ہنگو میں انسداد پولیو ٹیم پرفائرنگ، ایک اہلکار شہید چار زخمی

ہنگومیں پولیو ٹیموں کی سیکیورٹی پر مامورپولیس اہلکاروں کی گاڑی پرشرپسندوں نے فائرنگ کردی،ایک اہلکار شہید اور چار زخمی ہوگئے۔
پولیس کےمطابق واقعہ تحصیل ٹل کےعلاقے چھپری وزیران میں پولیو ٹیموں کی سیکیورٹی پرمامور پولیس وین پرشرپسندوں نے فائرنگ کردی۔
پولیس اور شرپسندوں میں شدیدفائرنگ کا بھی تبادلہ ہوا،واقعہ میں ایک اہلکار شہید اورچار زخمی ہوگئے، جنہیں اسپتال منتقل کردیا گیا،جبکہ علاقے کو گھیرے میں لے کر سرچ آپریشن شروع کر دیا ہے
ترجمان پولیس کےمطابق شہید اہلکار اسرارالحق کا تعلق شانگلہ سے ہے،شہید اہلکار پی ٹی سی مین انٹرمیڈیٹ کورس کر رہا تھا۔

کانگو بخار سے خبردار! عیدالاضحیٰ سے قبل اہم ہدایات جاری

قومی ادارہ صحت کی ایڈوائزری میں کہا گیاہے کہ عید الاضحیٰ پر جانوروں کی غیر معمولی نقل و حمل کے دوران کانگو پھیلنے کا خدشہ ہے، کانگو وائرس بکری، بھیڑ اور خرگوش کے بالوں میں چھپی چیچڑی میں پایا جاتا ہے،چیچڑی کے کاٹنے یا متاثرہ جانوروں کے خون سے کانگو وائرس انسانوں میں منتقل ہوتا ہے،عیدالاضحیٰ سے قبل قربانی کے جانوروں کی صوبوں میں نقل و حمل بڑھ جاتی ہے۔
قومی ادارہ صحت کے مطابق شہری خاص طور پر بچے جانوروں کے ساتھ زیادہ قربت سے احتیاط برتیں،جانوروں کو ذبح کرتے اور گوشت بناتے وقت دستانوں کا استعمال کریں،ہر سال بلوچستان میں کانگو بیماری کے سب سے زیادہ کیسز رپورٹ ہوتے ہیں،پنجاب، سندھ اور خیبر پختونخوا سے بھی کانگو کیسز رپورٹ ہوتے رہتے ہیں، 2024 میں کانگو کے 61 تصدیق شدہ کیسز رپورٹ ہوئے،شرح اموات 15 فیصد رہی۔
2025 میں کانگو کیسز کی تعداد 82 تک پہنچ گئی،20 اموات بھی ہوئیں،رواں سال کے پہلے 3 ماہ میں 4 کانگو کیسز رپورٹ ہوچکے ہیں،شہری ہلکے رنگ کے کپڑے پہنیں تاکہ کپڑوں پر چیچڑی کا پتہ چل سکے،کانگو بخار کی روک تھام کے لئے حکومتیں اور محکمے بروقت اقدامات کریں

