پشاور: چیئرمین پی ٹی آئی بیرسٹر گوہر کا کہنا ہے کہ سہیل آفریدی اپنے عہدے پر برقرار رہیں گے اور ان کے خلاف مہم چلانے والوں کو ناکامی ہوگی۔میڈیا نمائندوں سے گفتگو کرتے ہوئے بیرسٹر گوہر کا کہنا تھا سہیل آفریدی کو بانی پی ٹی آئی عمران خان نے وزیراعلیٰ کے پی نامزد کیا ہے، سہیل آفریدی بہترین کام کررہے ہیں۔ایک سوال کے جواب میں چیئرمین پی ٹی آئی کا کہنا تھا سہیل آفریدی اپنے عہدے پر برقرار رہیں گے، سہیل آفریدی کے خلاف مہم چلانے والے مایوس و ناکام ہوں گے۔ان کا مزید کہنا تھا سہیل آفریدی کو پارٹی کی مکمل حمایت حاصل ہے، اور پی ٹی آئی میں کوئی فارورڈ بلاک نہیں ہے۔خیال رہے کہ دو روز قبل ممبر قومی اسمبلی شیر افضل مروت نے وزیراعلیٰ کے پی سہیل آفریدی کے انتخاب کو چیلنج کرنے کا اعلان کیا تھا۔

محکمہ موسمیات نے سندھ، جنوبی پنجاب، بلوچستان سمیت ملک کے بیشتر علاقوں میں آج سے تین مئی تک شدید گرمی کی پیشگوئی کردی۔ مری اور گلیات میں مطلع ابرآلود رہنے جبکہ چترال، دیر، سوات، کالام، کرم، وزیرستان، پاڑاچنارمیں چند مقامات پرہلکی بارش متوقع ہے۔
محکمہ موسمیات کے مطابق چار روز تک درجہ حرارت معمول سے کچھ زیادہ رہنے کا امکان ہے۔ اسلام آباد، گردونواح اور خیبرپختونخوا کے بیشتر اضلاع میں موسم گرم اور خشک رہنے کی پیشگوئی کی گئی ہے۔
پنجاب کے جنوبی اضلاع میں موسم شدید گرم رہنے کا امکان ہے، سندھ کے بیشتر اضلاع میں موسم شدید گرم اور خشک رہنے جبکہ سندھ کے وسطی اور جنوبی اضلاع میں تیز اور گردآلود ہوائیں چلنےکی توقع ہے۔ بلوچستان کے جنوبی اضلاع میں موسم شدید گرم رہنے کا امکان ہے

ملک بھر میں گیس کے نئے کنکشنز فراہم کرنے پر ایک بار پھر پابندی عائد کرنے کا فیصلہ کیا گیا ہے۔
ذرائع کے مطابق وزارتِ پیٹرولیم نے ملک بھر میں گیس کے نئے کنکشنز فراہم کرنے پر ایک بار پھر پابندی عائد کرنے کا فیصلہ کیا ہے، اس پابندی کا اطلاق گھریلو اور کمرشل دونوں اقسام کے صارفین پر ہوگا۔ نئے گیس کنکشن مہنگی آر ایل این جی کے دیے جا رہے تھے ۔
حکومت نے محض چند ماہ قبل ہی نئے گیس کنکشنز پر عائد پابندی ختم کی تھی، لیکن اب اسے دوبارہ بند کیا جا رہا ہے۔
وزارت پیٹرولیم کا کہناتھا کہ فیصلہ ایل این جی بحران کے باعث کیا گیا، 2 ہفتوں بعد صورتحال بہتر ہوئی تو دوبارہ درخواستیں جمع کریں گے، اگر آبنائے ہرمز نہ کھلی تو مستقل پابندی کا فیصلہ کیا جاسکتا ہے۔

