اقوام متحدہ کی ڈپٹی سیکرٹری جنرل آمنہ جے محمد نے دنیا بھر میں جاری جنگی تنازعات اور انسانی حقوق کی خلاف ورزیوں پر شدید تشویش کا اظہار کیا ہے۔میڈیا رپورٹس کے مطابق اپنے بیان میں انہوں نے کہا کہ موجودہ عالمی صورتحال انتہائی تشویشناک ہو چکی ہے، اور ایسا محسوس ہوتا ہے جیسے دنیا پر درندوں نے قبضہ کر لیا ہے اور جبکہ انسان اپنی بنیادی انسانیت سے دور ہوتا جا رہا ہے۔انہوں نے زور دیا کہ مختلف خطوں میں جاری جنگوں، شہری ہلاکتوں اور انسانی حقوق کی پامالیوں نے عالمی ضمیر کو جھنجھوڑ کر رکھ دیا ہے، اور فوری اقدامات کی ضرورت ہے تاکہ مزید تباہی کو روکا جا سکے۔اقوام متحدہ کی ڈپٹی سیکرٹری جنرل نے عالمی برادری سے اپیل کی کہ وہ تنازعات کے حل کیلئے سفارتی کوششیں تیز کرے اور انسانی حقوق کے تحفظ کو یقینی بنائے، تاکہ دنیا کو مزید بدامنی اور بحران سے بچایا جا سکے۔

امریکا ایران کشیدگی، مشرق وسطی میں غیر واضح جنگ بندی سے بین الاقوامی سطح پر قیمتی دھاتوں سمیت دیگر شعبوں کی مارکیٹوں میں غیریقینی ماحول کے باعث عالمی و مقامی صرافہ مارکیٹوں میں سونے اور چاندی کی قیمتوں میں بھی اتارچڑھ کے بعد مندی دیکھی جارہی ہے ۔
بین الاقوامی بلین مارکیٹ میں آج منگل کے روز فی اونس سونے کی قیمت میں اچانک 89ڈالر کی بڑی نوعیت کی کمی ریکارڈ ہوئی، جس کے نتیجے میں نئی عالمی قیمت 4ہزار 627 ڈالر کی سطح پر آ گئی۔
دوسری جانب مقامی صرافہ مارکیٹوں میں بھی آج فی تولہ سونے کی قیمت 8ہزار 900روپے کی بڑی نوعیت کی کمی سے 4لاکھ 85ہزار 62روپے کی سطح پر آگئی اور فی 10 گرام سونے کی قیمت بھی 7ہزار 630روپے کی کمی سے 4لاکھ 15ہزار 862روپے کی سطح پر آگئی۔
اسی طرح عالمی مارکیٹ میں فی اونس چاندی کی قیمت 2ڈالر 38سینٹس گھٹ کر 73ڈالر 27سینٹس پر آنے سے مقامی صرافہ مارکیٹوں میں بھی فی تولہ چاندی کی قیمت 238روپے کی کمی سے 7ہزار 811روپے اور فی 10 گرام چاندی کی قیمت 204روپے کی کمی سے 6ہزار 696روپے کی سطح پر آگئی۔

امریکی صدر ڈونلڈ ٹرمپ نے ملک کے معروف کامیڈین جمی کمل کو فوری طور پر ملازمت سے نکالنے کا مطالبہ کردیا ہے۔
عالمی خبر رساں ادارے کے مطابق صدر ٹرمپ نے یہ ردعمل اس وقت دیا جب جمی کمل نے مبینہ طور پر وائٹ ہاؤس میں صحافیوں کے لیے منعقد کردہ ڈنر سے قبل اپنے شو میں ایک مذاق کیا جس میں خاتونِ اول میلانیا ٹرمپ کے بارے میں متنازع جملہ کہا گیا تھا۔
صدر ٹرمپ نے سوشل میڈیا پر الزام لگایا کہ ڈنر تقریب پر حملے کی کوشش کرنے والا شخص واضح اور خطرناک مقصد کے ساتھ وہاں آیا تھا۔ انھوں نے جمی کمل کے مزاحیہ تبصرے کو تشدد پر اکسانے سے بھی جوڑا۔
امریکی صدر نے مطالبہ کیا کہ جمی کمل کو اے بی سی اور ڈزنی چینل سے فوری طور پر برطرف کردیا جائے۔
خیال رہے کہ یہ پہلا موقع نہیں کہ صدر ٹرمپ اور جمی کمل کے درمیان تنازع سامنے آیا ہو۔
جمی کمل اپنے پروگرام میں اکثر ٹرمپ اور ان کی پالیسیوں پر طنز کرتے رہے ہیں۔ اس سے قبل بھی ایک واقعے میں چینل اے بی سی نے جمی کمل کو عارضی طور پر شو سے ہٹا دیا تھا۔
تاہم آزادیِ اظہار کے حق میں عوامی ردعمل کے بعد جمی کمل کو دوبارہ چینل پر پروگرام کرنے کی اجازت دیدی گئی تھا اور ان کا شو آج بھی کافی مقبول ہے۔

