پشاور میں سی این جی اسٹیشنز کی بندش کے معاملے پر وفاقی حکومت اور خیبرپختونخوا حکومت کے درمیان مذاکرات کامیاب ہوگئے ہیں۔ سرکاری ذرائع کے مطابق وفاقی حکومت نے صوبے کو یومیہ 35 ایم ایم سی ایف ڈی گیس فراہم کرنے کی یقین دہانی کرا دی ہے۔
ذرائع کے مطابق خیبرپختونخوا میں سی این جی اسٹیشنز اب صبح 6 بجے سے شام 6 بجے تک کھلے رہیں گے۔ گیس کی فراہمی کا فیصلہ ایک اعلیٰ سطحی اجلاس میں کیا گیا جس میں وفاقی وزیر علی پرویز ملک، رانا ثناءاللہ، گورنر خیبرپختونخوا اور اپوزیشن لیڈر ڈاکٹر عباد شریک ہوئے۔
اجلاس میں خیبرپختونخوا کے مشیر خزانہ مزمل اسلم، چیف سیکریٹری شہاب علی شاہ اور ایم ڈی ایس این جی پی ایل عامر طفیل نے بھی شرکت کی۔
مزمل اسلم نے جیونیوز سے گفتگو کرتے ہوئے کہا کہ وزیراعلیٰ سہیل آفریدی کی کوششوں کے باعث گیس کا مسئلہ حل ہوا ہے۔ ان کے مطابق وفاقی حکومت نے گیس کی بحالی کی منظوری دے دی ہے اور سی این جی اسٹیشنز کو فوری طور پر گیس کی فراہمی شروع کر دی جائے گی۔

راولپنڈی کی اڈیالا جیل میں قیدیوں کے زیرِ استعمال موبائل فونز سامنے آنے کے بعد جیل کے سیکیورٹی انتظامات ایک بار پھر سوالیہ نشان بن گئے۔ ہیوی جیمرز کی موجودگی کے باوجود حوالاتی سے موبائل فون برآمد ہونے پر حساس قیدیوں کی نگرانی اور جیل سیکیورٹی پر تشویش بڑھ گئی ہے۔
اڈیالا جیل راولپنڈی میں پیر اور منگل کی درمیانی شب ہونے والی چیکنگ کے دوران ایک حوالاتی کے قبضے سے موبائل فون برآمد کیا گیا۔ جیل میں موبائل فون کی موجودگی نے انتظامیہ کی کارکردگی اور سیکیورٹی نظام پر کئی سوالات کھڑے کر دیے ہیں۔
ذرائع کے مطابق اڈیالا جیل میں بانی پی ٹی آئی اور بشریٰ بی بی سمیت متعدد ہائی پروفائل قیدی موجود ہیں، جبکہ دہشت گردی کے مقدمات میں گرفتار ملزمان بھی اسی جیل میں قید ہیں۔ ایسی صورتحال میں قیدیوں کے پاس موبائل فونز کی دستیابی کو سیکیورٹی کے لیے سنگین خطرہ قرار دیا جا رہا ہے۔
ذرائع کا کہنا ہے کہ جیل میں موبائل سگنلز روکنے کے لیے ہیوی جیمرز نصب ہیں، تاہم اس کے باوجود موبائل فون کا استعمال سامنے آنا انتظامی غفلت یا سیکیورٹی خامیوں کی نشاندہی کرتا ہے۔
واقعے کے بعد جیل انتظامیہ نے مزید تفتیش شروع کر دی ہے جبکہ موبائل فون جیل کے اندر کیسے پہنچا، اس حوالے سے بھی تحقیقات جاری ہیں۔

