وائٹ ہاؤس کے ترجمان کے مطابق امریکی صدر ڈونلڈ ٹرمپ آج اہم پریس کانفرنس کریں گے جس میں ایران سے جاری کشیدگی کے معاملے پر اہم گفتگو ہو گی۔ترجمان نے بتایا کہ صدر ٹرمپ امریکی وقت کے مطابق دوپہر ایک بجے جبکہ پاکستانی وقت کے مطابق رات 10 بجے میڈیا سے خطاب کریں گے۔پریس کانفرنس وائٹ ہاؤس کے بریفنگ روم میں ہوگی اور اس میں اعلیٰ فوجی قیادت بھی صدر کے ہمراہ موجود ہوگی۔وائٹ ہاؤس کے مطابق یہ پریس کانفرنس امریکی میڈیا کے مسلسل اصرار پر منعقد کی جا رہی ہے جس میں صدر ٹرمپ ایران سے متعلق جاری صورتحال اور ممکنہ اقدامات پر سوالات کے جوابات دیں گے۔سیاسی و سفارتی حلقوں میں اس پریس کانفرنس کو انتہائی اہم قرار دیا جا رہا ہے جہاں خطے کی موجودہ کشیدگی کے تناظر میں بڑے اعلانات کا امکان ظاہر کیا جا رہا ہے۔

برطانیہ کے دارالحکومت لندن میں سکیورٹی کی ایک سنگین غفلت سامنے آئی ہے، جہاں میئر صادق خان کی حفاظت پر مامور پولیس افسران اسلحے سے بھرا بیگ سڑک پر ہی بھول گئے۔
برطانوی میڈیا کے مطابق یہ واقعہ جنوبی لندن میں پیش آیا، جہاں میئر کی رہائش گاہ کے قریب ایک شہری کو مشکوک بیگ ملا۔
اطلاع ملنے پر پولیس موقع پر پہنچی اور بیگ کو تحویل میں لے لیا۔ بعد ازاں معلوم ہوا کہ یہ بیگ میئر کی سکیورٹی پر تعینات پولیس اہلکاروں کا تھا، جس میں اسلحہ موجود تھا۔
واقعے کے بعد میٹروپولیٹن پولیس نے فوری محکمانہ کارروائی کرتے ہوئے 5 پولیس افسران کو فرنٹ لائن ڈیوٹی سے ہٹا دیا ہے۔
میڈیا رپورٹس کے مطابق میٹ پولیس کے ڈائریکٹوریٹ آف پروفیشنل اسٹینڈرڈز نے واقعے کی باقاعدہ تحقیقات شروع کر دی ہیں تاکہ اس غفلت کے ذمہ داروں کا تعین کیا جا سکے اور مستقبل میں ایسے واقعات کی روک تھام ممکن بنائی جا سکے۔
دوسری جانب میئر لندن کے ترجمان نے اس واقعے کو سنگین غلطی قرار دیتے ہوئے کہا ہے کہ پولیس کو اس بات کو یقینی بنانا ہوگا کہ آئندہ ایسی کوتاہی دوبارہ نہ ہو۔
واضح رہے کہ سکیورٹی خدشات کے باعث صادق خان کو 2017 سے خصوصی پولیس سکیورٹی فراہم کی جا رہی ہے، تاہم حالیہ واقعہ نے سکیورٹی انتظامات پر سوالات کھڑے کر دیے ہیں۔

مہنگے جیٹ فیول کے باعث پی آئی اے نے اہم فیصلہ کرتے ہوئے انتظامیہ نے مختلف شعبوں کے افراد کو ملنے ڈسکاؤنٹ کو ختم کرنے کا فیصلہ کرلیا۔
ذرائع کے مطابق پی آئی اے نے اسٹوڈنٹ، سینئر سٹیزن، جرنلسٹ ریٹائرڈ ملٹری پرسنز اے ایس ایف اہلکاروں کو ملنے والے ڈسکاؤنٹ کو ختم کرنے کا فیصلہ کرلیا ہے اور پی آئی اے انتظامیہ نے اس فیصلے سے تمام ایئرپورٹس پر اسٹاف کو ہدایت کردی ہیں۔
ترجمان پی آئی اے نے تصدیق کرتے ہوئے بتایا کہ پی آئی اے نے تمام قسم کی رعایت چھوٹ واپس لے لی ہے یہ فیصلہ ایندھن کی قیمتیں معمول پر آنے تک کیا گیا ہے۔
ترجمان پی آئی اے کا کہنا ہے کہ مہنگے جیٹ فیول سے پی آئی اے کو اخراجات میں شدید دباؤ ہے اسی وجہ سے تمام شعبوں کے افراد کو ملنے والے ڈسکاؤنٹ کو ختم کردیا ہے۔

ایران کے شہید کمانڈر قاسم سلیمانی کی صاحبزادی زینب سلیمانی نے امریکی محکمہ خارجہ کے اس دعوے کی سختی سے تردید کر دی ہے جس میں کہا گیا تھا کہ ان کے خاندان کی دو خواتین کو امریکا میں گرفتار کیا گیا ہے۔
زینب سلیمانی نے واضح بیان میں کہا کہ امریکا نے جن دو خواتین کو گرفتار کرنے کا دعویٰ کیا ہے، ان کا قاسم سلیمانی کے خاندان سے کوئی تعلق نہیں ہے اور یہ خبر حقیقت کے برعکس ہے۔
دوسری جانب قاسم سلیمانی کی ایک اور بیٹی نرگس نے بھی ایرانی سرکاری میڈیا سے گفتگو کرتے ہوئے اس دعوے کو مسترد کیا۔ انہوں نے کہا کہ آج تک قاسم سلیمانی کے خاندان یا قریبی رشتہ داروں میں سے کوئی بھی امریکا میں مقیم نہیں رہا
امریکی وزیر خارجہ مارکو روبیو نے دعویٰ کیا تھا کہ حمیدہ سلیمانی افشار اور ان کی بیٹی، جو مبینہ طور پر قاسم سلیمانی کی رشتہ دار ہیں، کو امریکا میں گرفتار کیا گیا ہے۔
انہوں نے مزید کہا تھا کہ دونوں خواتین گرین کارڈ ہولڈر تھیں اور امریکا میں پرتعیش زندگی گزار رہی تھیں، تاہم اب ان کے گرین کارڈ منسوخ کر دیے گئے ہیں۔
ایرانی حکام اور سلیمانی خاندان کی جانب سے اس دعوے کی تردید کے بعد اس معاملے پر مزید وضاحت اور حقائق سامنے آنے کا امکان ظاہر کیا جا رہا ہے۔