رپورٹ کے مطابق اس جدید اقدام کے باعث متعلقہ علاقوں میں جرائم کی شرح میں نمایاں کمی ریکارڈ کی گئی ہے، جن مقامات پر پولیس افسران کے تھری ڈی ہولوگرام (پروجیکشن) تعینات کیے گئے، وہاں جرائم کی شرح میں تقریباً 22 فیصد تک کمی دیکھی گئی۔
خاص طور پر اچانک ہونے والے جھگڑوں اور نشے کی حالت میں کیے جانے والے تشدد جیسے واقعات میں واضح کمی واقع ہوئی ہے۔ یہ ہولوگرام عوامی مقامات پر اس لیے نصب کیے گئے ہیں تاکہ شہریوں میں احساس تحفظ پیدا ہو اور جرائم پیشہ عناصر پر نفسیاتی دباؤ برقرار رہے۔
رپورٹ کے مطابق تکنیکی لحاظ سے یہ محض ایک تصویر نہیں بلکہ ایک جامع سیکیورٹی نظام ہے۔ ان ہولوگرامز کے ساتھ مصنوعی ذہانت پر مبنی کیمرے نصب ہیں جو پورے علاقے کی نگرانی کرتے ہیں۔ اس کے ساتھ ساتھ حقیقی پولیس اہلکار بھی کنٹرول روم سے ان مقامات پر نظر رکھتے ہیں جہاں یہ پروجیکشن لگائی گئی ہے۔
ان ہولوگرامز کے ذریعے عوام کو ریکارڈ شدہ پیغامات بھی سنائے جاتے ہیں، جن میں شہریوں کو قانون کی پاسداری کی ہدایت کی جاتی ہے اور یہ باور کرایا جاتا ہے کہ پولیس ہر وقت وہاں موجود ہے۔ جنوبی کوریا کے حکام اس تجربے کی کامیابی کے بعد اسے مزید علاقوں تک پھیلانے پر غور کر رہے ہیں۔

جب رات کی تاریکی چھاتی ہے تو سولر پینلز بجلی پیدا کرنے میں ناکام ہو جاتے ہیں جس کے باعث کئی بار ضرورت کے وقت توانائی دستیاب نہیں ہوتی۔
مگر سائنسدانوں نے اس کا ایک منفرد حل تلاش کیا ہے اور سورج سے پیدا ہونے والی توانائی کو رات میں بھی استعمال کرنا ممکن بنایا ہے۔
جرنل ایڈوانسڈ انرجی میٹریلز میں شائع ایک تحقیق میں بتایا گیا کہ چینی ماہرین نے لکڑی کی اندرونی ساخت کو ری ڈیزائن کرکے اسے مسام دار اسفنج میں تبدیل کیا تاکہ وہ سورج کی روشنی کو جذب کرکے حرارت کا ذخیرہ کرسکے۔
اس تدوین شدہ لکڑی کو سورج کی توانائی سے بجلی پیدا کرنے کے لیے استعمال کیا جاسکتا ہے، یہاں تک کہ رات کے وقت بھی ایسا ممکن ہوتا ہے۔
تحقیق کے مطابق اس طریقہ کار سے سولر پاور کی سب سے بڑی کمزوری پر قابو پانے میں مدد ملے گی۔
ابھی رات کی تاریکی میں سورج کی روشنی سے بجلی کا حصول ممکن نہیں، مگر چینی سائنسدانوں کے مطابق ان کے نئے طریقہ کار سے سورج غروب ہونے کے بعد بھی ماحول دوست توانائی کو استعمال کیا جاسکے گا۔
ابھی اس مقصد کے لیے بیٹری کو استعمال کیا جاتا ہے جس میں دن بھر پیدا ہونے والی بجلی ذخیرہ ہوتی ہے مگر وہ کافی مہنگی ہوتی ہے۔
چینی سائنسدانوں نے اس نئے طریقہ کار کے لیے مختلف میٹریلز کی تہوں کے امتزاج کی بجائے ہلکے وزن کی نرم لکڑی کو استعمال کیا جس کی ساخت قدرتی طور پر ایسی ہے جسے آسانی سے تدوین کیا جاسکتا ہے۔
