چارسدہ میں شیخ الحدیث مولانا محمد ادریس پر حملہ کرنے والے نیٹ ورک کے بارے تفتیشی ٹیموں نے سراغ لگا لیا گیا اور سی سی ٹی وی کیمروں کی مدد سے مبینہ حملہ آوروں کی تصاویر بھی حاصل کر لی گئی ہیں۔آئی جی خیبرپختونخوا ذوالفقار حمید نے بتایا کہ ابتدائی شواہد کے مطابق واقعہ ٹارگٹ کلنگ ہے، ملوث عناصر کو جلد انجام تک پہنچایا جائے گا۔مولانا شیخ ادریس کے قتل کے واقعے کی تفتیش کنے والے حکام کے مطابق محکمہ انسداد دہشت گردی (سی ٹی ڈی) اور مقامی پولیس کی جوائنٹ انوسٹیگیشن ٹیم نے حاصل فوٹیج سے اہم مواد کا جائزہ لیا اور واردات میں ملوث 4 میں سے ایک دہشت گرد کی نشان دہی ہوگئی۔تفتیشی حکام نے بتایا کہ دہشت گرد کی نشان دہی سی سی ٹی وی کیمروں کے ذریعے ہوئی، دہشت گرد کا تعلق افغانستان سے ہے اور جس دہشت گرد کی نشان دہی ہوئی اس کے ذریعے مکمل نیٹ ورک کا سراغ لگایا جا رہا ہے۔تفتیشی حکام نے مزید کہا کہ ابتدائی تفتیش میں لگ رہا ہے یہ منصوبہ بندی افغانستان میں ہوئی ہے۔جید عالم دین مولانا محمد ادریس پر آج صبح تقریباً آٹھ بج کر دس منٹ پر تھانہ اتمانزئی (چارسدہ) کی حدود میں حملہ کیا تھا جہاں نامعلوم دو موٹر سائیکل سوار4 دہشت گردوں نے مولانا کی گاڑی پر اندھا دھند فائرنگ کی تھی اور واقعے کے فوری بعد مولانا ادریس اور دونوں زخمی کانسٹیبلز کو اسپتال منتقل کیا گیا۔مولانا محمد ادریس اسپتال منتقلی کے دوران راستے میں ہی زخموں کی تاب نہ لاتے ہوئے جام شہادت نوش کر گئے تاہم زخمی کانسٹیبلز کو طبی امداد فراہم کی جا رہی ہے۔واقعے کی اطلاع ملتے ہی ضلعی پولیس اور محکمہ انسداد دہشت گردی (سی ٹی ڈی) کی ٹیمیں جائے وقوع پر پہنچ گئیں، علاقے کو گھیرے میں لے کر سرچ آپریشن شروع کر دیا گیا ہے۔پولیس کے مطابق سیف سٹی کیمروں کی مدد سے حملہ آوروں کی شناخت کے حوالے سے اہم پیش رفت ہوئی ہے اور ملزمان کی تصاویر حاصل کر لی گئی ہیں جن کی بنیاد پر ٹیمیں مختلف مقامات پر چھاپے مار رہی ہیں۔پولیس نے مزید بتایا کہ ابتدائی تحقیقات کے مطابق یہ ایک منظم ٹارگٹ کلنگ کا واقعہ ہے۔آئی جی خیبر پختونخوا ذوالفقار حمید نے واقعے کا فوری نوٹس لیتے ہوئے اعلیٰ سطح کی تحقیقاتی ٹیمیں تشکیل دے دی ہیں جو جدید سائنسی خطوط پر کام کر رہی ہیں۔انہوں نے اس عزم کا اعادہ کیا کہ ان سفاک قاتلوں اور ان کے سہولت کاروں کو بہت جلد قانون کے کٹہرے میں کھڑا کیا جائے گا اور علاقے میں امن و امان کی صورت حال کو برقرار رکھا جائے گا۔

بھارت کے مبینہ آپریشن سندور اور اس کے جواب میں پاکستان کے آپریشن بنیان المرصوص کو ایک سال مکمل ہونے پر پاکستان نے سوشل میڈیا پر ایسا طنزیہ وار کیا کہ صارفین بھی ہنسی نہ روک سکے۔سماجی رابطے کی سائٹ ’’ایکس‘‘ پر پاکستان ریلوے کی جانب سے شیئر کی گئی وائرل میمز تصویر میں ایک مسکراتی ہوئی سبز ٹرین کو نمایاں دکھایا گیا ہے، جبکہ ساتھ ہی پٹڑی کے کنارے بھارتی فضائیہ کے تباہ شدہ جنگی طیارے بکھرے پڑے ہیں۔تصویر میں خاص طور پر گرائے گئے بھارتی رافیل اور دیگر جنگی جہازوں کی تباہی کو طنزیہ انداز میں پیش کیا گیا ہے۔رین کے اوپر درج جملہ سوشل میڈیا صارفین کے لیے فوری توجہ کا مرکز بن گیا، جس میں لکھا ہے کہ ’’ہمارے ساتھ سفر کریں، ہم رفتار میں شاید کم ہوں، لیکن ان سے زیادہ محفوظ ہیں۔‘‘یہ میمز نہ صرف پاکستان ریلوے کے روایتی سست رفتار تاثر پر خودساختہ مزاحیہ چوٹ ہے بلکہ بھارتی فضائیہ کے مبینہ نقصان پر بھی بھرپور طنز کرتی ہے۔ تصویر میں ٹرین کو دوستانہ، پرمزاح اور فاتحانہ انداز میں پیش کیا گیا ہے، جبکہ تباہ شدہ بھارتی طیارے بھارتی عسکری ناکامی کے استعارے کے طور پر دکھائے گئے ہیں۔