کمرشل گاڑیوں کیلیے ایک اور نئے ریلیف منصوبے کا آغاز

ایران جنگ کے تناظر میں پٹرولیم مصنوعات کی قیمتوں میں بڑے اضافے کے بعد وفاقی اور صوبائی حکومتوں کی جانب سے موٹر سائیکل سوار سے پبلک ٹرانسپورٹ تک فیول ریلیف پیکیجز دیے جا رہے ہیں۔
اب خیبر پختونخوا کی حکومت نے کمرشل گاڑیوں کے لیے احساس فیول سپورٹ اسکیم شروع کرنے کا فیصلہ کیا ہے۔
محکمہ ٹرانسپورٹ کے پی کے مطابق کمرشل گاڑی مالکان کو پٹرول اور ڈیزل پر ماہانہ سبسڈی دی جائے گی۔
بسوں کیلیے ماہانہ ایک لاکھ، بڑی گاڑیوں کیلیے 80 ہزار، ٹرکوں کے لیے 70 ہزار روپے ماہانہ فیول سبسڈی دی جائے گی۔ اس کے علاوہ منی بسوں کو 40 ہزار جبکہ وینز کو 35 ہزار روپے ماہانہ سبسڈی ملے گی۔
محکمہ ٹرانسپورٹ کا کہنا ہے کہ اسکیم کیلیے درخواست کا عمل مکمل طور پر ڈیجیٹل رکھا گیا ہے۔

سید عاصم منیر 24 گھنٹوں میں گوگل سرچ پر سرفہرست

فیلڈ مارشل سید عاصم منیر کی آن لائن مقبولیت میں تیزی سے اضافہ ہواہے، سید عاصم منیر 24 گھنٹوں میں سرچ کی جانے والی شخصیات میں سرفہرست ہیں۔
گوگل دستاویز کے مطابق ایران،امریکا مذاکرات کے تناظر میں عاصم منیر سے متعلق سرچز میں غیر معمولی اضافہ ہوا ہے ، فیلڈ مارشل عاصم منیر سے متعلق معلومات گوگل پر بڑے پیمانے پر تلاش کی جا رہی ہیں ۔
گوگل دستاویز کے مطابق سید عاصم منیر کی عالمی اور علاقائی سطح پر دلچسپی میں اضافہ رپورٹ ہوا ہے،امریکی نائب صدر جے ڈی وینس سے متعلق سرچز میں بھی نمایاں اضافہ ہوا،جے ڈی وینس کی پاکستان آمد، سفارتی مذاکرات کے حوالے سے معلومات کی تلاش میں اضافہ ہوا۔

خطے میں امن کی اپیل، پاکستان کی سفارتی کوششیں جاری: اسحاق ڈار

نائب وزیر اعظم اور وزیر خارجہ اسحاق ڈار نے کہا ہے کہ فریقین جنگ بندی کو برقرار رکھیں، پاکستان، ایران اور امریکا کے درمیان مکالمے اور رابطے کو فروغ دینے کے لیے اپنا کردار ادا کرتا رہے گا۔دفتر خارجہ کے مطابق اسلام آباد میں ایران اور امریکا مذاکرات کے حوالے سے میڈیا بریفنگ میں نائب وزیر اعظم اسحاق ڈار نے کہا کہ میں نے اور فیلڈ مارشل سید عاصم منیر نے دونوں فریقین کے درمیان کئی مراحل پر مشتمل سخت لیکن تعمیری مذاکرات میں ثالثی کا کردار ادا کیا، مذاکرات گزشتہ 24 گھنٹوں تک جاری رہے اور آج صبح اپنے اختتام کو پہنچے۔اسحاق ڈار نے کہا کہ پاکستان کی جانب سے دونوں فریقین کا شکریہ ادا کرتا ہوں کہ انہوں نے جنگ بندی کے حصول اور ثالثی میں پاکستان کے کردار کو سراہا۔وزیر خارجہ نے کہا کہ ہم امید کرتے ہیں کہ دونوں جانب سے اسی مثبت جذبے کے ساتھ پیش رفت جاری رہے گی تاکہ پورے خطے اور اس سے آگے پائیدار امن اور خوشحالی کو یقینی بنایا جا سکے۔اسحاق ڈار نے کہا کہ یہ نہایت ضروری ہے کہ تمام فریقین جنگ بندی کے اپنے عزم پر قائم رہیں۔ پاکستان آئندہ دنوں میں بھی ایران اور امریکہ کے درمیان مکالمے اور رابطے کو فروغ دینے کے لیے اپنا کردار ادا کرتا رہے گا۔اسحاق ڈار نے کہا کہ ایران اور امریکا کا تہہ دل سے شکر گزار ہوں کہ انہوں نے وزیراعظم شہباز شریف کی جانب سے خطے میں فوری جنگ بندی کی اپیل پر مثبت ردعمل دیا، اور ساتھ ہی اسلام آباد میں امن مذاکرات کے لیے وزیرِاعظم کی دعوت قبول کی۔

