افغانستان میں دہشتگردوں کے ٹھکانے ہیں،عطاتارڑ

اسلام آباد: وفاقی وزیر اطلاعات عطا اللہ تارڑ نے کہا ہے کہ افغان سرزمین سے دہشتگردی کی ہر کوشش کا بھرپور جواب دیا جائے گا۔وفاقی دارالحکومت میں انٹرنیشنل پارلیمنٹیرینز کانگریس سے گفتگو کرتے ہوئے وفاقی وزیراطلاعات عطاء اللہ تارڑ نے کہا ہے کہ پاکستان پرامن بقائے باہمی پر یقین رکھتا ہے ، صرف امن ہی ترقی کا راستہ ہے، تاہم پاکستان کی امن کی خواہش کو کمزوری نہ سمجھا جائے۔عطاء اللہ تارڑ نے کہا کہ پاکستان کئی دہائیوں سے افغان شہریوں کی میزبانی کرتا رہا ہے۔ افغان عوام اور افغان حکومت کے نظریات میں فرق ہے، افغانستان کے عوام حق رکھتے ہیں کہ انہیں حقوق ملیں اور معاشی بہتری میسر آئے۔ وزیراطلاعات نے کہا کہ افغانستان میں دہشتگردوں کے ٹھکانے ہیں ، افغان حکومت کو دہشتگردی کے مائنڈ سیٹ سے نکلنا ہوگا۔ اگر دہشتگردی کے مائنڈ سیٹ کی وجہ سے افغان حکومت کو معاشی خوشحالی نہیں ملتی تو یہ افغان عوام کے ساتھ زیادتی ہوگی۔