بیرسٹرگوہر نے ’’عمران خان ریلیز فورس‘‘ بنانے سے انکار کیا تھا سہیل آفریدی کی حمایت کے باوجود بیرسٹرگوہر نے فورس کی منظوری نہیں دی تھی

اسلام آباد: اگرچہ خیبر پختونخوا کے وزیراعلیٰ سہیل آفریدی نے آئینی عدالت کو بتایا ہے کہ مجوزہ ’’عمران خان ریلیز فورس‘‘ کبھی تشکیل ہی نہیں دی گئی، تاہم حقیقت یہ ہے کہ وہ اس فورس کے قیام کیلئے سرگرم انداز میں کوشش کرنے والوں میں شامل تھے۔ تاہم، پاکستان تحریک انصاف (پی ٹی آئی) کے چیئرمین بیرسٹر گوہر علی خان نے مجوزہ تنظیم کی منظوری دی اور نہ ہی اس کا باضابطہ نوٹیفکیشن جاری کرنے کی اجازت دی، جس کے باعث یہ منصوبہ ترک کر دیا گیا۔ اس اقدام کو پی ٹی آئی کی قیادت کے ایک حلقے، جس میں وزیراعلیٰ سہیل آفریدی بھی شامل تھے، کی بھرپور حمایت حاصل تھی، لیکن بالآخر پارٹی چیئرمین کی دوٹوک مخالفت کے بعد اس منصوبے کو عملی جامہ پہنایا نہ جا سکا۔ پارٹی ذرائع کے مطابق، اس فورس کے قیام کیلئے وزیراعلیٰ کے پی پُرعزم تھے اور انہوں نے کھل کر اعلان بھی کیا تھا کہ بانی پی ٹی آئی عمران خان کی رہائی کی مہم کے سلسلے میں رضاکاروں کو منظم کیا جائے گا، ان کی رجسٹریشن کی جائے گی اور ان سے حلف لیا جائے گا۔ تاہم، یہ تجویز کبھی بھی باضابطہ طور پر باضابطہ تنظیم کی شکل اختیار نہ کر سکی کیونکہ پی ٹی آئی کے چیئرمین بیرسٹر گوہر علی خان نے اسے منظوری دینے سے واضح طور پر انکار کر دیا تھا۔ ان کا موقف تھا کہ اس نوعیت کی فورس کا قیام غیر آئینی اور غیر قانونی ہوگا۔