ای پاسپورٹ لازمی پاکستان میں آج سے نئے پاسپورٹ کا اجرا صرف الیکٹرانک نظام کے تحت ہوگا، پرانے پاسپورٹ میعاد تک قابلِ استعمال رہیں گے۔

اسلام آباد: پاکستان میں پاسپورٹ کے اجرا کا نیا نظام نافذ ہوگیا، جس کے تحت آج 23 اکتوبر سے ملک بھر کے پاسپورٹ دفاتر اور بیرونِ ملک پاکستانی سفارتی مشنز میں نئے پاسپورٹ صرف الیکٹرانک (ای پاسپورٹ) جاری کیے جائیں گے۔
محکمہ امیگریشن اینڈ پاسپورٹس کے مطابق نئی پالیسی کا مقصد سفری دستاویزات کی سیکیورٹی بہتر بنانا اور پاسپورٹ سروسز کو جدید تقاضوں سے ہم آہنگ کرنا ہے۔ اس تبدیلی کے بعد نئے پاسپورٹ کے لیے درخواست دینے والے شہریوں کو مشین ریڈ ایبل پاسپورٹ (ایم آر پی) جاری نہیں کیے جائیں گے۔
حکام نے اس پالیسی کے نفاذ کی تاریخ پہلے 15 اکتوبر مقرر کی تھی، تاہم بعد میں اسے تبدیل کرکے 23 اکتوبر کردیا گیا۔ نظرثانی شدہ شیڈول کے مطابق مشین ریڈ ایبل پاسپورٹ کے اجرا اور تجدید کی سہولت 22 اکتوبر کو ختم ہوگئی۔
حکام نے واضح کیا ہے کہ نئی پالیسی سے پہلے جاری کیے گئے مشین ریڈ ایبل پاسپورٹ اپنی مقررہ میعاد ختم ہونے تک قابلِ استعمال رہیں گے۔ ایسے شہری جن کے پاسپورٹ ابھی کارآمد ہیں، انہیں فوری طور پر نئے ای پاسپورٹ کے لیے درخواست دینے کی ضرورت نہیں ہوگی۔
ای پاسپورٹ میں کیا خاص ہے؟
مشین ریڈ ایبل پاسپورٹ میں بنیادی شناختی معلومات ایک مخصوص کوڈ کے ذریعے درج ہوتی ہیں، جسے ایئرپورٹس پر موجود اسکینرز پڑھ سکتے ہیں۔ اس کے برعکس ای پاسپورٹ میں ایک الیکٹرانک چِپ بھی نصب ہوتی ہے، جس میں پاسپورٹ ہولڈر کی شناخت سے متعلق معلومات محفوظ ہوتی ہیں۔
یہ چِپ شناخت کی تصدیق اور سفری دستاویزات کی سیکیورٹی بہتر بنانے میں مدد دیتی ہے۔ بعض جدید ہوائی اڈوں پر ای پاسپورٹ رکھنے والے مسافر خودکار اسمارٹ گیٹس کے ذریعے امیگریشن کا عمل بھی مکمل کرسکتے ہیں، تاہم اس سہولت کا انحصار متعلقہ ہوائی اڈے اور امیگریشن نظام پر ہوتا ہے۔
حکام کے مطابق ای پاسپورٹ کے اجرا کی جانب منتقلی سے پاکستان کے سفری دستاویزات کے نظام کو جدید بنانے اور بین الاقوامی معیار کے مطابق سیکیورٹی بہتر بنانے میں مدد ملے گی۔