عیدالاضحیٰ کے گزرتے ہی کفایت شعاری مہم پھر شروع کردی گئی، جس کے تحت وفاقی دارالحکومت اسلام آباد میں مارکیٹس اور شاپنگ مالز رات 8 بجے بند ہوں گے۔
ضلعی انتظامیہ اسلام آباد نے کاروباری اوقات سے متعلق نیا نوٹیفکیشن جاری کر دیا ہے، جس کے مطابق اسلام آباد میں نئی پابندیاں یکم جون 2026 سے نافذ العمل ہوں گی، تاہم اس میں فارمیسیز، اسپتال، میڈیکل لیبارٹریز اور میڈیکل اسٹورز کو پابندی سے مستثنیٰ قرار دیا گیا ہے۔
نوٹی فکیشن کے مطابق پیٹرول پمپس اور سی این جی اسٹیشنز معمول کے مطابق کھلے رہیں گے۔ دودھ اور ڈیری شاپس پر نئے اوقات کی پابندی لاگو نہیں ہوگی۔ جمز اور پیڈل کورٹس سمیت اسپورٹس سہولیات بھی مستثنیٰ قرار دی گئی ہیں۔
اسی طرح آئی ٹی کمپنیاں اور کال سینٹرز معمول کے مطابق کام جاری رکھ سکیں گے۔ ریسٹورنٹس، فوڈ آؤٹ لیٹس اور تندور رات 10 بجے بند ہوں گے۔ کریانہ، سبزی، پھل اور بیکری شاپس کے لیے بھی رات 10 بجے بندش کا وقت مقرر کیا گیا ہے۔
نوٹی فکیشن کے مطابق ٹیک اوے اور ہوم ڈیلیوری سروس پر کوئی پابندی نہیں ہوگی۔ شادی ہالز اور مارکیز رات 10 بجے بند کرنے کا حکم دیا گیا ہے جب کہ نجی مقامات پر ہونے والی تقریبات پر بھی رات 10 بجے کی پابندی لاگو ہوگی۔
واضح رہے کہ توانائی بچت اقدامات کے تحت کاروباری سرگرمیوں کے اوقات محدود کیے گئے ہیں۔ ضلعی مجسٹریٹ اسلام آباد کا یہ نوٹیفکیشن اگلے احکامات تک مؤثر رہے گا۔

دو تیز رفتار گاڑیوں جن میں سے ایک لینڈ کروزر تھی، نے اسلام آباد میں تباہی مچا دی ہے، بے قابو لینڈ کروزر نے مبینہ ریس کے دوران 8 افراد کو کچل دیا، جن میں سے 4 جاں بحق ہو گئے ہیں۔
اسلام آباد کے علاقے بھارہ کہو میں اُٹھال چوک کے قریب ایک لینڈ کروزر نے سڑک کنارے موجود 5 سے 6 موٹر سائیکل سواروں کو کچل دیا، متاثرہ افراد کا کہنا ہے کہ لینڈ کروزر ایک اور گاڑی کے ساتھ ریس لگاتے ہوئے بے قابو ہو گئی تھی۔
ریسکیو ذرائع کے مطابق حادثے میں 4 افراد شدید زخمی ہو گئے ہیں، جن میں سے دو زخمیوں کی حالت تشویش ناک ہے، جب کہ جاں بحق دو افراد کی شناخت فضل اور عامر کے نام سے ہو گئی ہے۔
حادثے کی ذمہ دار گاڑیوں کے ڈرائیور موقع سے فرار ہو گئے، جب کہ پولیس نے ایک گاڑی تھانہ بھارہ کہو منتقل کر دی ہے، جس کے رجسٹریشن نمبر کی مدد سے ملزمان کی تلاش شروع کر دی گئی ہے۔
ادھر کراچی میں خیابان بدر روڈ کے قریب تیز رفتار دو گاڑیاں ٹکرا گئیں، جس میں ایک شخص جاں بحق، اور تین خواتین سمیت 5 افراد زخمی ہو گئے، گارڈن لیاری ایکسپریس وے کے قریب بھی گاڑی کی ٹکر سے ایک شخص جاں بحق، اور دو افراد زخمی ہو گئے ہیں۔

