کراچی: ملک بھر میں سونے کی فی تولہ قیمت میں 4 ہزار 643 روپے کا اضافہ ہوا ہے۔آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت 4643 روپے بڑھ کر 4 لاکھ42 ہزار 636 روپے ہوگئی ہے۔اس کے علاوہ 10 گرام سونے کی قیمت 4179 روپے بڑھ کر 3 لاکھ 78 ہزار345 روپے ہوگئی۔دوسری جانب عالمی بازار میں سونے کی قیمت46.43 ڈالر اضافے سے 4202 ڈالر فی اونس ہے
اسلام آباد: وزیر مملکت داخلہ طلال چوہدری کا کہنا ہےکہ پنکی کراچی کی ہو یا لاہور کی جو غلط کام کرےگا اسے نہیں چھوڑیں گے،منشیات کا معاملہ 18ویں آئینی ترمیم کے بعد بڑی حد تک صوبائی دائرہ اختیار میں آچکا، صوبوں کو انسداد منشیات فورسز کے قیام کی ذمہ داری پوری کرنی چاہیے۔قومی اسمبلی میں خطاب میں وزیر مملکت داخلہ طلال چوہدری کا کہنا تھا کہ کھوسہ صاحب کا کہنا ہےکہ کراچی کی پنکی دندناتی پھر رہی ہے، ایوان میں واضح کردوں پنکی کراچی کی ہو یا لاہور کی جو غلط کام کرےگا اسے نہیں چھوڑیں گے۔ طلال چوہدری کا کہنا تھا کہ وزیراعظم کی اجازت سے 500 مزید جوانوں کو انسداد منشیات فورس میں بھرتی کیا جائےگا، دہشت گردی کے خلاف جنگ صوبوں کے تعاون سے ہی جیتی جاسکتی ہے، دہشت گردی کے 95 فیصد واقعات خیبر پختونخوا اور بلوچستان میں پیش آئے دہشت گردی کے واقعات میں 783 شہری شہید اور 1767 زخمی ہوئے۔
ایران اور امریکا کے درمیان 60 روزہ امن معاہدے کے بعد پاکستان میں ایرانی کرنسی کی طلب میں اضافہ ریکارڈ کیا گیا ہے جس کی وجہ سے قیمتیں بڑھ رہی ہیں۔تفصیلات کے مطابق امن معاہدے کے بعد پاکستان میں شہریوں نے پانچ روز کے اندر 3 کھرب روپے مالیت کے ایرانی ریال خریدے جبکہ طلب بڑھنے کی وجہ سے اوپن کرنسی مارکیٹ میں ایرانی کرنسی کی قدر میں 100 فیصد اضافہ ہوا ہے۔اس بات کی تصدیق ایکسچینج کمپنیز ایسوسی ایشن کے چیئرمین ملک بوستان نے کی اور بتایا کہ گزشتہ پانچ روز کے دوران متوسط طبقے کی جانب سے ایرانی ریال کی خریداری میں بہت زیادہ اضافہ دیکھا جارہا ہے۔انہوں نے کہا کہ اس سے پہلے 2 ہزار روپے میں ایک کروڑ ایرانی ریال ملتے تھے جبکہ اب چار ہزار روپے میں ایک کروڑ ریال مل رہے ہیں۔ ملک بوستان نے عوام سے اپیل کی کہ وہ لائسنس یافتہ منی چینجر سے ریال خریدیں تاکہ کوئی دھوکا نہ ہو
کیا آپ کو لگتا ہے کہ کسی فرد نے آپ کو واٹس ایپ پر بلاک کیا ہوا ہے مگر جاننا ممکن نہیں؟یعنی آپ کسی کو میسج بھیجتے ہیں اور بس سنگل گرے چیک مارک نظر آرہا ہے، پروفائل پکچر غائب ہوچکی ہے۔ایسا بھی ہوسکتا ہے کہ اس صارف کی جانب سے لاسٹ سین آپشن کو ٹرن آف کیا ہوگا، مگر یقین سے کچھ کہنا مشکل ہوتا ہے۔مگر اب آپ آسانی سے جان سکیں گے کہ واٹس ایپ پر آپ کو کسی نے بلاک کیا ہوا ہے یا نہیں۔ویب انفو کی رپورٹ کے مطابق واٹس ایپ میں موجود ایک سکیورٹی فیچر سے آپ بلاک اسٹیٹس کو جان سکیں گے۔