چین میں ایک شہری کے مثانے سے 1.3 کلو وزنی پتھری نکال لی گئی۔غیر ملکی خبر رساں ادارے کے مطابق تین سال قبل چین کے مغربی صوبے گوانگ ڈونگ کے قصبے لانگ تانگ کے ایک کسان کو پیشاب کرنے میں بار بار مشکل کا سامنا کرنا پڑرہا تھا حتیٰ کہ اسے رفع حاجت کے لیے اپنی پوزیشن بدلنی پڑتی کبھی تکلیف انتہائی بڑھ جاتی اور درد بھی ہونے لگتا۔شروع میں چن نے ان علامات کو عام پروسٹیٹ کے مسئلہ سمجھ کر نظرانداز کیا۔ وہ کھیتوں کے کام سے چھٹی نہیں لینا چاہتا تھا اور اسے لگتا تھا کہ دواؤں سے درد قابو میں رہے گا۔ مگر وقت گزرنے کے ساتھ حالت بگڑتی گئی۔ وہ گھر سے دور جانے سے گھبرانے لگا کہ اس کو کہیں اچانک رفع حاجت محسوس نہ ہو اور اس تکلیف کی وجہ سے اس کو رات بھر کئی کئی بار اٹھنا پڑتا۔بالآخر گھر والوں کے اصرار پر وہ اسپتال جانے پر راضی ہوگیا جہاں معائنے کے بعد اس پر انکشاف ہوا کہ اس کے مثانے میں اتنی بڑی پتھری موجود تھی کہ پیشاب بمشکل ہی گزر پاتا تھا۔شعبہ یورولوجی کے ڈپٹی چیف فزیشن لِن یوان کے مطابق یہ اس کے مثانے کی پتھری 10 سینٹی میٹر چوڑی، 13 سینٹی میٹر لمبی اور تقریباً 1.3 کلوگرام وزنی تھی۔اس شخص کے درمیانی جسم کے ایکسرے میں صاف دکھائی دیا کہ یہ خوفناک پتھری مثانے کی زیادہ تر جگہ گھیر چکی تھی۔ ڈاکٹروں نے خبردار کیا کہ مثانے کی دیواروں پر مسلسل دباؤ کی وجہ سے یہ صورتحال اس کی جان کے لیے بھی خطرناک ثابت ہوسکتی تھی

چین کے شمالی صوبے شانشی میں کوئلے کی کان میں ہونے والے ہولناک گیس دھماکے میں کم از کم 90 افراد ہلاک جبکہ 9 تاحال لاپتا ہیں۔ یہ گزشتہ 17 برسوں میں چین کا سب سے بڑا کان کنی حادثہ قرار دیا جا رہا ہے۔
چینی سرکاری خبر رساں ادارے کے مطابق دھماکا جمعے کی شام 7 بج کر 29 منٹ پر ’’لیوشین یو‘‘ کوئلہ کان میں ہوا، اس وقت کان کے اندر 247 مزدور موجود تھے۔
ریسکیو اہلکاروں نے بیشتر مزدوروں کو ہفتے کی صبح تک باہر نکال لیا، تاہم 90 افراد جان کی بازی ہار گئے جبکہ 9 مزدوروں کی تلاش جاری ہے۔ امدادی کارروائیوں کے لیے 345 اہلکار تعینات کیے گئے۔
سرکاری ٹی وی سی سی ٹی وی کی جانب سے جاری ویڈیو میں ہیلمٹ پہنے ریسکیو اہلکاروں کو اسٹریچر اٹھائے دیکھا گیا جبکہ پس منظر میں ایمبولینسیں بھی موجود تھیں۔
چینی صدر شی جن پنگ نے زخمیوں کے علاج کے لیے ’’ہر ممکن کوشش‘‘ کرنے کی ہدایت دیتے ہوئے واقعے کی مکمل تحقیقات کا حکم دیا۔ انہوں نے کہا کہ تمام ادارے اس حادثے سے سبق سیکھیں اور کام کی جگہوں پر حفاظتی اقدامات یقینی بنائیں تاکہ مستقبل میں ایسے بڑے سانحات سے بچا جا سکے۔
سرکاری میڈیا کے مطابق دھماکے میں ملوث کمپنی کے ایک ذمہ دار شخص کو قانون کے مطابق تحویل میں لے لیا گیا ہے۔
