یومِ شہدائے پولیس آج منایا جا رہا ہے، خصوصی تقریبات فرض کی راہ میں جان قربان کرنے والے شہداء کو خراجِ عقیدت

ویب ڈیسک: ملک بھر میں یومِ شہدائے پولیس آج عقیدت و احترام کے ساتھ منایا جا رہا ہے، جس کا مقصد وطن کی خاطر جانوں کا نذرانہ پیش کرنے والے پولیس افسران اور اہلکاروں کی عظیم قربانیوں کو خراجِ عقیدت پیش کرنا ہے۔پاکستان پولیس نے ہمیشہ دہشت گردی، جرائم اور انتہا پسندی کے خلاف جنگ میں صفِ اول کے طور پر ذمہ داریاں ادا کیں، پولیس اہلکاروں نے اپنی جانوں کا نذرانہ دے کر ملک میں امن قائم رکھنے اور آنے والی نسلوں کے محفوظ مستقبل کو یقینی بنانے میں اہم کردار ادا کیا۔یومِ شہدائے پولیس کے موقع پر ملک بھر میں خصوصی تقریبات کا انعقاد کیا جائے گا، جہاں فرض کی راہ میں جان قربان کرنے والے شہداء کو خراجِ عقیدت پیش کیا جائے گا۔ملک کے مختلف شہروں میں پولیس کے چاق و چوبند دستے شہداء کی قبروں اور یادگاروں پر سلامی پیش کریں گے، جبکہ پھولوں کی چادریں بھی چڑھائی جائیں گی۔چاروں صوبوں میں پولیس کے اعلیٰ افسران شہداء کے اہلِ خانہ سے ملاقات کریں گے، ان کی خدمات اور قربانیوں کو سراہتے ہوئے تحائف بھی پیش کیے جائیں گے۔