جے یو آئی سربراہ مولانا فضل الرحمان نے شیخ الحدیث، سابق ایم پی اے، رکن مرکزی مجلس شوریٰ جے یو آئی مولانا ادریس کی شہادت کی مذمت و افسوس کا اظہار کیا ہے۔مولانا فضل الرحمان نے اپنے بیان میں کہا کہ شیخ الحدیث مولانا ادریس کی شہادت کی خبر سے دل رنجیدہ ہے، مولانا ادریس نے اسلام اور پاکستان کے دفاع کی قیمت چکائی ہے۔ سفید ریش عالم دین کی شہادت قرآن وسنت اور پاکستان کی بات کرنے والوں پر حملہ ہے۔سربراہ جے یو آئی نے کہا کہ علماء پاکستان کے بے لوث نظریاتی محافظ ہیں لیکن ان کی حفاظت کا کوئی انتظام نہیں۔ مولانا ادریس شہید نے ہمیشہ امن کی بات کی، افسوس کہ آج وہ خود بدامنی کا شکار ہوگئے۔ مولانا ادریس بلند پایہ عالم، نکتہ داں واعظ اور مدبر سیاستدان تھے۔مولانا فضل الرحمان نے کہا کہ مولانا شہید کی پوری زندگی دین کی اشاعت وخدمت میں گزاری، مولانا شہید سے برسوں پر محیط اعتماد، شفقت اور دوستی کا دیرینہ تعلق تھا، سفاک ظالموں نے ہمیں مخلص دوست اور با وفا رہنما سے محروم کردیا۔مولانا فضل الرحمان نے کہا کہ مولانا دینی امور سمیت سیاسی معاملات میں صاحب الرائے اور دلیل کی بنیاد پر موقف رکھتے تھے، دارالعلوم حقانیہ کے درودیوار اور ہزاروں طلباء سمیت جے یو آئی کا ہر کارکن غمزدہ ہے، اللہ کریم مولانا کی شہادت کو قبول فرمائے اور ان کی خدمات کو ان کے لئے صدقہ جاریہ بنائے۔مولانا فضل الرحمان نے مطالبہ کیا کہ قاتلوں کو فوری گرفتار کرکے نشان عبرت بنایا جائے، لاقانونیت اور دہشت گردی حکومت کے منہ پر طمانچہ ہے۔

دنیا کے طاقتور اور کمزور ترین پاسپورٹس کی نئی فہرست جاری کر دی گئی ہے، جس کے مطابق سنگاپور بدستور پہلے نمبر پر موجود ہے جبکہ پاکستان کمزور ترین پاسپورٹس میں چوتھے نمبر پر شامل ہے۔
عالمی ادارے ہینلی پاسپورٹ انڈیکس کی تازہ درجہ بندی کے مطابق سنگاپور کے شہری دنیا کے 192 ممالک میں بغیر ویزا سفر کر سکتے ہیں، جو عالمی سطح پر سب سے زیادہ رسائی ہے۔
فہرست کے مطابق دوسرے نمبر پر جاپان، جنوبی کوریا اور متحدہ عرب امارات مشترکہ طور پر موجود ہیں، جہاں کے شہری 187 ممالک تک ویزا فری رسائی رکھتے ہیں۔ اس کے بعد ناروے اور سوئٹزرلینڈ 185 ممالک تک رسائی کے ساتھ نمایاں ہیں۔
رپورٹ کے مطابق یورپی ممالک مجموعی طور پر پاسپورٹ طاقت کے لحاظ سے سرفہرست ہیں، جبکہ یورپی یونین کا اوسط 183 ممالک تک ویزا فری رسائی بنتا ہے، جو ملائیشیا اور برطانیہ کے برابر ہے۔
دوسری جانب کمزور پاسپورٹس کی فہرست میں افغانستان سب سے نچلے نمبر پر ہے، جہاں کے شہری صرف 23 ممالک تک بغیر ویزا سفر کر سکتے ہیں۔ اس کے بعد شام دوسرے، عراق تیسرے اور پاکستان چوتھے نمبر پر موجود ہے۔
ماہرین کے مطابق کمزور پاسپورٹس کی بنیادی وجوہات میں سیاسی عدم استحکام، جنگی حالات، سیکیورٹی خدشات اور ہجرت کے بڑھتے رجحانات شامل ہیں، جو کسی بھی ملک کے شہریوں کی عالمی نقل و حرکت کو متاثر کرتے ہیں۔