ماہرین فلکیات کے مطابق مئی 2026 میں دوسری مرتبہ مکمل چاند نمودار ہو رہا ہے، جسے فلکیاتی اصطلاح میں بلیو مون کہا جاتا ہے۔ یہ ایک غیر معمولی واقعہ ہے جو عموماً دو سے تین سال بعد دیکھنے میں آتا ہے۔
لاہور میں بلیو مون کا نظارہ آج شام چاند طلوع ہونے کے بعد کیا جا سکے گا۔ فلکیاتی اعداد و شمار کے مطابق چاند آج شام تقریباً 7 بج کر 22 منٹ پر طلوع ہوگا جبکہ رات بھر آسمان پر دکھائی دیتا رہے گا۔ ماہرین کے مطابق شام 7:30 بجے سے 10 بجے تک مشرقی افق پر چاند کا منظر زیادہ دلکش ہوگا، جبکہ صاف موسم کی صورت میں شہری پوری رات اس کا مشاہدہ کر سکتے ہیں۔
پنجاب یونیورسٹی کے شعبہ سپیس سائنس کے چیئرمین پروفیسرڈاکٹر سید عامرمحمود کا کہنا ہے کہ بلیو مون دراصل چاند کے رنگ کا نام نہیں بلکہ ایک فلکیاتی اصطلاح ہے۔ جب ایک ہی کیلنڈر مہینے میں دو مکمل چاند آ جائیں تو دوسرے مکمل چاند کو بلیو مون کہا جاتا ہے۔ مئی 2026 میں پہلا مکمل چاند یکم مئی کو جبکہ دوسرا مکمل چاند 31 مئی کو ظاہر ہو رہا ہے۔
انہوں نے بتایا کہ اس بار بلیو مون مائیکرو مون بھی ہے، یعنی چاند اپنے مدار میں زمین سے نسبتاً زیادہ فاصلے پر موجود ہے۔ اسی وجہ سے یہ معمول کے مکمل چاند کے مقابلے میں قدرے چھوٹا اور مدھم دکھائی دے سکتا ہے۔
فلکیاتی حساب کے مطابق بلیو مون اپنے مکمل مرحلے میں پاکستان کے وقت کے مطابق آج دوپہر تقریباً 1 بج کر 45 منٹ پر پہنچا تاہم اس وقت چاند لاہور کے افق پر موجود نہیں تھا۔ اسی لیے شہریوں کے لیے اس کا بہترین نظارہ آج رات ممکن ہوگا۔
ماہرین کے مطابق شہری کھلے مقامات، پارکوں یا بلند عمارتوں کی چھتوں سے مشرقی سمت میں چاند کا مشاہدہ کرسکتے ہیں، جہاں روشنی کی آلودگی کم ہو اور آسمان زیادہ واضح دکھائی دے۔

پیٹرولیم مصنوعات کی قیمتوں میں حالیہ کمی کے باوجود پیٹرول اور ہائی اسپیڈ ڈیزل اب بھی مہنگے ہیں جبکہ لیوی بوجھ میں اضافہ برقرار ہے۔
36 دنوں کے دوران حکومت نے پیٹرول اور ہائی اسپیڈ ڈیزل کی قیمتوں میں تین بار اضافہ اور تین بار کمی کی، پیٹرولیم مصنوعات کی قیمتیں پانچ ہفتے قبل کے مقابلے میں اب بھی نمایاں طور پر زیادہ ہیں۔ شہریوں پرپیٹرولیم لیوی کا اضا فی بوجھ ختم نہ ہوسکا۔
سرکاری اعداد و شمار کے مطابق گزشتہ 36 دنوں کے دوران حکومت نے پیٹرول اور ہائی اسپیڈ ڈیزل کی قیمتوں میں تین بار اضافہ اور تین بار کمی کی۔
دستیاب اعداد وشمار کے مطابق ہائی اسپیڈ ڈیزل کی قیمت 36 دنوں میں مجموعی طور پر 61 روپے 16 پیسے فی لیٹر بڑھائی گئی جبکہ بعد ازاں 33 روپے 80 پیسے کی کمی کی گئی۔ اس کمی کے باوجود ڈیزل پر 27 روپے 36 پیسے فی لیٹر کا اضافہ اب بھی برقرار ہے۔