پاکستان سے فوربس ایشیا تک، ہانیہ عامر کی شاندار اڑان

پاکستان کی مقبول اداکارہ ہانیہ عامر نے ایک اور اہم سنگِ میل عبور کرلیا ہے۔ ہانیہ عامر کو معروف کاروباری اور عالمی جریدے فوربس کی ’’30 انڈر 30 ایشیا 2026‘‘ فہرست میں شامل کرلیا گیا ہے، جہاں انہیں انٹرٹینمنٹ اور اسپورٹس کیٹیگری میں نمایاں مقام حاصل ہوا ہے۔
فوربز کی جانب سے ہر سال جاری کی جانے والی یہ فہرست ایشیا بھر کے اُن نوجوان افراد کو خراجِ تحسین پیش کرتی ہے جن کی عمر 30 برس سے کم ہو اور جنہوں نے اپنے شعبوں میں نمایاں کامیابیاں حاصل کی ہوں۔ اس سال کی فہرست میں ہانیہ عامر کے ساتھ پاکستانی فلم ساز سمن کامران کا نام بھی شامل کیا گیا ہے۔
ہانیہ عامر گزشتہ ایک دہائی کے دوران پاکستانی ڈرامہ انڈسٹری کی صفِ اول کی اداکاراؤں میں اپنی جگہ بنا چکی ہیں۔ حال ہی میں وہ 2 کروڑ سے زائد فالوورز کے ساتھ انسٹاگرام پر پاکستان کی سب سے زیادہ فالو کی جانے والی خاتون شخصیت بن گئی ہیں، جو ان کی مقبولیت کا واضح ثبوت ہے۔
دوسری جانب فلم ساز سمن کامران کو بھی فوربس کی اس باوقار فہرست میں جگہ ملی ہے۔ ان کے کام کا محور عموماً سماجی اور ماحولیاتی مسائل ہوتے ہیں۔ ان کی مختصر فلم The Bed She Made پاکستان کی واحد فلم تھی جسے بوسن انٹرنیشنل شارٹ فلم فیسٹیول کے لیے منتخب کیا گیا، جہاں فلم میں پاکستان میں موسمیاتی تبدیلی اور تولیدی صحت سے متعلق مسائل کو اجاگر کیا گیا تھا۔ سمن اس سے قبل فلم ’’عمرو عیار: ایک نئی شروعات‘‘ میں اسسٹنٹ ڈائریکٹر کے طور پر بھی خدمات انجام دے چکی ہیں۔