انسانی جانوں کے محافظ، خطرے میں جان ڈالنے والوں کو سلام

ہر سال 4 مئی کو دنیا بھر میں انٹرنیشنل فائر فائٹرز ڈے منایا جاتا ہے، جس کا مقصد ان بہادر مردوں اور خواتین کو خراجِ تحسین پیش کرنا ہے جو اپنی جان ہتھیلی پر رکھ کر دوسروں کی زندگیاں بچاتے ہیں۔
یہ دن نہ صرف شہید فائر فائٹرز کی قربانیوں کو یاد کرنے کا موقع ہے بلکہ موجودہ فائر فائٹرز کی خدمات کو سراہنے کا عالمی پیغام بھی ہے۔
یہ دن 1999 میں آسٹریلیا میں جنگلاتی آگ کے دوران پانچ فائر فائٹرز کی المناک شہادت کے بعد متعارف کروایا گیا۔ 4 مئی کا انتخاب سینٹ فلورین کے دن کی مناسبت سے کیا گیا، جو فائر فائٹرز کے سرپرست بزرگ مانے جاتے ہیں۔ اس دن سرخ اور نیلے ربن پہن کر آگ اور پانی (فائر فائٹرز کے بنیادی عناصر) کی علامت کے طور پر اظہارِ یکجہتی کیا جاتا ہے۔
پاکستان، خصوصاً بڑے شہروں جیسے کراچی، لاہور اور اسلام آباد میں آتشزدگی کے واقعات ایک مستقل مسئلہ بن چکے ہیں۔ ناقص بلڈنگ قوانین، غیر معیاری وائرنگ، حفاظتی اقدامات کی کمی اور ہنگامی اخراج کے ناقص انتظامات اکثر بڑے سانحات کو جنم دیتے ہیں۔
کراچی میں ماضی میں بلدیہ ٹاؤن فیکٹری آتشزدگی، رہائشی عمارتوں میں آگ، صنعتی علاقوں کے حادثات اور مارکیٹوں میں لگنے والی تباہ کن آگ نے بارہا یہ ثابت کیا کہ پاکستان کو جدید فائر سیفٹی انفرااسٹرکچر کی اشد ضرورت ہے۔

پارٹی قیادت کو بڑا پیغام، اڈیالہ جیل میں اکٹھے ہونے کی ہدایت

بانی پی ٹی آئی عمران خان کی بہن علیمہ خان نے تمام پارٹی عہدیداروں اور رہنماؤں کو منگل کے روز اڈیالہ جیل پہنچنے کی ہدایت کی ہے۔
سماجی رابطے کی ویب سائٹ پر جاری بیان میں انہوں نے کہا کہ حکومت پر دباؤ بڑھانے کے لیے ایم این ایز، ایم پی ایز اور سینیٹرز کل اڈیالہ پہنچیں۔
انہوں نے مطالبہ کیا کہ بانی پی ٹی آئی عمران خان کے وکلاء اور اہل خانہ کی فوری ملاقات کروائی جائے اور انہیں طبی معائنے کے لیے شفا انٹرنیشنل اسپتال منتقل کیا جائے۔
اپنے بیان میں انہوں نے چیف جسٹس اسلام آباد ہائی کورٹ جسٹس سرفراز ڈوگر ڈوگر سے ضمانت درخواستوں پر فوری سماعت مقرر کرنے کا بھی کہا اور بانی پی ٹی آئی اور بشریٰ بی بی کی فوری رہائی کا مطالبہ کیا۔
علیمہ خان نے کہا کہ دونوں رہنماؤں کو تنہائی میں قید رکھنا انسانی حقوق کی خلاف ورزی ہے۔

ابدالی میزائل کی گونج: خطے میں طاقت کا توازن برقرار رکھنے کا عزم

بھارت کی گیدڑ بھبکیوں کے جواب میں پاکستان نے دفاعی صلاحیت کا مظاہرہ کر کے دشمن کو باز رہنے کی تنبیہ کی۔
گزشتہ سال 3 مئی کو پاکستان نے جنگی مشق انڈس کے تحت ابدالی میزائل سسٹم کے کامیاب تجربہ سے دشمن پر ہیبت طاری کر دی۔
ابدالی میزائل سسٹم زمین سے زمین تک مار کرنے اور 450 کلو میٹر تک ہدف کو نشانہ بنانے کی صلاحیت کا حامل ہے۔
ابدالی میزائل کے کامیاب تجربے سے پاکستان نے دشمن کے جارحانہ عزائم کو خاک میں ملانے کا دوٹوک پیغام دیا