ابتدائی اطلاعات میں بتایا گیا تھا کہ کان میں کاربن مونو آکسائیڈ گیس کی خطرناک حد تک موجودگی کے باعث کئی مزدور پھنس گئے تھے، جن میں بعض کی حالت تشویشناک تھی۔ بعد ازاں ہلاکتوں کی تعداد میں تیزی سے اضافہ ہوا۔
شانشی صوبہ چین میں کوئلہ کان کنی کا اہم مرکز سمجھا جاتا ہے۔ اگرچہ گزشتہ برسوں میں چین میں کانوں کی حفاظت کے اقدامات بہتر ہوئے ہیں، تاہم ناقص حفاظتی انتظامات اور کمزور نگرانی کے باعث ایسے حادثات اب بھی پیش آتے رہتے ہیں۔
اس سے قبل 2023 میں چین کے علاقے اندرونی منگولیا میں ایک اوپن پٹ کوئلہ کان گرنے سے 53 افراد ہلاک ہو گئے تھے۔

امریکی میڈیا چینلز بشمول ’سی بی ایس‘ اور ’ایکسیوس‘ نے رپورٹ کیا ہے کہ امریکی صدر ڈونلڈ ٹرمپ نے موجودہ ملکی حالات اور ہنگامی صورتحال کے پیش نظر رواں ہفتے کے آخر میں ہونے والی اپنے بیٹے کی شادی کی تقریب میں بھی شرکت نہ کرنے کا فیصلہ کیا ہے۔میں بھی شرکت نہ کرنے کا فیصلہ کیا ہے۔
یہ خبریں ایسے وقت میں سامنے آئی ہیں جب پاکستان کی جانب سے دونوں ممالک کے درمیان جاری جنگ کو رکوانے اور ایک پائیدار امن معاہدہ طے کرانے کے لیے سفارتی کوششیں آخری مراحل میں داخل ہو چکی ہیں اور پاکستان کے آرمی چیف فیلڈ مارشل عاصم منیر مذاکرات کے لیے تہران میں موجود ہیں۔
امریکی صدر ڈونلڈ ٹرمپ نے اپنی مصروفیت اور وائٹ ہاؤس میں موجودگی کی اہمیت کو واضح کرتے ہوئے سوشل میڈیا پر ایک بیان جاری کیا ہے۔
اپنے بیٹے کی شادی میں نہ جانے کی وجہ بتاتے ہوئے صدر ڈونلڈ ٹرمپ نے کہا کہ ”حکومت سے متعلقہ حالات اور اپنے ملک امریکا کے لیے میری محبت کے باعث میں اس تقریب میں شریک نہیں ہو پا رہا، اور اس اہم ترین وقت کے دوران میرے لیے واشنگٹن ڈی سی میں وائٹ ہاؤس کے اندر ہی موجود رہنا انتہائی ضروری ہے۔“
اس بیان کے فوراً بعد وائٹ ہاؤس نے صدر کے دیگر پروگرام بھی منسوخ کر دیے جس کے تحت اب وہ نیو جرسی میں واقع اپنے گالف ریزورٹ بھی نہیں جائیں گے۔
نیویارک کے ایک دورے سے واپسی پر صدر ٹرمپ نے صحافیوں کے سوالات کے جوابات دینے سے بھی گریز کیا جو کہ ان کا معمول کا طریقہ کار نہیں ہے۔
دوسری جانب امریکی دفاعی اور انٹیلی جنس اداروں میں اس وقت شدید ہلچل مچ چکی ہے۔
‘سی بی ایس نیوز‘ نے اپنی رپورٹ میں گمنام ذرائع کے حوالے سے بتایا ہے کہ امریکی فوج اور خفیہ ایجنسیوں کے اعلیٰ حکام اور اہلکاروں نے ممکنہ حملوں کی تیاریوں اور ہائی الرٹ کے باعث اپنی چھٹیاں منسوخ کر دی ہیں اور انہیں وائٹ ہاؤس سے کسی بھی وقت حتمی حکم ملنے کا امکان ہے۔