رپورٹ میں بتایا گیا کہ واٹس ایپ کے آٹومیٹک انکرپشن ویریفکیشن کو آپ خاموشی سے بلاک ڈیٹیکشن کے لیے استعمال کرسکتے ہیں۔عام طور پر اس فیچر کو کسی چیٹ کے اینڈ ٹو اینڈ انکرپشن سے تحفظ کی تصدیق کے لیے استعمال کیا جاتا ہے۔یہ فیچر کانٹیکٹ انفو اسکرین کے اندر موجود ہوتا ہے اور آپ کسی چیٹ کو اوپن کریں اور اوپر موجود کانٹیکٹ نیم پر کلک کرکے انکرپشن کا انتخاب کریں۔ایسا کرنے پر واٹس ایپ کی جانب سے خودکار طور پر تصدیق کی جائے گی کہ اس گفتگو کو انکرپشن کا تحفظ حاصل ہے۔نئی رپورٹ میں بتایا گیا کہ اگر سب کچھ معمول پر ہو تو ویریفکیشن کا عمل ہموار انداز سے مکمل ہوتا ہے۔مگر جب واٹس ایپ کی جانب سے ویریفکیشن کی تصدیق نہ کی جاسکے اور متبادل طریقوں کا مشورہ دیا جائے تو اس سے ممکنہ طور پر بلاک کیے جانے کا عندیہ ملتا ہے۔زیادہ دلچسپ بات یہ ہے کہ اس عمل کے دوران دیگر فرد کو نوٹیفائی نہیں کیا جاتا۔تو آپ خاموشی سے کسی کو آگاہ کیے بغیر ایسا کرسکتے ہیں۔یہ خیال رہے کہ واٹس ایپ کی جانب سے باضابطہ طور پر تصدیق نہیں کی گئی کہ یہ بلاک ڈیٹیکشن ٹول ہے۔رپورٹ کے مطابق اگرچہ اس سے بلاک چیٹ کے بارے میں جانا جاسکتا ہے مگر اسے مکمل ثبوت کی بجائے مضبوط اشارے کے طور پر سمجھنا چاہیے۔
ایک دہائی بعد منگنی کی گمشدہ انگوٹھی اس کی حقیقی مالک کو واپس مل گئی۔یہ واقعہ امریکا میں سامنے آیا ہے۔مشی گن میں پلمبرز کو ایک سیوریج لائن کی مرمت کے دوران ایک انگوٹھی ملی تھی جو ایک دہائی قبل ٹوائلٹ میں گر کر گم ہوگئی تھی۔پلمبنگ کمپنی کے مالک گریگ جانسن نے بتایا کہ وہ ایک شاپنگ پلازہ میں ایک سوریج لائن کو ٹھیک کر رہے تھے جب ایک پائپ کے اندر ایک چمکتی ہوئی چیز نظر آئی۔انہوں نے مزید بتایا کہ ‘ہماری ٹیم نے اسے اٹھایا اور ایک دوسرے کو دیکھا کہ اب ہم اس کا کیا کریں، اور میں نے فیصلہ کیا ہم اس کے مالک کو تلاش کرنے کی کوشش کرتے ہیں’۔گریگ جانسن کی ٹیم نے سوشل میڈیا پر ایک پوسٹ کی تھی جس میں بتایا تھا کہ انہیں ایک منگنی کی انگوٹھی ملی ہے۔اس پوسٹ کو پڑھ کر ایک خاتون سوئی نے ان سے رابطہ کیا۔اس خاتون نے گریگ جانسن کو بتایا کہ ‘خاتون کو یاد تھا کہ 10 سال قبل ان کی دکان میں ایک صارف نے اپنی شادی کی انگوٹھی کو ٹوائلٹ میں گرا دیا تھا، جس کے بعد سوئی اور صارف نے اسے باہر نکالنے کی ہر ممکن کوشش کی مگر کامیاب نہیں ہوسکے’۔سوئی نے ہی انگوٹھی کی مالک کیرول اورم سے رابطہ کیا جن کی جانب سے پلمبنگ کمپنی سے رابطہ کیا گیا۔پلمبنگ کمپنی کے جنرل منیجر جیسن میٹزنک نے بتایا کہ ‘وہ خاتون آئیں اور انہوں نے انگوٹھی دیکھ کر کہا کہ یہ دیکھنے میں میری انگوٹھی جیسی ہے، یہ خاتون نے 1965 میں لی تھی جب ان کی شادی ہوئی تھی’۔یوریج پائپ میں 10 سال تک رہنے کے بعد یہ انگوٹھی بہت زیادہ گندی ہوگئی تھی اور دیکھنے میں سونے کی لگ رہی تھی