پاکستان نے ابدالی میزائل سسٹم کے کامیاب تجربے سے اپنی دفاعی برتری اور تکنیکی مہارت کو عملی طور پر ثابت کیا۔
ابدالی میزائل کے تجربے کا مقصد افواج کی آپریشنل تیاریوں اور میزائل کے جدید نیوی گیشن سسٹم سمیت اہم تکنیکی پہلوؤں کو اجاگر کرنا تھا۔
عالمی دفاعی ماہرین کے مطابق پاکستان نے اپنے دفاعی نظام کی جانچ سے ہی بھارت کے فالس فلیگ جیسے ہتھکنڈوں کا منہ توڑ جواب دیکراسے خاموش کروا دیا۔
پاکستان نے ثابت کر دیا کہ پاک افواج کی عملی تیاری اور تکنیکی مہارت ملکی سلامتی کے تحفظ اور مؤثر دفاعی صلاحیت کے حامل ہیں۔

بیشتر علاقوں میں گرم و خشک، جنوب میں شدید گرمی

ملک کے بیشتر علاقوں میں آج موسم گرم اور خشک جبکہ جنوبی علاقوں شدید گرم رہنے کی توقع ہے تاہم بالائی خیبر پختونخوا، گلگت بلتستان، کشمیر، شمال مشرقی پنجاب، خطہ پوٹھوہار اور گردونواح میں چند مقامات پر تیز ہواوٴں اور گرج چمک کے ساتھ بارش کا امکان ہے جبکہ کشمیر، خطہ پوٹھوہار، شمال مشرقی پنجاب میں چند مقامات پر ژالہ باری بھی ہو سکتی ہے۔
محکمہ موسمیات کے مطابق اسلام آباد اور گردونواح میں مطلع جزوی ابر آلود رہنے کے علاوہ آندھی اور گرج چمک کے ساتھ بارش کی توقع ہے، چند مقامات پر ژالہ باری بھی ہو سکتی ہے۔
خیبر پختونخوا کے بیشتر جنوبی اضلاع میں موسم گرم اور خشک رہنے کی توقع ہے تاہم چترال، بونیر، سوات، باجوڑ، مالاکنڈ، پارہ چنار، خیبر، ایبٹ آباد، مانسہرہ، بٹگرام، شانگلا، کوہستان، دیر، کوہاٹ، اورکزئی، بنوں، وزیرستان، کرم اور گردونواح میں تیز ہواوٴں اور گرج چمک کے ساتھ چند مقامات پر بارش کا امکان ہے۔
پنجاب کے بیشتر اضلاع میں موسم گرم اور خشک جبکہ جنوبی، وسطی اضلاع میں آندھی، گرد آلود ہوائیں چلنے کی توقع ہے۔ مری، گلیات، راولپنڈی، اٹک، چکوال، جہلم، خوشاب، سرگودھا، میانوالی، لاہور، گجرات، شیخوپورہ، گجرانوالہ، سیالکوٹ اور نارووال اور منڈی بہاءٴالدین میں چند مقامات پر آندھی اور گرج چمک کے ساتھ بارش کی توقع جبکہ چند مقامات پر ژالہ باری بھی ہو سکتی ہے۔

