سکیورٹی فورسز اور قانون نافذ کرنے والے اداروں نے شمالی وزیرستان میں بڑی کارروائی کرتے ہوئے شدید فائرنگ کے تبادلے میں 11 خوارج ہلاک کر دیے۔
مسلح افواج کے ترجمان ادارے آئی ایس پی آر کے مطابق سکیورٹی فورسز نے شمالی وزیرستان کے علاقے دتہ خیل میں کامیاب انٹیلیجنس بیسڈ آپریشنز کیے ہیں، گزشتہ 48 گھنٹوں میں ان آپریشنز کے دوران خوارج کے متعدد ٹھکانوں کو نشانہ بنا کر تباہ کر دیا گیا۔
آئی ایس پی آر کے مطابق آپریشنز کے دوران شدید فائرنگ کے تبادلے میں 11 خوارج ہلاک ہوگئے، ہلاک دہشتگردوں سے کارروائی میں اسلحہ اور گولہ بارود بھی برآمد کیا گیا، ہلاک خوارج متعدد دہشتگرد کارروائیوں میں ملوث تھے۔
ترجمان کے مطابق علاقے میں کلیئرنس و سرچ آپریشنز جاری ہے، سکیورٹی فورسز اور قانون نافذ کرنے والے ادارے وژن عزمِ استحکام کے تحت دہشتگردی کے خاتمے کیلیے کارروائیاں جاری رکھے ہوئے ہیں اور دہشتگردی کے مکمل خاتمے کیلیے پرعزم ہیں۔

چمن میں جعفر ایکسپریس کے گزرتے وقت پھاٹک کے قریب زوردار دھماکے کے باعث متعدد افراد زخمی ہوگئے۔
تفصیلات کے مطابق دھماکا اتنا شدید تھا کہ آواز شہر بھر میں سنی گئی جبکہ قرب و جوار میں عمارتوں کے شیشے ٹوٹ گئے۔
سول اسپتال ٹراما سینٹر میں ایمرجنسی نافذ کر دی گئی، زخمیوں میں خواتین اور بچے بھی شامل ہیں جنہیں اسپتال منتقل کر دیا گیا۔
اسپتال ذرائع کے مطابق چمن پھاٹک دھماکے میں 15افراد زخمی جبکہ 8 کی حالت انتہائی تشویشناک ہےریلوے حکام کے مطابق دھماکا جعفر ایکسپریس ٹرین گزرتے وقت ہوا ہے۔
پولیس اور سیکیورٹی اہلکار جائے وقوع پر پہنچ گئے جبکہ دھماکے کے بعد جائے وقوعہ پر آگ لگی ہوئی ہے، فائر بریگئیڈ کا عملہ آگ بجھانے میں مصروف ہے۔
معاون خصوصی برائے داخلہ بلوچستان بابر یوسفزئی کا کہنا تھا کہ واقعے کی معلومات حاصل کر رہے ہیں، جیسے ہی مزید تفصیلات ملیں گی میڈیا کو آگاہ کیا جائے گا، تمام متعلقہ اداروں کو الرٹ کر دیا گیا ہے تاہم عوام سے اپیل ہے وقوعہ جائے کے قریب جمع نہ ہوں۔

پاک فوج کے شعبہ تعلقات عامہ (آئی ایس پی آر) نے کہا ہے کہ فیلڈ مارشل عاصم منیر کی ایران کی اعلیٰ قیادت سے ہونے والی ملاقاتوں میں خطے کی کشیدگی کے خاتمے کے لیے حتمی سمجھوتے کے حوالے سے حوصلہ افزا پیش رفت ہوئی ہے۔آئی ایس پی آر کی جانب سے جاری بیان کے مطابق چیف آف ڈیفنس فورسز فیلڈ مارشل عاصم منیر کا مختصر اور انتہائی مؤثر دورہ ایران مکمل ہوا اور اس دوران ان کی ایرانی قیادت سے ملاقاتیں ہوئیں جو 8 اپریل کو جنگ بندی کے بعد خطے میں بدستور موجود کشیدگی کے پیش نظر تناؤ میں کمی لانے اور تعمیری مذاکرات کے لیے جاری ثالثی کی کوششوں کا حصہ تھیں۔آئی ایس پی آر نے بتایا کہ فیلڈ مارشل نے ایرانی صدر مسعود پزشکیان، ایرانی پارلیمنٹ کے اسپیکر محمد باقر قالیباف، وزیرخارجہ عباس عراقچی اور وزیر داخلہ اسکندر مومنی سے ملاقات کی۔مزید بتایا گیا کہ ان ملاقاتوں میں گفتگو کے دوران خطے میں امن کے فروغ، استحکام اور حتمی معاہدے تک پہنچنے کے لیے جاری مشاورتی عمل کو توسیع دینے پر توجہ مرکوز کی گئی۔بیان میں کہا گیا کہ ملاقاتیں مثبت اور تعمیری ماحول میں ہوئیں، ان ملاقاتوں نے ثالثی کے عمل کے حوالے سے معنی خیز کردار ادا کیا اور گزشتہ 24 گھنٹوں کے دوران ہونے والی بھرپور گفتگو کے نتیجے میں حتمی سمجھوتے کے لیے حوصہ افرا پیش رفت سامنے آئی۔آئی ایس پی آر نے بتایا کہ ایرانی قیادت نے پاکستان کی جانب سے خطے کے مسائل کے پرامن حل کے لیے مذاکرات کے فروغ کے لیے مخلصانہ اور تعمیری کردار ادا کرنے کو سراہا۔بیان میں مزید بتایا گیا کہ ایران پہنچنے پر فیلڈ مارشل عاصم منیر کا استقبال ایرانی وزیر داخلہ اسکندر مومنی اور دیگر سینئر سول اور عسکری عہدیداروں نے کیا۔خیال رہے کہ فیلڈ مارشل عاصم منیر ایران اور امریکا کے درمیان کشیدگی کے خاتمے کے لیے جاری کوششوں کے سلسلے میں گزشتہ روز ایران پہنچے تھے جہاں وفاقی وزیر داخلہ محسن نقوی بھی موجود تھے۔