اسلام آباد: حج 2027 کے لیے عازمین کی آن لائن رجسٹریشن کا آج سے باقاعدہ آغاز ہوگیا۔وزارت مذہبی امور کے مطابق عازمین حج وزارت مذہبی امور کی آفیشل ویب سائٹ پر رجسٹریشن کروا سکتے ہیں، رجسٹریشن کے ابتدائی مرحلے کے لیے فی الحال پاسپورٹ ہونا لازمی نہیں ہے۔ترجمان کا کہنا ہے کہ حج بکنگ کے مرحلے پر پاسپورٹ لازمی ہوگا جس کی میعاد 16 نومبر 2027 تک ہونی چاہیے، صرف رجسٹرڈ افراد ہی حج 2027 کی بکنگ کے اہل ہوں گے۔ترجمان کے مطابق حج بکنگ ‘پہلے آئیں پہلے پائیں’ کی بنیاد پر مطلوبہ کوٹہ پورا ہونے تک کھلی رہےگی، حج پیکج کے حتمی اخراجات اور شرائط کا اعلان حج پالیسی 2027 میں الگ سے کیا جائے گا۔
مشرق وسطیٰ سے تعلق رکھنےوالے ایک سفارتی ذریعے نے جیو نیوز کو بتایا کہ صدر ٹرمپ کی جانب سے دھمکی آمیز بیان اچانک سامنے آنے پر ایران کے چیف مذاکرات کار محمد باقر قالیباف کا رویہ یکسر بدل گیا تھا/
ایران اور امریکا کے درمیان سوئٹزرلینڈ میں ہوئے مذاکرات کو صدر ڈونلڈ ٹرمپ کے جارحانہ بیان نے تقریباً ثبوتاژ کردیا تھا تاہم ثالث پاکستان اور معاون قطر کی مدد سے 18 گھنٹے تک جاری بات چیت کا عمل بالاخر کسی طرح مفید انداز سے انجام کو پہنچا۔اس لمحے کہ جب برجنسٹاک میں مذاکرات جاری تھے، صدر ٹرمپ نے سوشل میڈیا بیان جاری کرکے تہران کو خبردار کیا تھا کہ ایران لبنان میں اپنی پراکسیز کو لبنان میں مشکلات پیدا کرنے سے فوری روکے، اگر اس نے ایسا نہ کیا تو ہم ایران پرسخت حملہ کریں گے جیسا کہ پچھلے ہفتے کیا تھا، اس بار اس سے بھی زیادہ سخت حملہ ہوگا۔مشرق وسطیٰ سے تعلق رکھنےوالے ایک سفارتی ذریعے نے جیو نیوز کو بتایا کہ صدر ٹرمپ کی جانب سے دھمکی آمیز بیان اچانک سامنے آنے پر ایران کے چیف مذاکرات کار محمد باقر قالیباف کا رویہ یکسر بدل گیا تھا۔اسداران انقلاب ایران کے سابق کمانڈر اور پارلیمنٹ کے موجود اسپیکر محمد باقر قالیباف جو امریکا کی نیت کو مسلسل ہدف تنقید بناتے رہے ہیں، انہیں صدر ٹرمپ کا بیان انتہائی ناگوار گزرا تھا اور بات چیت آگے بڑھنےکے امکانات کچھ دیر کیلئے مسدود ہوگئے تھے۔برجنسٹاک مذاکرات کی اہمیت اس لیے بھی زیادہ تھی کہ امریکا اور ایران کے درمیان جنگ بندی مفاہمت کی یادداشت پر 18جون کو دستخط کے بعد فریقوں کی یہ پہلی بلمشافہ ملاقات تھی۔تاہم ثالثوں پاکستان اورقطر کی سوئٹزرلینڈ میں مذاکراتی ٹیبل پر موجودگی کام کرگئی، اس سے پہلے 14 جون کو یعنی صدرٹرمپ کی سالگرہ کے روز مفاہمت کی یادداشت پردستخط کرنے سے بھی ایران نے انکار کردیا تھا مگرثالثوں ہی نے اس مسئلہ کا بھی حل نکال لیا تھا۔برجنسٹاک مذاکرات کے موقع پر وزیراعظم پاکستان میاں محمد شہبازشریف، فیلڈ مارشل سید عاصم منیر، وفاقی وزیرداخلہ محسن نقوی، وزیراعظم پاکستان کے دفتر کا عملہ، جی ایچ کیو کی ٹیم اور سیکریٹری خارجہ بھی موجود تھے۔
