ضلع لوئردیر میں عیدالاضحی کے روز حادثات میں 2افراد جاں بحق ہو گئے۔ تفصیلات کے مطابق عیدالاضحی کے روز حادثات کے باعث علاقے کی فضا سوگوار رہی.ان حادثات میں 7 افراد زخمی بھی ہوئے ہیں، انتظامیہ کی جانب سے ہدایت کی گئی ہے کہ ڈرایئور حضرات اور خصوصا نوجوانان موٹر سایئکل چلانے میں احتیاط سے کام لیں۔

فیلڈ مارشل کا عیدالاضحیٰ کےموقع پر ژوب میں مغربی سرحدوں پراگلےمورچوں کادورہ،جوانوں کےساتھ عیدمنائی فیلڈ مارشل عاصم منیر نے عیدالاضحیٰ کےموقع پربلوچستان کےضلع ژوب میں مغربی سرحدوں پر اگلےمورچوں کا دورہ کیا اور جوانوں کےساتھ عید منائی۔آئی ایس پی آر کے مطابق فیلڈ مارشل نے جوانوں کے ساتھ نماز عید ادا کی، نماز کے بعد پاکستان میں امن، استحکام اور خوشحالی کے لیے خصوصی دعائیں کی گئیں اور ان شہداء کے لیے بھی دعا کی گئی جنہوں نے وطن کے دفاع میں اپنی جانوں کا نذرانہ پیش کیا۔فیلڈ مارشل نے افسران اور جوانوں کو عید کی مبارک باد دیتے ہوئے ان کے غیر معمولی حوصلے، مضبوط عزم، آپریشنل تیاری اور غیر ملکی حمایت یافتہ دہشت گردی کے مقابلے میں مسلسل چوکسی کو سراہا۔ انہوں نے ملک کو دہشت گردی کے خطرے اور دشمن عناصر کی سازشوں سے محفوظ رکھنے پر فوج کے بے مثال عزم اور قربانیوں کو خراج تحسین پیش کیا۔فیلڈ مارشل عاصم منیر نےکوئٹہ میں ہونے والے حالیہ بزدلانہ دہشت گرد حملےکی مذمت کرتے ہوئےکہا کہ یہ حملہ بھارتی حمایت یافتہ فتنہ الہندستان اور اس کے نیٹ ورکس نے کیا۔ انہوں نے واضح کیا کہ ایسے غیر انسانی اور وحشیانہ اقدامات نہ تو پاک فوج کے عزم کو کمزور کرسکتے ہیں اور نہ ہی پاکستانی قوم کے حوصلےکو، دہشت گردی کے تمام سہولت کاروں کے خلاف پوری قوت سے آپریشن جاری رکھیں گے

قدرتی آفات سے نمٹنے کے لیے قائم صوبائی ادارے پراونشل ڈیزاسٹر مینیجمنٹ اتھارٹی (پی ڈی ایم اے) نے صوبہ پنجاب میں عید الاضحی کی تعطیلات کے دوران ہیٹ ویو کا خدشہ ظاہر کیا ہے۔
ترجمان پی ڈی ایم اے پنجاب کے مطابق صوبے کے بیشتر اضلاع میں درجہ حرارت معمول سے چار سے سات ڈگری سینٹی گریڈ تک زیادہ رہنے کی توقع ہے۔
ترجمان کے مطابق لاہور، راولپنڈی، گوجرانوالہ، فیصل آباد اور سیالکوٹ سمیت کئی شہروں میں درجہ حرارت 42 ڈگری تک پہنچ سکتا ہے، جبکہ ملتان، ڈیرہ غازی خان، بہاولپور، رحیم یار خان، سرگودھا اور جھنگ میں پارہ 50 ڈگری سینٹی گریڈ تک جانے کا امکان ہے۔
ادارے نے خبردار کیا ہے کہ رات کے اوقات میں بھی گرمی کی شدت برقرار رہ سکتی ہے۔
پی ڈی ایم اے کی طرف سے جاری بیان میں کہا گیا ہے کہ شہری صبح 10 بجے سے شام پانچ بجے تک غیر ضروری طور پر دھوپ میں نکلنے سے گریز کریں اور پانی اور مشروبات کا استعمال زیادہ سے زیادہ کریں۔ شہریوں کو ہدایت کی گئی ہے کہ باہر نکلتے وقت ہلکے رنگ کے سوتی کپڑے پہنیں اور سر کو ڈھانپنے کے لیے ٹوپی یا چھتری استعمال کریں، جبکہ بچوں اور بزرگوں کو شدید گرمی میں گھروں کے اندر رکھا جائے۔
پی ڈی ایم اے نے مزید کہا کہ سفر پر روانہ ہونے سے پہلے گاڑی کے ٹائروں کا پریشر اور ریڈی ایٹر میں پانی کی سطح لازمی چیک کی جائے۔ عید کے موقع پر قصابوں، مویشیوں کے تاجروں اور صفائی کے عملے کو خصوصی احتیاط برتنے کی ہدایت بھی جاری کی گئی ہے۔