بنوں میں پولیس کے انٹیلی جنس بیسڈ آپریشن کے دوران 8 خوارجی دہشتگردوں کو ہلاک کردیا گیا جبکہ متعدد کے زخمی ہونے کی بھی اطلاعات ہیں۔سینٹرل پولیس آفس ( سی پی او) کے مطابق بنوں میں تھانہ میریان کی حدود میں صبح سویرے پولیس اور سی ٹی ڈی نے انٹیلی جنس بیسڈ آپریشن کیا گیا اور اس دوران دہشتگردو ں کے ساتھ فائرنگ کے تبادلے میں ایک پولیس اہلکار شہید اور ایک زخمی بھی ہوا جسے اسپتال منتقل کردیا گیا ہے۔ پولیس حکام کے مطابق دہشتگردوں کی نقل وحرکت نگرانی کے لیے جدید ڈرون اور ٹیکنالوجی استعمال کی گئی، آپریشن کے دوران فائرنگ کے تبادلے میں 8 دہشتگردوں کے ہلاک اور متعدد کے زخمی ہونےکی اطلاعات ہیں جبکہ آپریشن کے دوران 10کلو گرام وزنی دیسی ساختہ بم بھی برآمد ہوا جسے موقع پر ہی ناکارہ بنا دیا گیا۔ دوسری جانب آئی جی خیبر پختونخوا ذوالفقارحمید نے کہا کہ فتنہ الخوارج اور امن دشمن عناصر کےخلاف کارروائیاں جاری رہیں گی، خیبرپختونخوا پولیس عوام کے جان و مال کی حفاظت کیلئےفرنٹ لائن پرکھڑی ہے، دشمن کے ہر وار کا منہ توڑ جواب دیا جائےگا۔

راولپنڈی چکری روڈ لیاقت کالونی میں مبینہ غیرت کے نام پر ہولناک قتل کی واردات پیش آئی ہے۔پولیس ذرائع کے مطابق لڑکی اور لڑکے کو آگ لگا دی گئی، جبکہ لڑکے کا جسم 90 فیصد جھلس گیا ہے۔ پولیس ذرائع کا کہنا ہے کہ آگ سے جل کر لڑکی جان کی بازی ہار گئی۔پولیس ذرائع کا کہنا ہے کہ لڑکا اور لڑکی دونوں مقامی بیٹھک میں موجود تھے۔ لڑکے کو انتہائی تشویشناک حالت میں ہسپتال منتقل کر دیا گیا ہے، جبکہ لڑکی کی لاش جائے وقوعہ پر موجود ہے۔پولیس ذرائع کے مطابق پولیس اور فرانزک ٹیمیں شواہد جمع کر رہی ہیں۔ پولیس کا کہنا ہے کہ اصل حقائق پوسٹ مارٹم اور مکمل تفتیش کے بعد سامنے آئیں گے۔راولپنڈی پولیس نے ابتدائی تفتیش مکمل کرلی جس کے مطابق 40 سالہ شخص مصباح نامی لڑکی سے محبت کرتا تھا، محبت میں ناکامی سے دلبرداشتہ شخص نے مصباح کو پٹرول چھڑک کر آگ لگائی۔راولپنڈی ملزم نے پہلے لڑکی پر پٹرول چھڑکا پر خود کو بھی آگ لگائی، راولپنڈی پولیس نے 40 سالہ شخص کا ابتدائی بیان بھی ریکارڈ کرلیا۔پولیس ذرائع کے مطابق لڑکی جاں بحق ہوگئی جب کہ 40 سالہ شخص شدید زخمی ہے، ملزم طالب نے خاتون کو پہلے کلہاڑی کے وار سے قتل کیا، خاتون کو قتل کرنے کے بعد لاش کو آگ لگائی گئی۔پولیس ذرائع نے کہا کہ ملزم نے خاتون کے قتل کے بعد پٹرول چھڑک کر خودسوزی کی کوشش کی، ملزم کے جسم کا 90 فیصد حصہ جھلس گیا، تشویشناک حالت میں اسپتال زیرعلاج ہے، ملزم کرایے کی بیٹھک رہائش پذیر تھا، وہیں خاتون کو قتل کیا گیا، راولہنڈی ملزم کا تعلق کلرسیداں سے ہے۔ترجمان راولپنڈی پولیس نے کہا کہ دو افراد کے آگ سے جھلسنے کی اطلاع پر سی پی او سید خالد ہمدانی نے نوٹس لے کر ایس پی صدر سے رپورٹ طلب کرلی اور انہیں موقع پر پہنچ کر حالات کا جائزہ لینے کا حکم دیا۔ابتدائی تحقیقات کے مطابق مرد نے اپنے آپ کو اور خاتون کو خود آگ لگائی، غیرت کے نام پر قتل کے شواہد سامنے نہیں آئے، تاہم تمام زاویوں سے تحقیقات کی جا رہی ہیں، خاتون کی نعش اور زخمی مرد کو ہسپتال منتقل کیا گیا ہے، موقعہ سے شواہد اکٹھے کئے جا رہے ہیں، واقعہ کی میرٹ پر تحقیقات کرتے ہوئے حقائق کو سامنے لایا جائے گا۔