سوئٹزرلینڈ میں ایران امریکا مذاکرات کے بعد قطر اور پاکستان نے مشترکہ اعلامیہ جاری کر دیا۔ دفتر خا رجہ کے مطابق اسلام آباد مفاہمتی یادداشت کے فریم ورک کے تحت مذاکرات کا پہلا دور مکمل ہوگیا۔پاکستان اور قطری وزارت خارجہ کی جانب سے جاری مشترکہ اعلامیے کے مطابق فریقین نے مذاکرات کی نگرانی کے لیے اعلیٰ سطحی کمیٹی کے قیام پر اتفاق کر لیا ،حتمی معاہدے کے لیے 60 روزہ روڈ میپ منظور کرلیا گیا ہے۔مشترکہ اعلامیے میں کہا گیا ہے کہ ایران امریکا کے درمیان تکنیکی مذاکرات فوری شروع ہوں گے، آبنائے ہرمز میں تجارتی جہازوں کی آمدورفت کے لیے رابطہ لائن قائم کر دی گئی ہے۔اعلامیے کے مطابق لبنان جنگ بندی پر عملدرآمد کے لیے ڈی کنفلیکشن سیل قائم کرنے پر اتفاق کیا گیا ہے۔ ایٹمی پروگرام، پابندیوں سے متعلق ورکنگ گروپس تشکیل دیے جائیں گے۔وزارت خارجہ کے مطابق ڈی کنفلیکشن سیل میں لبنان اور ثالث ممالک شامل ہوں گے، ثالث ممالک مذاکرات تعمیری ماحول میں آگے بڑھانے کیلئے کوششیں جاری رکھیں گے، تکنیکی مذاکرات ہفتے کے باقی دنوں میں برگن اسٹاک ریزورٹ میں جاری رہیں گے۔
سپریم کورٹ کے سینئر جج جسٹس منیب اختر نے قائم مقام چیف جسٹس آف پاکستان کے عہدے کا حلف اٹھا لیا۔حلف برداری کی پروقار تقریب سپریم کورٹ رجسٹری کراچی میں منعقد ہوئی، جہاں جسٹس محمد شفیع صدیقی نے ان سے حلف لیا۔اس حوالے سے جاری کیے گئے اعلامیے کے مطابق حلف برداری کی تقریب میں وفاقی آئینی عدالت اور سپریم کورٹ کے ججز نے شرکت کی۔ تقریب کے دوران عدالتی شخصیات اور دیگر متعلقہ حکام بھی موجود تھے۔واضح رہے کہ چیف جسٹس پاکستان جسٹس یحییٰ آفریدی کی بیرون ملک موجودگی کے باعث جسٹس منیب اختر قائم مقام چیف جسٹس پاکستان کے فرائض انجام دیں گے۔ وہ چیف جسٹس یحییٰ آفریدی کی واپسی تک یہ ذمہ داریاں نبھائیں گے۔اعلامیے کے مطابق چیف جسٹس پاکستان جسٹس یحییٰ آفریدی 24 سے 26 جون تک روس کے شہر سینٹ پیٹرزبرگ میں منعقد ہونے والے انٹرنیشنل لیگل فورم میں پاکستان کی نمائندگی کریں گے
پاکستان سے اظہار تشکر کے لیے ایرانی صدر کل بروز منگل ایک روزہ سرکاری دورے پر پاکستان پہنچیں گے۔ذرائع کے مطابق ایرانی صدر کل صبح پاکستان پہنچیں گے اور مختلف مصروفیات کے بعد شام کو واپس ایران روانہ ہو جائیں گے۔ذرائع نے مزید بتایا کہ ایرانی صدر کا یہ دورہ تہران اور واشنگٹن کے درمیان حالیہ صورتحال میں پاکستان کے کردار کے تناظر میں انتہائی اہمیت کا حامل ہے۔ دورے کے دوران دوطرفہ تعلقات، علاقائی صورتحال اور باہمی دلچسپی کے مختلف امور پر تبادلہ خیال متوقع ہے۔ذرائع کے مطابق ایران۔امریکا جنگ کے دوران پاکستان کی جانب سے ادا کیے گئے کردار اور سفارتی کوششوں پر اظہارِ تشکر کے لیے ایرانی صدر پاکستان کا دورہ کر رہے ہیں۔ایرانی صدر کے دورے کے سلسلے میں متعلقہ حکام کی جانب سے انتظامات مکمل کر لیے گئے ہیں جبکہ اعلیٰ سطحی ملاقاتوں کا بھی امکان ظاہر کیا جا رہا ہے