عیدالاضحیٰ کی آمد کے ساتھ ہی ملک بھر میں مویشی منڈیوں کی رونقیں بڑھ گئی ہیں اور لوگ قربانی کے جانور خریدنے میں مصروف ہیں۔ ماہرینِ ویٹرنری کے مطابق اس موسم میں جانوروں کی مناسب دیکھ بھال، صفائی اور بیماریوں سے بچاؤ نہ صرف جانور کی صحت بلکہ انسانی صحت کے لیے بھی بے حد ضروری ہوتا ہے۔ خاص طور پر منہ اور کھر کی بیماری، لمپی اسکن ڈیزیز اور دیگر وبائی امراض کے خدشات کے باعث احتیاطی تدابیر اختیار کرنا وقت کی اہم ضرورت قرار دیا جا رہا ہے۔ماہرین کا کہنا ہے کہ قربانی کے جانور خریدتے وقت اس بات کا خاص خیال رکھا جائے کہ جانور چست، متحرک اور صحت مند ہو۔ بیمار جانور عموماً سست، کمزور، بے چین اور خوراک کم کھانے والے ہوتے ہیں جبکہ ان کے منہ، ناک یا آنکھوں سے رطوبت بھی خارج ہوسکتی ہے۔ منہ اور کھر کی بیماری یعنی فُٹ اینڈ ماؤتھ ڈیزیز ایک انتہائی متعدی وائرل بیماری ہے جو گائے، بکری، بھیڑ اور بھینس جیسے دو کھروں والے جانوروں میں تیزی سے پھیلتی ہے۔ اس بیماری میں جانور کے منہ میں چھالے، بخار اور کھروں میں زخم بن جاتے ہیں جس کی وجہ سے جانور چلنے اور کھانے میں دشواری محسوس کرتا ہے۔ویٹرنری ماہرین کے مطابق متاثرہ جانور کو فوری طور پر دوسرے جانوروں سے الگ کرنا چاہیے تاکہ بیماری مزید نہ پھیلے۔ جانوروں کے باڑے، پانی کے برتن اور جگہ کی صفائی کا خاص خیال رکھنا ضروری ہے جبکہ نئی خریداری کے بعد جانور کو چند دن الگ رکھنا بھی مفید سمجھا جاتا ہے۔ عالمی ادارہ برائے حیوانی صحت کے مطابق بیماری پر قابو پانے کے لیے ویکسینیشن، نقل و حرکت پر کنٹرول اور بائیو سیکیورٹی اقدامات انتہائی مؤثر ہوتے ہیں۔اسی طرح لمپی اسکن ڈیزیز بھی حالیہ برسوں میں پاکستان سمیت کئی ممالک میں مویشیوں کے لیے خطرہ بنی رہی ہے۔ اس بیماری میں جانور کی جلد پر گلٹیاں اور زخم نمودار ہوتے ہیں جبکہ بخار اور کمزوری بھی پیدا ہوسکتی ہے۔ ماہرین کے مطابق مکھیاں، مچھر اور دیگر کیڑے اس بیماری کو پھیلانے میں اہم کردار ادا کرتے ہیں، اس لیے جانوروں کے اردگرد صفائی، اسپرے اور جراثیم کش ادویات کا استعمال ضروری ہے۔ویٹرنری ڈاکٹرز شہریوں کو مشورہ دے رہے ہیں کہ جانوروں کو سخت دھوپ میں زیادہ دیر کھڑا نہ رکھا جائے، انہیں صاف پانی، سبز چارہ اور متوازن خوراک دی جائے۔ باسی یا آلودہ چارہ جانور کی صحت خراب کرسکتا ہے۔ اس کے علاوہ جانوروں کو غیر ضروری طور پر ہجوم میں لے جانے سے بھی گریز کیا جائے کیونکہ وبائی بیماریاں تیزی سے منتقل ہوسکتی ہیں۔ماہرین کا کہنا ہے کہ اگر کسی جانور میں بخار، منہ سے رال بہنا، کھانے سے انکار، جلد پر گلٹیاں یا چلنے میں دشواری جیسی علامات ظاہر ہوں تو فوری طور پر ویٹرنری ڈاکٹر سے رجوع کیا جائے۔ بروقت تشخیص اور احتیاطی اقدامات نہ صرف قیمتی جانوروں کو بچا سکتے ہیں بلکہ عیدالاضحیٰ کے دوران بیماریوں کے پھیلاؤ کو بھی روکنے میں مددگار ثابت ہوسکتے ہیں