بالسا ووڈ نامی یہ لکڑی حرارت کا ذخیرہ کرنے کے لیے بھی اچھی ہوتی ہے۔
مگر لکڑی کی یہ قسم قدرتی طور پر سورج کی روشنی کو پلٹا دیتی ہے اور پانی کو جذب کرتی ہے تو اسی وجہ سے ماہرین نے اس کے اندر موجود ایک پیچیدہ مالیکیول کو نکالا جس کے بعد وہ لکڑی روشنی جذب کرنے کے قابل ہوگئی۔
اس کے بعد محققین نے لکڑی کی اندرونی سطح کو تبدیل کرکے اس میں سیاہ فاسفورسین کی بہت پتلی شیٹس کا اضافہ کیا جو روشنی کو جذب کرنے اور برقی عمل کے اہم ہوتا ہے۔
پھر اس میں ایسے نانو ذرات کا اضافہ کیا گیا جو سورج کی روشنی پر ردعمل ظاہر کرتے ہیں اور ہائیڈرو کاربن مرکبات کو لکڑی کی سطح کا حصہ بنایا گیا۔
آخر میں لکڑی کی اندرونی شریانوں میں stearic ایسڈ کا اضافہ کیا گیا تاکہ وہ گرم ہونے پر سورج کی روشنی کا ذخیرہ کرسکے اور ٹھنڈا ہونے پر اس کا اخراج کرسکے۔
محققین نے اس لکڑی کو تدوین کرنے کے بعد جانچا اور رات کی روشنی میں بجلی کے حصول میں کامیاب ہوگئے۔
تحقیق کے مطابق اس لکڑی نے 91.2 فیصد سورج کی روشنی کو حرارت میں تبدیل کیا اور بجلی پیدا کی۔
محققین کے مطابق یہ بجلی بہت زیادہ پائیدار ہے اور عرصے تک اس کی کارکردگی میں کوئی تبدیلی نہیں آتی۔
انہوں نے بتایا کہ ابھی یہ نتائج ابتدائی ہیں اور اس حوالے سے مزید کام کرنے کی ضرورت ہے تاکہ ثابت کیا جاسکے کہ بڑے پیمانے پر اس لکڑی کو سورج سے حاصل ہونے والی توانائی ذخیرہ کرنے کے لیے استعمال کیا جاسکتا ہے۔
اگر ان کی کوششیں کامیاب ثابت ہوئیں تو رات کے وقت بھی سورج سے بجلی کا حصول ممکن ہو جائے گا۔

روس نے اپنی ”امپیٹریشن” (Impatriation) اسکیم کے تحت غیر ملکی ہنر مندوں کو شہریت اور ملازمت کے مواقع فراہم کرنے کے لیے ایک نئے ڈیجیٹل پورٹل کا افتتاح کر دیا ہے۔ اس پروگرام کا مقصد دنیا بھر سے باصلاحیت اور ہنرمند افراد کو روس کی جانب راغب کرنا ہے۔
غیر ملکی ذرائع ابلاغ کے مطابق یہ پروگرام ان غیر ملکیوں کے لیے ہے جو مطلوبہ پیشہ ورانہ مہارت رکھتے ہیں اور مستقل طور پر روس منتقل ہونے کے خواہشمند ہیں۔
درخواست گزاروں کے لئے ضروری قرار دیا گیا ہے کہ وہ پیشہ ورانہ مہارت کے ساتھ ساتھ روایتی روسی اقدار کے احترام کا مظاہرہ بھی کریں۔
درخواست دینے کا طریقہ کار:
امیدواروں کو ایک منظم آن لائن عمل سے گزرنا ہوگا جس میں درج ذیل دستاویزات درکار ہوں گی:
جامع سی وی جس میں تمام تفصیلات درج کی گئی ہوں
تعلیمی اسناد، پیشہ ورانہ سرٹیفکیٹس۔
دستاویزات جمع کروانے کے بعد حکام امیدواروں کے پیشہ ورانہ پس منظر کا جائزہ لیں گے، جس کے بعد ایک آن لائن انٹرویو کا انعقاد کیا جائے گا، درخواست پر حتمی فیصلے کے لیے زیادہ سے زیادہ 125 دن کا وقت مقرر کیا گیا ہے۔