جرمنی کے چانسلر نے کہا ہے کہ امریکا کے پاس ایران کے ساتھ جنگ کے حوالے سے کوئی حکمتِ عملی موجود نہیں ہے اور نہ ہی اس جنگ سے نکلنے کا کوئی راستہ ہے۔
عالمی خبر رساں ادارے کے مطابق یہ بات فریڈرک مرز نے جرمنی کے شہر مارسبرگ میں ایک اسکول کے دورے کے دوران گفتگو کرتے ہوئے کہی۔
جرمنی کے چانسلر نے مزید کہا کہ ایرانی نہ صرف مذاکرات میں مہارت رکھتے ہیں بلکہ بعض اوقات وہ مذاکرات نہ کرکے بھی برتری حاصل کر لیتے ہیں۔ جیسے امریکی وفد اسلام آباد گیا مگر بغیر کسی نتیجے کے واپس لوٹ آیا۔
انھوں نے مزید کہا کہ میرے خیال میں امریکا اس جنگ کو جلد ختم نہیں کرسکے گا کیونکہ ایرانی قیادت توقع سے زیادہ مضبوط ثابت ہوئی ہے جب کہ امریکا کے پاس مذاکرات کے لیے کوئی خاص مؤثر یا قابلِ اعتماد حکمتِ عملی بھی نظر نہیں آتی۔
فریڈرک مرز نے کہا کہ امریکا نے ایران جنگ میں داخل ہونے سے پہلے واضح اہداف طے نہیں کیے جو ایک بڑی خامی ہے۔
انھوں نے عراق اور افغانستان کی جنگوں کا حوالہ دیتے ہوئے کہا کہ جنگ سے انخلا کی حکم عملی بنائے بغیر کسی بھی جنگ میں جانا ہمیشہ نقصان دہ ثابت ہوتا ہے۔
جرمنی کے چانسلر نے مزید کہا کہ یہ سارا معاملہ کم از کم غیر دانشمندانہ ہے اور اس وقت یہ واضح نہیں کہ امریکا اس صورتحال سے نکلنے کے لیے کیا حکمت عملی اختیار کر رہا ہے۔

ایران ایران ایک ’’آبنائے ہرمز مینجمنٹ پلان‘‘ پر کام کر رہا ہے جس کے تحت نہ صرف مخصوص ممالک کے جہازوں پر پابندیاں لگائی جا سکتی ہیں بلکہ گزرنے والے جہازوں سے فیس یا ٹول ٹیکس بھی لیا جا سکتا ہے۔ عالمی خبر رساں ادارے کے مطابق ایران نے آبنائے ہرمز سے متعلق قانون سازی کی تیاری تیز کر دی ہے جس کے تحت اس اہم آبی گزرگاہ کا مکمل اختیار ملکی مسلح افواج کے حوالے کیا جاسکتا ہے۔ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے بتایا کہ مطابق مجوزہ قانون میں واضح کیا گیا ہے کہ آبنائے ہرمز کی سیکیورٹی، نگرانی اور گزرگاہ کے انتظامات مسلح افواج کی ذمہ داری ہوں گے۔ یاد رہے کہ عملی طور پر اس وقت بھی ایران کی مسلح افواج اس اہم گزرگاہ پر کنٹرول رکھتی ہیں تاہم نئے قانون کے ذریعے اسے باضابطہ اور قانونی شکل دی جائے گی۔ابراہیم عزیزی نے ریاستی ٹی وی سے گفتگو میں کہا کہ ایران اپنے دشمن ممالک سے وابستہ جہازوں کے گزرنے پر پابندی عائد کرنے کا ارادہ رکھتا ہے۔انھوں نے یہ عندیہ بھی دیا کہ مجوزہ قانون کے تحت آبنائے ہرمز سے حاصل ہونے والی آمدنی کو ایرانی کرنسی (ریال) میں وصول کرنے کی شرط بھی شامل کی گئی ہے۔ایرانی پارلیمان نے یہ تجویز بھی رکھی ہے کہ جب جہاز آبنائے ہرمز سے گزریں تو شپنگ کمپنیوں سے مخصوص سروسز کے بدلے فیس لی جائے۔ اس طریقے سے وہ براہِ راست ٹول ٹیکس کہے بغیر فیس لے سکیں گے۔ایران اس منصوبے کو اس انداز میں پیش کر رہا ہے کہ اسے سیاسی اور قانونی حمایت زیادہ مل سکے، اور اس پر عمان کے ساتھ مل کر کام کیا جا رہا ہے