امیشا پٹیل کے والدین کے گھر چوری، ملازمہ گرفتار 5 لاکھ بھارتی روپے کے زیورات چوری ہونے کا الزام، پولیس کی تحقیقات جاری

ممبئی: بالی ووڈ اداکارہ امیشا پٹیل کے والدین کے گھر مبینہ چوری کا واقعہ پیش آیا، جہاں تقریباً 5 لاکھ بھارتی روپے مالیت کے زیورات غائب ہونے کی اطلاع ملی ہے۔
بھارتی میڈیا رپورٹس کے مطابق چوری ممبئی کے چرچ گیٹ علاقے میں واقع امیشا پٹیل کے والدین کے گھر میں ہوئی۔ پولیس نے چوری کے الزام میں 40 سالہ گھریلو ملازمہ سیما گھاٹے کو گرفتار کرلیا، جو تقریباً ڈیڑھ سال سے گھر میں کام کر رہی تھی۔
پولیس کے مطابق امیشا پٹیل کی والدہ آشا پٹیل نے شکایت درج کرائی تھی کہ جنوری 2026 میں گھر سے ایک کنگن غائب ہوا، جس کے بعد گھریلو ملازمہ پر شک کیا گیا۔
پولیس کا کہنا ہے کہ تحقیقات کے دوران ملزمہ کا سراغ ویرار سے ملا، جہاں سے اسے گرفتار کیا گیا۔ عدالت نے ملزمہ کو 15 ستمبر تک پولیس کی تحویل میں دے دیا ہے۔
پولیس کے مطابق چوری کیے گئے زیورات کی برآمدگی کی کوشش جاری ہے جبکہ ملزمہ کے سابقہ مجرمانہ ریکارڈ سے متعلق بھی تحقیقات کی جا رہی ہیں۔ تاہم الزامات ابھی ثابت ہونا باقی ہیں۔
امیشا پٹیل نے 2000 میں فلم ’کہو نہ پیار ہے‘ سے بالی ووڈ میں قدم رکھا تھا۔ وہ ’غدر: ایک پریم کتھا‘، ’ہمراز‘، ’بھول بھلیاں‘ اور ’ریس 2‘ سمیت کئی فلموں میں اداکاری کرچکی ہیں۔