ڈیجیٹل زمانے میں ذمہ دار صحافت کی اہمیت بڑھ گئی ، وزیراعظم

وزیر اعظم پاکستان محمد شہباز شریف نے عالمی یومِ آزادیِ صحافت پر اپنے ایک پیغام میں کہ کہ پاکستان اور دنیا بھر کے صحافی، کالم نویس، رپورٹرز، مدیران، براڈکاسٹنگ اور صحافت سے وابستہ تمام افراد کو انکی بے لوث خدمات پر خراج تحسین پیش کرتا ہوں۔
ان کا کہنا تھا کہ صحافت سے وابستہ افراد کی پیشہ ورانہ فرائض کی انجام دہی ایک باخبر اور با شعور معاشرے کی ضمانت ہے۔ مستند اور تعصب سے پاک غیر جانبدارانہ خبروں کی بروقت اشاعت و نشریات ہی اصل صحافت کی اساس ہے۔
پروپیگنڈہ، فیک نیوز، غیر مستند اور غیر تصدیق شدہ خبروں کی ترسیل کو اپنی پیشہ ورانہ اقدار کے تحت روکنا ہر صحافی کا فرض ہے۔ صحافی نہ صرف پیشہ ورانہ بلکہ سماجی اقدار کے امین ہیں۔
وزیر اعظم نے بتایا کہ اس سال عالمی یومِ آزادیِ صحافت ’’پرامن مستقبل کی تشکیل‘‘ کے عنوان تحت منایا جارہا ہے۔ یہ موضوع دور حاضر کی ضروریات کی عکاسی کرتا ہے۔ صحافی اپنے فرائض کی انجام دہی میں ایک باوقار، باحفاظت اور سازگار ماحول کے حقدار ہیں۔
انہوں نے کہا کہ عصر حاضر میں امن و امان کا ماحول محض سفارت کاری سے حاصل نہیں ہوتا بلکہ مستند معلومات، ذمہ دارانہ صحافت اور عوامی رائے اسکی تشکیل میں فیصلہ کن کردار ادا کرتی ہیں۔
شہباز شریف کے مطابق بین الاقوامی تعلقات، ممالک کے مابین سفارتی، معاشی، معاشرتی باہمی تعلق کو مثبت، بامعنی اور موثر بنانے میں میڈیا تعمیری کردار ادا کرنے کی صلاحیت رکھتا ہے۔ بیشتر اوقات نقطہء نظر کی صحیح ترجمانی بہت سے پیچیدہ مسائل حل کر دیتی ہے۔ یہی ذمہ دارانہ صحافت کا طرہ امتیاز ہے۔
اپنے پیغام میں ان کا کہنا تھا کہ پاکستان پر امن ملک ہے اور اختلاف راۓ سے لے کر کشیدگی کے دیر پا حل تک مکالمے اور مذاکرات کو ترجیح دیتا ہے۔ موجودہ حالات میں سفارتی میدان میں پاکستان، کشیدگی میں کمی، مکالمے کے فروغ اور خطے میں امن کی بحالی کے لیے مثبت کردار ادا کر رہا ہے۔ اس تناظر میں عالمی سطح پر میڈیا نے پاکستان کی تحسین کی ہے۔
ان کا کہنا تھا کہ سفارتی محاذ اور زمانہ امن کے علاوہ قومی میڈیا نے معرکۂ حق اور آپریشن بنیان المرصوص کے دوران بھی ایک اہم ذمہ داری ادا کی۔ مربوط قومی ردعمل اور خودمختاری کے دفاع میں قومی یکجہتی اور پاکستان کے مؤقف کو وضاحت اور تحمل کے ساتھ پیش کیا۔ میڈیا نے عوام کو آگاہ رکھا اور غلط معلومات کا تدارک کیا۔
شہباز شریف نے کہا کہ معرکہ حق کے لمحات مسلح افواج کی صلاحیتوں کے ساتھ ساتھ مشترکہ قومی طاقت کا مظہر تھے جس میں ذمہ دار میڈیا بخوبی شامل تھا۔ اور تمام صحافی برادری کا کردار لائق تحسین تھا۔

پاکستان تحریکِ انصاف میں اندرونی اختلافات شدت اختیار کر گئے

پاکستان تحریکِ انصاف (پی ٹی آئی) میں اندرونی اختلافات شدت اختیار کر گئے ہیں، جہاں سیکرٹری جنرل سلمان اکرم راجہ اور ایڈیشنل سیکرٹری جنرل فردوس شمیم نقوی کے درمیان سخت جملوں کے تبادلے کی اطلاعات سامنے آئی ہیں۔پارٹی ذرائع کے مطابق گزشتہ رات کور کمیٹی کے گروپ میں دونوں رہنماؤں کے درمیان تنظیمی معاملات پر بحث اس حد تک بڑھ گئی کہ نوبت تلخ کلامی اور مبینہ طور پر گالم گلوچ تک پہنچ گئی۔ذرائع کا کہنا ہے کہ اس صورتحال کے بعد سلمان اکرم راجہ نے کور کمیٹی کا گروپ چھوڑ دیا، جبکہ یہ تنازعہ پارٹی کی تنظیم سازی کے امور پر اختلافات کے باعث پیدا ہوا۔پارٹی کے اندر اس واقعے نے مزید تناؤ پیدا کر دیا ہے، تاہم تاحال قیادت کی جانب سے اس معاملے پر کوئی باضابطہ مؤقف سامنے نہیں آیا۔