تفصیلات کے مطابق تفتیشی افسران نے ڈسٹرکٹ اینڈ سیشن جج جنوبی کی عدالت سے اجازت طلب کی کہ ملزمہ انمول عرف پنکی کو جوڈیشل مجسٹریٹ کے سامنے جوڈیشل کمپلیکس میں پیش کیا جائے۔
پولیس کے مطابق ملزمہ کو چار مختلف مقدمات میں ریمانڈ کے حصول کے لیے عدالت میں پیش کرنا تھا، تاہم سٹی کورٹ میں پیشی کے دوران ممکنہ سیکیورٹی خدشات کے باعث استدعا کی گئی کہ کارروائی جوڈیشل کمپلیکس میں ہی مکمل کی جائے۔
عدالتی سطح پر اجازت کے بعد جوڈیشل مجسٹریٹ کو کمپلیکس میں طلب کیا گیا، جبکہ سیکیورٹی اداروں کی جانب سے سخت انتظامات کیے گئے اور داخلی و خارجی راستوں پر کنٹرول سخت کر دیا گیا۔
دوسری جانب جوڈیشل کمپلیکس میں صحافیوں کا داخلہ مکمل طور پر بند کر دیا گیا۔
سیکیورٹی اہلکاروں کی جانب سے واضح ہدایت جاری کی گئی کہ کوئی بھی صحافی کمپلیکس کے اندر داخل نہ ہو سکے۔ اس موقع پر میڈیا نمائندوں کو کوریج سے روکنے کی کوششیں بھی کی گئیں۔
ذرائع کے مطابق گزشتہ روز بھی صحافیوں کو جوڈیشل کمپلیکس سے باہر نکال دیا گیا تھا۔ اس سے قبل ملزمہ پنکی کی پیشی کے دوران مبینہ طور پر دی جانے والی سہولیات اور مراعات کی کوریج کے بعد بعض مقتدر حلقوں نے واقعے کا نوٹس لیا تھا

پشاور شہر میں دو بینک ڈکیتی میں ملوث گروہ کو گرفتار کر لیا گیا،پہلا واقعہ جنوری میں کوہاٹ روڈ نجی بینک ڈکیتی کی کوشیش کے دوران سیکیورٹی گارڈ کو قتل کیا تھا، ، سی سی پی او میاں سعید کے مطابق دوسرا واقعہ 6 مارچ کو پیر بالا ورسک روڈ پر بینک ڈکیتی کا پیش آیا تھا بینک ڈکیتی میں ملوث تین ملزمان گرفتار کرلیا گیا ہے جبکہ انکے ساتھی فرار ہوگئے ، بینک ڈکیتی کو ناکام بنانے کے دوران ایڈیشنل ایس ایچ او بہادر علی شہید ہوگیا تھا، گرفتار ملزمان میں شعیب، عمر اور عماد شامل ہیں، ملزمان پولیس کو مختلف مقدمات میں مطلوب تھے فرار ملزمان کی گرفتاری کیلئے کاروائیاں جاری ہے

ڈسٹرکٹ اینڈ سیشن کورٹس اسلام آباد نے ٹک ٹاکر ثنا یوسف کے قتل کیس میں ملزم عمر حیات کو سزائے موت سنا دی۔
ایڈیشنل سیشن جج اسلام آباد افضل مجوکہ ثنا یوسف قتل کیس کا فیصلہ سنا دیا۔
عدالت نے کہا ہے کہ ملزم عمر حیات کو 20 لاکھ روپے جرمانہ بھی ادا کرنا ہوگا، دوران سماعت عدالت میں ملزم عمر حیات کی کالز اور چیٹ کے اسکرین شاٹس پیش کیے گئے۔
مدعی کے وکیل نے ملزم کو 2 بار سزائے موت دینے کی استدعا کر دی۔
ملزم کے وکیل نے کہا ہے کہ ملزم عمرحیات نے اسٹیٹ کونسل اور ٹرائل کورٹ پر عدم اعتماد کا اظہار کیا تھا، 2 درخواستیں اسلام آباد ہائی کورٹ میں زیرِ التوا ہیں، پہلے سے سوچ کر رکھنا کہ ملزم کو سزائے موت دینا ہے، زیادتی ہوگی۔
واضح رہے کہ گزشتہ روز ثنا یوسف قتل کیس میں ملزم عمر حیات نے صحت جرم سے انکار کر دیا تھا۔
ڈسٹرکٹ اینڈ سیشن کورٹس اسلام آباد میں ثنا یوسف قتل کیس کی سماعت میں ملزم نے کہا تھا کہ اس نے ثنا کو قتل کرنے کا کوئی اعتراف یا کوئی انکشاف نہیں کیا۔
ملزم عمر حیات نے مزید کہا تھا کہ میرا ثناء یوسف سے کوئی رابطہ نہیں تھا، اس پر جج نے استفسار کیا کہ دوران تفتیش ثناء یوسف کے فون سے کاکا کے نام سے ایک نمبر سامنے آیا تھا، موبائل فارنزک کے بعد نمبر آپ کا نکلا، اس پر کیا کہیں گے؟
اس پر ملزم عمر حیات نے کہا کہ وہ اپنے وکیل کے بغیر کوئی جواب نہیں دے سکتے ہیں