حکومت کی جانب سے پاسپورٹ دفاتر میں مکمل کیش لیس نظام رائج کرتے ہوئے نارمل پاسپورٹ کی فراہمی میں آسانی پیدا کردی ہے اور اب 21 دن کے بجائے 14 روز میں فراہم کردیا جائے گا۔
ایکسپریس نیوز کے مطابق نارمل پاسپورٹ کی فراہمی 21 یوم کی بجائے 14 یوم کر دی گئی ہے اور پاسپورٹ دفاتر میں مکمل کیش لیس نظام رائج کر دیا گیا ہے۔
بیان میں بتایا گیا کہ بزنس کیٹگری پاسپورٹ کے اجرا کے لیے ورکنگ پیپر اور تیاری شروع کردی گئی ہے اور گھر میں پاسپورٹ ڈلیوری کے نظام کو مؤثر بنایا جائے گا۔
مزید بتایا گیا کہ15 یوم میں پاسپورٹ دفاتر کو کیش لیس نظام رائج کرنے کی ہدایت کردی گئی ہے، جس کے نتیجے میں کیش ادائیگی ختم ہونے سے ایجنٹ مافیا کا خاتمہ ہوگا۔

پاکستان کی دفتر خارجہ کا کہنا ہے کہ آبنائے ہرمز سب کے لیے سامان کی ترسیل کی اہم گزرگاہ ہے، ہم فوری طور پر آبنائے ہرمز کے فوری کھولنے کے مطالبے سے متفق ہیں۔
ہفتہ وار پریس بریفنگ ترجمان دفتر خارجہ طاہر اندرابی نے کہا کہ ایران امریکا مذاکرات پاکستان کی جانب سے جنگ بندی کی کال کے بعد شروع ہوئے، دونوں فریقین نے پاکستان کی کال کا پاس رکھا، مذاکرات کے بعد بھی سہولت کاری اور رابطوں کا سلسلہ جاری ہے جبکہ مذاکرات کا سلسلہ رُکا نہیں بلکہ جاری ہے۔
انہوں نے کہا کہ ہم فریقین کی جانب سے ہم پر کیے گئے اعتماد کے باعث مذاکرات و تجاویز کی تفصیلات پر بات نہیں کرتے۔ ہم معاملے پر فریقین سے رابطے میں ہیں، مذاکرات کے حوالے سے نئی اور پرانی تجاویز سب میز پر ہیں، امید ہے کہ امن کا بول بالا ہوگا۔
ترجمان نے کہا کہ آبنائے ہرمز پر میرا بیان ایک جنرل سینس میں تھا، یہ امریکا اور ایران کے ایک دوسرے پر الزامات کے حوالے سے نہیں تھا، ارومچی بات چیت میں ترجیحی ایجنڈا پاکستان کے خلاف دہشت گردی روکنا تھا۔
طاہر اندرابی نے کہا کہ بھارت کے غیرقانونی اور مقبوضہ لداخ میں نئے اضلاع کے فیصلے کی بھرپور مذمت کرتے ہیں، بھارت کے مقبوضہ لداخ یا جموں و کشمیر کے اسٹیٹس میں کسی بھی تبدیلی کی کوشش کی مذمت کرتے ہیں۔
انہوں نے کہا کہ پاکستان اور افغانستان کے درمیان جنگ بندی کو معمول کی جنگ بندی کے طور پر نہیں لینا چاہیے، کیونکہ اس سے مراد افغان سرزمین سے پاکستان کے خلاف دہشت گردی نہ ہونے دینا ہے۔
کمبوڈیا میں قید پاکستانیوں سے متعلق ترجمان کا کہنا تھا کہ کمبوڈیا میں 84 کے قریب پاکستانی پھنسے ہیں، ان میں 76 مرد اور 8 خواتین ہیں، کمبوڈیا میں ہمارا مشن کمبوڈیا میں انتطامیہ سے رابطے میں ہے۔
انہوں نے کہا کہ کمبوڈین انتطامیہ کی جانب سے انہیں خوراک و دیگر سہولیات فراہم کی جا رہی ہیں، ان میں سے بیشتر افراد سیاحتی ویزے پر کمبوڈیا میں ملازمت کر رہے تھے جو کہ خلاف قانون ہے۔ اسی طرح متعدد افراد زائد المعیاد ویزوں پر کمبوڈیا میں موجود تھے، اطلاعات ہیں کہ اکثر افراد آن لائن اسکیم اور فراڈ والی ملازمت میں تھے۔