رپورٹس کے مطابق وہ افراد جنہیں ”امپیٹریٹ” (Impatriate) کا درجہ دے دیا جائے گا، انہیں مندرجہ ذیل سہولیات فراہم کی جائیں گی:
ویزہ کے حصول میں مکمل معاونت اور رہائش کی فراہمی اور سماجی ہم آہنگی میں مدد، اس کے علاوہ ہر کامیاب امیدوار کی مدد کے لیے ایک پرسنل مینیجر کا تقرر کیا جائے گا جو انتظامی امور میں رہنمائی کرے گا۔

امریکا نے ایران جانے والے بحری جہازوں کی تلاشی لینے کا باضابطہ اعلان کر دیا ہے، جس کا مقصد اسلحہ، گولہ بارود اور ممکنہ ایٹمی مواد کی ترسیل کو روکنا بتایا گیا ہے۔
غیر ملکی میڈیا رپورٹس کے مطابق امریکی حکام کا کہنا ہے کہ یہ اقدام خطے میں سکیورٹی خدشات کے پیش نظر کیا گیا ہے تاکہ ایران تک حساس اور ممنوعہ مواد کی فراہمی کو روکا جا سکے۔
اس حوالے سے امریکی بحریہ کی جانب سے جاری ایڈوائزری میں کہا گیا ہے کہ ایران جانے والے جہازوں کی مکمل تلاشی لی جائے گی تاکہ یہ یقینی بنایا جا سکے کہ ان پر ہتھیار، ویپن سسٹمز، گولہ بارود، ایٹمی مواد یا دیگر حساس اشیاء موجود نہ ہوں۔
اس کے علاوہ خام یا صاف تیل، لوہا، اسٹیل اور ایلومینیم جیسے مواد کی بھی جانچ پڑتال کی جائے گی۔
ایڈوائزری کے مطابق یہ تلاشی کسی مخصوص مقام تک محدود نہیں ہوگی بلکہ کھلے سمندر میں کہیں بھی لی جا سکتی ہے، جس سے عالمی بحری تجارت پر بھی اثرات پڑنے کا خدشہ ظاہر کیا جا رہا ہے۔
ماہرین کے مطابق امریکا کے اس فیصلے سے خطے میں کشیدگی مزید بڑھ سکتی ہے اور بین الاقوامی قوانین اور سمندری آزادی کے حوالے سے نئی بحث بھی جنم لے سکتی ہے۔

تفصیلات کے مطابق امریکی خام تیل 10.58 فیصد کمی کے ساتھ 93.61 ڈالر سے کم ہو کر 84.70 ڈالر فی بیرل پر آ گیا جبکہ برطانوی خام تیل کی قیمت میں 10 فیصد کمی ہوئی اور قیمت 98.33 ڈالر سے کم ہو کر 88.87 ڈالر ہو گئی ۔
امریکی صدر ڈونلڈ ٹرمپ نے اپنے سوشل میڈیا پر جاری بیان میں کہا کہ ایران نے ابھی اعلان کیا ہے کہ آبنائے ہرمز مکمل طور پر کھول دی گئی ہے اور ہر قسم کی آمدورفت کیلئے تیار ہے ، شکریہ ۔
یاد رہے کہ ایرانی وزیر خارجہ عباس عراقچی نے اعلان کرتے ہوئے کہا کہ لبنان میں جنگ بندی کے بعد تجاری جہازوں کے لیے آبنائے ہرمز کھول رہے ہیں، جنگ بندی کے باقی دنوں میں آبنائے ہرمز مکمل کھلا رہے گا، تجارتی جہازوں کے راستے کی پہلے ہی نشاندہی کی گئی ہے۔
کچھ دیر قبل رائٹرز کی جانب سے بھی یہ خبر شائع کی گئی تھی کہ پاکستان کا تیل برادر جہاز ’ شالامار‘ متحدہ عرب امارات سے 8 کروڑ لیٹر تیل لے کر آبنائے ہرمز سے نکل آیا ہے اور کراچی کی جانب گامزن ہے جو دو روز میں بندرگاہ پہنچے گا۔