تیونس اور ترکیہ میں اسلامی مہینے ذوالحجہ کا چاند نظر آنے کی تصدیق ہو گئی ہے، جس کے بعد دونوں ممالک نے پیر 18 مئی کو یکم ذوالحجہ اور بدھ 27 مئی کو عید الاضحیٰ منانے کا باضابطہ اعلان کر دیا ہے۔
رپورٹ کے مطابق تیونس ذوالحجہ کے آغاز کا باقاعدہ اعلان کرنے والا پہلا ملک بن گیا ہے جہاں ہفتہ 16 مئی کو ذوالقعدہ کی 29 تاریخ قرار دی گئی تھی اور چاند کی تصدیق کی گئی۔
دوسری جانب ترکیہ نے بھی پیر 18 مئی کو یکم ذوالحجہ قرار دیا ہے۔ واضح رہے کہ ترکیہ میں چاند دیکھنے کے روایتی طریقے کے بجائے فلکیاتی حساب کتاب پر مبنی پہلے سے تیار کردہ اسلامی کیلنڈر کی پیروی کی جاتی ہے جس کے تحت یہ تاریخ طے کی گئی ہے۔
سعودی عرب، متحدہ عرب امارات (یو اے ای) اور عمان سمیت دیگر بیشتر اسلامی ممالک میں اتوار 17 مئی کی شام ذوالحجہ کا چاند دیکھنے کی تیاریاں کی جا رہی ہیں، جہاں حکام اتوار کی شام چاند کی رویت کے بعد عید الاضحیٰ کی تاریخوں کا باضابطہ اعلان کریں گے۔

اکثر افراد یہ سوچتے رہتے ہیں کہ نہانے کا بہترین وقت آخر کون سا ہے، صبح سویرے، دن کے آغاز میں یا رات کو سونے سے پہلے؟ اب ماہرینِ صحت نے اس سوال پر اہم تحقیقاتی روشنی ڈال دی ہے۔امریکی ماہرین کی ایک رپورٹ، جو معروف طبی ویب سائٹ ’’ویری ویل ہیلتھ‘‘ میں شائع ہوئی، کے مطابق اگر کوئی شخص سونے سے ایک یا دو گھنٹے قبل نیم گرم پانی سے غسل کرے تو اسے نہ صرف جلد نیند آتی ہے بلکہ نیند زیادہ پرسکون اور گہری بھی ہوتی ہے۔ماہرین کا کہنا ہے کہ انسانی جسم کا درجہ حرارت دن کے اوقات میں بلند رہتا ہے جبکہ رات کے وقت قدرتی طور پر کم ہونا شروع ہوتا ہے، جو دماغ کو آرام اور نیند کا اشارہ دیتا ہے۔ نیم گرم پانی سے نہانا اس قدرتی عمل کو مزید تیز کر دیتا ہے، جس کے نتیجے میں جسم ٹھنڈا ہو کر بہتر نیند کے لیے تیار ہو جاتا ہے۔تحقیق میں یہ بھی واضح کیا گیا کہ رات کے وقت صرف دس منٹ کا نیم گرم غسل بھی جسمانی سکون، ذہنی آرام اور بہتر نیند کے معیار میں نمایاں مدد دے سکتا ہے۔دوسری جانب صبح کے وقت نہانے کے بھی اپنے فوائد ہیں۔ صبح کا غسل جسم کو تازگی بخشتا ہے، جلد کی صفائی بہتر کرتا ہے اور دن بھر کے لیے توانائی فراہم کرتا ہے۔ خاص طور پر اگر کوئی شخص صبح ورزش کرتا ہے تو نہانا مزید ضروری ہو جاتا ہے۔ماہرین کا مشورہ ہے کہ اگر آپ کو نیند میں دشواری، صبح کی سستی یا روزمرہ تناؤ کا سامنا رہتا ہے تو رات کے وقت نہانے کی عادت اپنانا آپ کی جسمانی اور ذہنی صحت کے لیے زیادہ فائدہ مند ثابت ہو سکتا ہے