پاکستان میں ایران امریکا وفود کی ملاقات فیصلہ کن لمحہ ہے، شاہد آفریدی

قومی ٹیم کے سابق کپتان شاہد آفریدی نے اپنےبیان میں کہا جب مکالمہ شروع ہو تو تاریخ رقم ہوتی ہے، پاکستان میں ایران امریکا وفود کی ملاقات فیصلہ کن لمحہ ہے،دعا ہےمذاکرات سےامن قائم ہو، نئے راستے کھلیں۔
ایران کیساتھ جنگ بندی مذاکرات کےلیے امریکی نائب صدر جے ڈی وینس کی سربراہی میں امریکا کا اعلیٰ سطح وفد پاکستان پہنچ گیا۔
رات گئے امریکا سےمذاکرات کیلئےایران کا اعلیٰ سطح کا وفد پاکستان پہنچ گیا،اسپیکرقالیباف کی سربراہی میں ایرانی وفد میں وزیرخارجہ عباس عراقچی بھی شامل ہیں۔
امریکی وفد کی قیادت نائب صدر جے ڈی وینس کررہے ہیں۔ امریکی وفد میں نائب صدرجے ڈی وینس کے علاقہ اسٹیووٹکوف اور جیرڈ کشنر شامل ہیں۔

پبلک اور گڈز ٹرانسپورٹ کے کرائے میں 40 فیصد کمی کا اعلان

لاہور میں پبلک ٹرانسپورٹرز نے کرایوں میں فوری طور پر 25 فیصد کمی کرنے کا اعلان کردیا، متعدد نجی ٹرانسپورٹ کمپنیوں نے بھی کرایوں میں25فیصد کمی کردی۔ مزدا ٹرکوں کے کرایوں میں بھی 25 فیصد کمی ہوگئی۔
نئے کرایہ نامے کے مطابق مختلف شہروں کے درمیان کرایوں میں نمایاں کمی کی گئی ہے۔ لاہور سے اسلام آباد کا کرایہ ایک ہزار 32 روپے کمی کے بعد 2100 روپے، ملتان کا 817 روپے روپے کمی کے بعد 2450روپے اور ایبٹ آباد کا ایک ہزار روپے کمی کے بعد 3000 روپے مقرر کر دیا گیا ہے۔
اسی طرح فیصل آباد کا کرایہ 437 روپے کمی کے بعد 1310 روپے، حیدرآباد کا 2710 روپے کمی کے بعد 8 ہزار 140 روپے جبکہ پشاور کا کرایہ 1032روپے کمی کے بعف 3100 روپے مقرر کیا گیا ہے۔ لاہور سے کراچی کے کرائے میں بھی 3 ہزار روپے کمی کے بعد نیا کرایہ 9 ہزار روپے مقرر کر دیا گیا ہے۔ دوسری جانب وزیراعظم شہباز شریف کی جانب سے پیٹرول اور ڈیزل کی قیمتوں میں کمی کے اعلان کے بعد مٹی کا تیل اور لائٹ ڈیزل بھی سستا ہوگیا۔ پیٹرولیم ڈویژن نے نوٹیفکیشن جاری کر دیا۔
نوٹیفکیشن کے مطابق پیٹرول کی قیمت میں 11 روپے 83 پیسے فی لیٹر کمی کی گئی ہے۔ پیٹرول کی نئی قیمت 366 روپے 58 پیسے فی لیٹر ہوگئی۔ ڈیزل 134 روپے 81 پیسے فی لیٹرسستا کردیا گیا۔
نوٹیفکیشن کے مطابق ڈیزل کی نئی قیمت 385 روپے 54 پیسے فی لیٹر مقرر کی گئی ہے۔ مٹی کے تیل کی فی لیٹر قیمت میں بھی 17 روپے 33 پیسے کمی کر دی گئی۔ نئی قیمت 450 روپے 15 پیسے ہو گئی۔
لائٹ ڈیزل آئل فی لیٹر 25 روپے 31 پیسے سستا کر دیا گیا۔ لائٹ ڈیزل کی نئی قیمت 369 روپے 72 پیسے مقرر کر دی گئی
گڈز ٹرانسپورٹرز نے بھی فوری کرائے40 فیصد کم کرنے کا اعلان کردیا، صدر پاکستان گڈزٹرانسپورٹ ایسوسی ایشن کے مطابق پاکستان بھرمیں گڈز ٹرانسپورٹ کے کرائے فی الفور 40 روپے کم کردیے گئے ہیں، حکومت کی جانب سے ڈیزل کی قیمتوں میں کمی خوش آئند ہے۔

