزمہ کو ویڈیو لنک کے ذریعے پیش کیا گیا۔
گواہوں میں لیڈی کانسٹیبل سونیا اشرف اور تفتیشی افسر منصور شامل ہیں۔ لیڈی کانسٹیبل سونیا اشرف نے عدالت کو بتایا کہ ملزمہ کو گارڈن کے علاقے سے گرفتار کیا گیا تھا۔
سرکاری وکیل شکیل عباسی کے مطابق، کال ڈیٹا ریکارڈ (سی ڈی آر) سے ظاہر ہوتا ہے کہ ملزمہ مبینہ طور پر منشیات فروشوں سے رابطے میں تھی۔ پراسیکیوشن کا مؤقف ہے کہ منشیات سپلائی کرنے والے افراد ملزمہ کی فراہم کردہ لوکیشن پر منشیات پہنچاتے تھے۔ ملزمہ کے خلاف انسدادِ دہشت گردی کے محکمے (سی ٹی ڈی) نے 2018 میں مقدمہ درج کیا تھا۔