رضا اللہ کی رفتار سے بدترین اعدادوشمار تک کا سفر انگلینڈ میں 20 اوورز کرنے والے بولرز میں اکانومی ریٹ سب سے خراب

پاکستان کے نوجوان فاسٹ بولر رضا اللہ نے انگلینڈ کے خلاف ایجبسٹن ٹیسٹ میں تیز رفتار آغاز کے باوجود مایوس کن اعدادوشمار ریکارڈ کرائے
رضا اللہ نے دوسرے روز اپنی بولنگ کا آغاز 85 میل فی گھنٹہ کی رفتار سے کیا، جبکہ چند ہی گیندوں بعد ان کی رفتار 90 میل فی گھنٹہ تک بھی پہنچی۔ تاہم میچ آگے بڑھنے کے ساتھ ان کی رفتار، لائن اور لینتھ میں نمایاں کمی آتی گئی۔
انہوں نے مجموعی طور پر 23 اوورز کرائے، 148 رنز دیے اور 4 وکٹیں حاصل کیں۔ ان کا اکانومی ریٹ 6.43 رہا، جو انگلینڈ میں کم از کم 20 اوورز کرنے والے بولرز میں بدترین اعدادوشمار قرار دیا گیا ہے۔
رضا اللہ کی گیندوں پر انگلینڈ کے ٹیل اینڈرز نے بھی کھل کر رنز بنائے۔ ان کی کارکردگی نے یہ سوال اٹھا دیا ہے کہ تیز رفتار کو طویل اسپیلز کے دوران برقرار رکھنے اور اسے مؤثر انداز میں استعمال کرنے کے لیے انہیں مزید میچ فٹنس اور تجربے کی ضرورت ہے۔