قنطاس کی روم سے پرتھ جانے والی پرواز منسوخ، مسافروں کو متبادل پروازوں پر منتقل کر دیا گیا

آسٹریلیا کی فضائی کمپنی قنطاس کی روم سے پرتھ جانے والی پرواز طیارے میں کھٹملوں کی موجودگی اور مسافروں کو کاٹنے کی شکایات کے باعث منسوخ کر دی گئی، جس کے نتیجے میں مسافروں کو مشکلات کا سامنا کرنا پڑا۔
رپورٹس کے مطابق 9 اکتوبر کو پرتھ سے روم جانے والی تقریباً 17 گھنٹے طویل پرواز کے دوران اکانومی کلاس میں سفر کرنے والے بعض مسافروں نے کھٹملوں کے کاٹنے کی شکایت کی تھی۔ واقعے کے بعد روم پہنچنے پر بوئنگ 787 طیارے کو سروس سے ہٹا کر مکمل صفائی اور جراثیم کش کارروائی کے لیے بھیج دیا گیا۔
اس صورتحال کے باعث 10 اکتوبر کو روم سے پرتھ جانے والی واپسی کی پرواز منسوخ کرنا پڑی۔ قنطاس نے اس واقعے پر مسافروں سے معذرت کرتے ہوئے بتایا کہ انجینئرز اور مینٹیننس ٹیم نے طیارے کی گہری صفائی کی تاکہ کھٹملوں کی موجودگی کے مسئلے کو دور کیا جا سکے۔
ایئرلائن کے مطابق متاثرہ مسافروں کے لیے رہائش کا انتظام کیا گیا اور انہیں 48 گھنٹوں کے اندر متبادل پروازوں کے ذریعے اپنی منزل تک پہنچانے کے انتظامات کیے گئے۔
ماہرین کے مطابق کھٹمل کپڑوں، سفری سامان اور دیگر ذاتی اشیا کے ذریعے طیاروں میں پہنچ سکتے ہیں اور نشستوں کی درزوں میں چھپ سکتے ہیں۔ ان کے کاٹنے سے جلد پر خارش اور سوجن ہو سکتی ہے، تاہم یہ کیڑے عام طور پر انسانوں میں بیماری منتقل کرنے کے لیے معروف نہیں ہیں۔
قنطاس کا کہنا ہے کہ طیاروں کی باقاعدگی سے صفائی کی جاتی ہے، جبکہ احتیاطی تدابیر کے طور پر ہر 50 دن بعد جراثیم کش کارروائی بھی کی جاتی ہے۔ اس واقعے کے بعد طیارے کی صفائی اور دیکھ بھال کے اقدامات پر توجہ مزید بڑھ گئی ہے۔