کوئٹہ:تفتان میں مسلح افراد نے تجارتی سامان کے ساتھ ٹرکوں کو آگ لگا دی۔پولیس کے مطابق تفتان میں قومی شاہراہ پر ٹرکوں کو نذرآتش کیا گیا تاہم جانی نقصان کی اطلاع نہیں ملی۔آتشزدگی کے باعث تاجروں کا کروڑوں روپے کا نقصان ہوا۔

بیجنگ: چین کے صدر شی جن پنگ کا کہنا ہے کہ مشرق وسطیٰ میں قیام امن کے لیے پاکستان کے تعمیری کردار کو سراہتے ہیں۔بیجنگ میں چین کے صدر شی جن پنگ اور وزیراعظم شہباز شریف کی ملاقات ہوئی جس دوران صدر شی نے کہا کہ چین اپنی ہمسایہ سفارتکاری میں پاکستان کے ساتھ تعلقات کو ترجیح دیتا ہے۔ چینی صدر شی نے کہا کہ مشرق وسطیٰ میں قیام امن کے لیے پاکستان کے تعمیری کردار کو سراہتے ہیں، چین اور پاکستان نے ایک ناقابلِ شکست روایتی دوستی قائم کی ہے۔ انہوں نے کہا کہ فیلڈ مارشل عاصم منیر کو چین آمد پر خوش آمدید کہتے ہیں، معلوم ہے کہ فیلڈ مارشل ایران سے واپس آئے ہیں، امن کیلئے مثبت کوششیں اور ثالثی اقدامات قابل تعریف ہیں۔ صدر شی جن پنگ کا کہنا تھا چین اور پاکستان کو مل کریک طرفہ اقدامات اور سرد جنگ ذہنیت کی مخالفت کرنی چاہیے، چین اور پاکستان کو اعلیٰ سطح اور زیادہ وسیع سکیورٹی تعاون آگے بڑھانا چاہیے۔اس سے قبل وزیراعظم شہباز شریف کی میں چینی وزیراعظم لی چیانگ سے ملاقات ہوئی جہاں پاک چین شراکت داری کو اعلیٰ معیار کے تعاون کے نئے مرحلے میں داخل کرنے پر اتفاق کیاگیا ۔ اس موقع پر سرمایہ کاری، زراعت، موسمیاتی تبدیلی اور تعلیم سمیت مختلف شعبوں میں تعاون کےلیے مفاہمت کی 15 یادداشتوں پر دستخط کیے گئے۔اس موقع پر وزیراعظم شہباز شریف نے کہا کہ پاک چین دیرینہ اسٹریٹجک تعاون پر مبنی شراکت داری پاکستان کی خارجہ پالیسی کا بنیادی ستون ہے، دونوں ممالک کے درمیان آہنی دوستی، اسٹریٹجک تعاون، ترقی اورخوشحالی کے مشترکہ عزم پر مبنی ہے