پیٹرول پر 153 اور ڈیزل پر 116 روپے کے بھاری ٹیکسزلیے جانے کا انکشاف

ملک میں پیٹرولیم مصنوعات پر عائد ٹیکسوں اور مارجنز کی تفصیلات سامنے آ گئی ہیں۔نجی ٹی وی کی رپورٹ میں ذرائع کے حوالے سے انکشاف کیا گیا ہے کہ ایک لیٹر پیٹرول پر 153 روپے 55 پیسے جبکہ ہائی اسپیڈ ڈیزل پر 116 روپے 46 پیسے وصول کیے جا رہے ہیں۔پیٹرول کی ڈیوٹی سے قبل ایکس ریفائنری قیمت 246 روپے 31 پیسے ہے، تاہم مختلف ٹیکسز اور مارجنز کی شمولیت کے بعد عوام کے لیے پیٹرول کی حتمی قیمت 399 روپے 86 پیسے فی لیٹر مقرر کی گئی ہے۔رپورٹ میں بتایا گیا ہے کہ پیٹرول کی قیمت میں 23 روپے 72 پیسے کسٹم ڈیوٹی، 7 روپے 32 پیسے ان لینڈ فریٹ مارجن، 7 روپے 87 پیسے مارکیٹنگ کمپنیوں کا مارجن اور 8 روپے 64 پیسے پمپ ڈیلرز کا کمیشن شامل ہے۔مزید برآں ایک لیٹر پیٹرول کی قیمت میں 103 روپے 50 پیسے کی پیٹرولیم لیوی اور 2 روپے 50 پیسے کی کلائمیٹ سپورٹ لیوی بھی شامل ہے، جو حتمی قیمت کا ایک بڑا حصہ بنتی ہے۔اسی طرح ہائی اسپیڈ ڈیزل کی اصل ایکس ریفائنری قیمت 283 روپے 12 پیسے ہے، جس پر تمام تر ٹیکسز اور منافع جات شامل کرنے کے بعد شہریوں کے لیے قیمت 399 روپے 58 پیسے ہو جاتی ہے۔

فائرنگ سے خاتون اور دو بچے قتل، ملزم نے خودکشی کرلی

لاہور میں ملزم نے فائرنگ کر کے خاتون اور دو بچوں کو قتل کرنے کے بعد خودکشی کرلی۔پولیس کے مطابق یہ واقعہ لاہور کے علاقے مزنگ میں پیش آیا جہاں فائرنگ سے 4 افراد ہلاک اور 2 دیگر زخمی ہوئے۔پولیس نے بتایا کہ قتل ہونے والوں میں 35 سالہ عائشہ،14 سالہ مفرہ اور 12 سالہ منیب شامل ہیں جبکہ زخمیوں کی شناخت 8 سالہ مناہل اور 18 سالہ سمنہ کے ناموں سے ہوئی ہے۔پولیس کے مطابق 45 سالہ شاہد نے خاتون اور اس کے 2 بچوں کو قتل کر کے خود کشی کر لی، لاشوں کو پوسٹ مارٹم کے لیے اسپتال منتقل کردیا گیا ہے

شدید گرمی کے بعد خوشخبری، پنجاب میں بارش برسنے کی پیشگوئی

صوبائی دارالحکومت سمیت پنجاب بھر میں گرمی کی شدت بڑھنے لگی ہے اور خشک موسم کے باعث درجہ حرارت میں بتدریج اضافہ دیکھنے میں آ رہا ہے۔
محکمہ موسمیات کے مطابق موجودہ موسمی صورتحال کے باعث شہریوں کو دن کے اوقات میں شدید گرمی کا سامنا کرنا پڑ رہا ہے، جس سے روزمرہ معمولات شدید متاثر ہو رہے ہیں۔
محکمہ موسمیات کا کہنا ہے کہ خشک موسم کی وجہ سے آنے والے دنوں میں گرمی کی شدت میں مزید اضافہ ہو سکتا ہے۔ لاہور میں آج کم سے کم درجہ حرارت 25 ڈگری سینٹی گریڈ جبکہ زیادہ سے زیادہ 38 ڈگری سینٹی گریڈ تک جانے کا امکان ظاہر کیا گیا ہے، جس کے باعث گرمی کی شدت مزید محسوس کی جائے گی۔
حکام کے مطابق آئندہ 24 گھنٹوں کے دوران لاہور میں موسم خشک اور گرم رہے گا، محکمہ موسمیات نے پیش گوئی کی ہے کہ فی الحال پنجاب میں بارش کا کوئی امکان نہیں ہے۔ ماہرین کا کہنا ہے کہ بارش نہ ہونے کے باعث درجہ حرارت میں کمی کی فوری توقع نہیں، جس کے نتیجے میں شہریوں کو احتیاطی تدابیر اختیار کرنا ہوں گی۔
شہریوں کو ہدایت کی گئی ہے کہ غیر ضروری طور پر دھوپ میں نکلنے سے گریز کریں اور پانی کا زیادہ استعمال کریں تاکہ شدید گرمی کے اثرات سے محفوظ رہا جا سکے۔
محکمہ موسمیات کے مطابق موجودہ موسمی پیٹرن برقرار رہنے کی صورت میں آئندہ دنوں میں بھی گرمی کی شدت میں کمی کا امکان کم ہے۔