وزن میں کمی کے لیے دنیا بھر میں مقبول ہونے والی ’’انٹرمیٹنٹ فاسٹنگ‘‘ یعنی ’وقفے وقفے سے فاقہ‘ کرنے کی غذائی حکمت عملی سے متعلق نئی تحقیق نے اہم انکشاف کیا ہے کہ یہ طریقہ ہر فرد کے لیے یکساں فائدہ مند نہیں، اور صرف کھانے کے اوقات محدود کرنا وزن گھٹانے یا میٹابولزم بہتر بنانے کی ضمانت نہیں۔ماہرین کے مطابق انٹرمیٹنٹ فاسٹنگ کی مختلف اقسام، جیسے 16:8 ڈائٹ یا 5:2 پلان، اس بنیاد پر مقبول ہیں کہ مخصوص وقت یا دنوں میں کھانے کی مقدار محدود کی جائے۔ اسی طرح ٹائم ریسٹرکٹڈ ایٹنگ (TRE) میں روزانہ کھانے کو 10 گھنٹے یا اس سے کم دورانیے تک محدود رکھا جاتا ہے، جبکہ باقی وقت فاقہ کیا جاتا ہے۔تاہم جرمن انسٹی ٹیوٹ آف ہیومن نیوٹریشن کی نئی تحقیق کے مطابق صرف کھانے کے اوقات بدلنے سے صحت میں نمایاں بہتری نہیں آتی، جب تک مجموعی کیلوریز میں کمی نہ کی جائے۔ تحقیق میں زائد الوزن یا موٹاپے کا شکار 31 خواتین کو شامل کیا گیا، جنہوں نے مختلف اوقات پر مبنی دو الگ الگ TRE شیڈولز پر عمل کیا۔ایک شیڈول میں شرکاء نے صبح 8 بجے سے شام 4 بجے تک کھانا کھایا، جبکہ دوسرے میں دوپہر 1 بجے سے رات 9 بجے تک۔ دونوں صورتوں میں دی جانے والی غذا تقریباً ایک جیسی تھی اور اس میں کیلوریز اور غذائیت کی مقدار برابر رکھی گئی۔تحقیق کے دوران خون کے نمونے، جسمانی ردعمل اور اندرونی حیاتیاتی گھڑی یعنی سرکیڈین ردھم کا تفصیلی جائزہ لیا گیا۔ نتائج سے معلوم ہوا کہ اگرچہ کھانے کے اوقات جسمانی گھڑی پر اثرانداز ہوتے ہیں، مگر انسولین حساسیت، بلڈ شوگر، خون میں چربی یا سوزش کے اشاریوں میں کوئی نمایاں طبی بہتری سامنے نہیں آئی۔تحقیق کی سربراہ پروفیسر اولگا رامخ کے مطابق وزن کم کرنے یا میٹابولزم بہتر بنانے کے لیے صرف وقت نہیں بلکہ توانائی کے توازن، یعنی کیلوریز کی مجموعی مقدار، بنیادی کردار ادا کرتی ہے۔ ان کا کہنا تھا کہ ابتدائی مطالعات میں نظر آنے والے فوائد غالباً غیر ارادی کیلوری کمی کا نتیجہ تھے، نہ کہ صرف کھانے کا دورانیہ محدود کرنے کا۔ماہرین نے اس بات پر بھی زور دیا کہ ہر فرد کا جسمانی نظام، جینیاتی ساخت اور روزمرہ حیاتیاتی ترجیحات مختلف ہوتی ہیں، اس لیے انٹرمیٹنٹ فاسٹنگ کے اثرات بھی سب پر یکساں نہیں ہو سکتے

اکثر لوگ لیموں استعمال کرتے ہوئے اس کے بیج ضائع کر دیتے ہیں، مگر بعض ماہرین غذائیت کے مطابق یہ بیج بھی کئی طبی فوائد رکھتے ہیں۔لیموں کے بیجوں میں اینٹی آکسیڈنٹس، وٹامن سی، امینو ایسڈز، پروٹین، قدرتی چکنائی وغیرہ پائی جاتی ہے۔لیموں کے بیج جسم سے زہریلے مادے خارج کرنے، درد میں کمی، جلد کی حفاظت، مہاسوں کے علاج، اینٹی بیکٹیریل اثرات، خوشبو کے ذریعے موڈ بہتر بنانے میں معاون سمجھے جاتے ہیں۔قدرتی علاج کے بعض ماہرین کے مطابق پسے ہوئے لیموں کے بیج مخصوص طریقے سے استعمال کیے جائیں تو بچوں میں پیٹ کے کیڑوں کے خاتمے میں مدد دے سکتے ہیں۔ماہرین خبردار کرتے ہیں کہ آنتوں کے مریض، قبض کے شکار افراد، بدہضمی والے افراد لیموں کے بیج استعمال کرتے وقت احتیاط برتیں، کیونکہ بعض صورتوں میں یہ نقصان دہ بھی ہو سکتے ہیں۔لیموں کی طرح اس کے بیج بھی بعض فوائد رکھتے ہیں، تاہم انہیں بطور علاج استعمال کرنے سے پہلے طبی مشورہ لینا بہتر ہے تاکہ ممکنہ نقصانات سے بچا جا سکے۔