عمران خان کی رہائی کیلیے پی ٹی آئی کا جلسے جلوس کرنے کا اعلان

پی ٹی آئی اور تحریک تحفظ آئین پاکستان نے آئین کے تحفظ اور بانی پی ٹی آئی عمران خان کی رہائی کے لیے جلسے جلوس کرنے کااعلان کر دیا۔تحریک تحفظ آئین پاکستان کے سربراہ محمود اچکزئی ، پی ٹی آئی کے سیکرٹری جنرل سلمان اکرم راجہ ، اسد قیصر ، سردار لطیف کھوسہ ، عمر ڈار اور حقوق خلق پارٹی کے عمار جان نے لاہور میں مشترکہ پریس کانفرنس کی۔پریس کانفرنس سے خطاب کرتے ہوئے محمود خان اچکزئی نے کہا کہ تمام ادارے برباد ہو چکے ہیں ۔ دنیا میں کہیں نہیں سنا کہ کسی پارٹی کا انتخابی نشان لے لیا جائے۔ بانی پی ٹی آئی اس ملک کا سب سے بڑا لیڈر ہے۔ یہاں آج وفاداریاں نہ بیچنے والے غدار ہیں ۔انہوں نے کہا کہ ہم کہتے ہیں پاکستان میں منتخب پارلیمنٹ ہو، طاقت کا سرچشمہ پارلیمنٹ ہو ، فیصلے منتخب پارلیمنٹ کرے ۔ ہماری کسی سے کوئی دشمنی نہیں ہے۔ ہم لڑائی جھگڑے والے لوگ نہیں ہیں۔محمود اچکزئی کا کہنا تھا کہ نواز شریف ، شہباز شریف ، آصف زرداری، عمران خان بڑے آدمی ہوں گے لیکن سب سے بڑا پاکستان ہے ۔ ہم نے فیصلہ کر لیا ہے کہ گلی گلی جائیں گے۔ ہم اداروں سے کہتے ہیں کہ سیاست آپ کا کام نہیں ہے۔سربراہ تحریک تحفظ آئین پاکستان کا مزید کہنا تھا کہ مائنس عمران خان کا ماحول بنایا جا رہا ہے۔ ایسی ہر کوشش کی تحریک تحفظ آئین پاکستان مزاحمت کرے گی ۔ آ پ کون ہوتے ہیں مائنس کرنے والے ۔ ہم جلسے کریں گے، جلوس نکالیں گے ، ہم پر امن رہیں گے اور اگر ہمارا راستہ روکا گیا تو یاد رکھو فوج اور عوام کی لڑائی میں عوام جیت جاتی ہے۔انہوں نے کہا کہ ہم وارننگ دے رہے ہیں ہمارا راستہ نہ روکنا۔ ہم خانہ جنگی نہیں کریں گے۔ ہمیں جدو جہد نہ کرنے دی گئی تو پھر ہم کہیں گے کہ جیلیں کھول دیں ، آپ کی جیلیں بھر جائیں گی، آپ کو جیلوں میں جگہ نہیں ملے گی ۔پی ٹی آئی کے جنرل سیکرٹری سلمان اکرم راجہ نے پریس کانفرنس میں اظہار خیال کرتے ہوئے کہا کہ سیاست کا واحد محور یہ ہے کہ ہم بانی پی ٹی آئی کے ساتھ کھڑے ہیں۔ ہم آخری دم تک عمران خان کے ساتھ وفا نبھائیں گے، کیونکہ آج عمران خان کے ساتھ پاکستانی قوم کھڑی ہے۔انہوں نے کہا کہ اگر کوئی یہ سمجھتا ہے کہ پاکستانی قوم کو جھٹلایا جا سکتا ہے، اس ملک میں حرمت کو دھتکارا جا سکتا ہے، یا اس ملک میں آواز کو دبایا جا سکتا ہے، تو وہ بے وقوف ہے۔ ایسا نہیں ہوگا۔ تاریخ گواہ ہے کہ عوام کے ریلے کو کوئی طاقت نہیں روک سکتی اور عوام کا یہ ریلا عمران خان کو آزاد کرائے گا۔سلمان اکرم راجہ کا کہنا تھا کہ آج عمران خان کی رہائی اور ان کی صحت سے بڑھ کر ہمارے لیے کچھ اہم نہیں۔ ہم آج پاکستان کے ہر مزدور اور ہر کسان سے کہتے ہیں کہ تمہارا مستقبل، تمہاری حقیقی آزادی، عمران خان کی آزادی سے منسلک ہے۔ ہم نے اکٹھے لڑنا ہے، ہم نے تمہاری آزادی کے لیے لڑنا ہے۔ تمہارے روزگار کے لیے لڑنا ہے۔انہوں نے مزید کہا کہ آج ہماری سیر حاصل گفتگو ہوئی ہے، مزید گفتگو بھی ہوگی۔ عمران خان نے محمود خان اچکزئی پر اعتبار اور بھروسا کیا ہے۔ محمود خان اچکزئی کو قومی اسمبلی میں لیڈر آف دی اپوزیشن بنانے کا فیصلہ عمران خان کا ہے۔سلمان اکرم راجہ نے کہا کہ عمران خان کا مجھے حکم ہے کہ میں مشاورت اور رہنمائی محمود خان اچکزئی اور علامہ راجہ ناصر عباس سے لوں اور ہم ان کی رہنمائی اور مشاورت سے آگے بڑھیں گے۔ ہم ایک ایسی جماعت ہیں جو تاریخ کا شعور رکھتی ہے، تاریخ کو سمجھتی ہے اور جانتی ہے کہ آج پاکستان کہاں کھڑا ہے۔ ہم جانتے ہیں کہ آج پاکستان کی معیشت کی کیا حالت ہے۔سیکرٹری جنرل پی ٹی آئی کا کہنا تھا کہ آج کسان رو رہا ہے، مزدور بے روزگار ہے اور بے روزگاری پاکستان کی تاریخ کی بلند ترین سطح پر ہے۔ آج ایک بے حس حکومت ہے جو عیاشیاں کر رہی ہے، جہاز خرید رہی ہے، دنیا سے تعریفیں سمیٹ رہی ہے، لیکن مزدور کا چولہا نہیں جل رہا۔ پورے پاکستان میں مزدور اپنی جائز اجرت مانگتا ہے مگر اسے اجرت نہیں ملتی۔ نوجوان کو روزگار نہیں ملتا، مزدور کے بچے کو تعلیم نہیں ملتی اور نہ ہی صحت کی سہولتیں میسر ہیں۔انہوں نے کہا کہ ہم نے عمران خان کی رہنمائی میں یہ جنگ لڑنی ہے اور اس جنگ کو لڑنے کے لیے ہم موجود ہیں۔ ہم کبھی اس میدان سے پیچھے نہیں ہٹیں گے۔ ہم ڈٹے ہوئے ہیں۔اس موقع پر پاکستان تحریک انصاف اور تحریک تحفظ آئین پاکستان نے آئین کے تحفظ اور بانی پی ٹی آئی کی رہائی کے لیے جلسے جلوس کرنے کااعلان کیا۔سابق اسپیکر قومی اسمبلی اسد قیصر نے پریس کانفرنس میں اظہار خیال کرتے ہوئے کہا کہ پنجاب میں کسانوں کا استحصال ہو رہا ہے ۔ ہم کسانوں کے ساتھ ہیں، کسان تنظیموں کے پاس جائیں گے، ان کو اپنےساتھ انگیج کریں گے۔ کسانوں کے ساتھ مل کر تحریک چلائیں گے ۔ یہ پارٹی عمران خان کی ہے۔اگر کوئی سمجھتا ہے کہ وہ بانی کی جگہ لے سکتا ہے تو وہ غلط فہمی میں ہے۔ ہماری جدوجہد پرامن ہوگی۔ جدوجہد کرنا ہمارا آئینی حق ہے