اسلام آباد مذاکرات کی امیدیں: اسٹاک مارکیٹ میں مثبت رجحان

امریکا ایران جنگ بندی سے متعلق اسلام آباد مذاکرات سے وابستہ مثبت توقعات، جنگی صورتحال میں ٹھہراؤ آنے، خام تیل کی عالمی قیمتیں مستحکم رہنے سے ایشیائی مارکیٹوں کے ساتھ پاکستان اسٹاک ایکس چینج میں بھی جمعے کو دوبارہ تیزی کے زیر اثر رہی۔ جس سے انڈیکس کی 1لاکھ 66ہزار اور 1لاکھ 67ہزار پوائنٹس کی 2 سطحیں عبور ہوگئیں ہیں۔ تیزی کے سبب 88.21فیصد حصص کی قیمتیں بڑھ گئیں جبکہ حصص کی مالیت میں بھی 2کھرب 08ارب 44کروڑ 83لاکھ 75ہزار 698روپے کا اضافہ ہوگیا۔ پاکستان سمیت دنیا بھر کی کیپیٹل مارکیٹس کی توجہ جنگ بندی پر مرکوز رہی،دونوں کاروباری سیشنز میں مارکیٹ گرین زون میں رہی ،کاروبار کے اختتام پر کے ایس ای 100 انڈیکس 1673.86 پوائنٹس کے اضافے سے 167191.37پوائنٹس کی سطح پر بند ہوا۔ دریں اثنا بین الاقوامی بلین مارکیٹ میں فی اونس سونے کی قیمت 30ڈالر کے اضافے سے 4ہزار 753ڈالر کی سطح پر آنے سے مقامی صرافہ مارکیٹوں میں بھی جمعہ کو فی تولہ سونے کی قیمت 3ہزار بڑھ کر 4لاکھ 97ہزار 662 روپے اور فی دس گرام سونے کی قیمت بھی 2ہزار 572روپے کے اضافے سے 4لاکھ 26ہزار 664 روپے کی سطح پر آگئی۔ علاوہ ازیں زرمبادلہ کی دونوں مارکیٹوں میں جمعے کو بھی ڈالر کی نسبت روپیہ تگڑا رہا،کاروبار کے اختتام پر انٹربینک میں ڈالر کی قدر مزید 01پیسے کی کمی سے 279روپے 01پیسے کی سطح پر بند ہوئی جبکہ اوپن کرنسی مارکیٹ میں بھی ڈالر کی قدر 14پیسے کی کمی سے 280روپے 18پیسے کی سطح پر بند ہوئی۔

سعودی عرب کی پاکستان کو ادھار تیل اورمالی تعاون کی یقین دہانی

سعودی عرب نے پاکستان کو مکمل مالی تعاون کی یقین دہانی کرا دی۔ مشکل معاشی صورتحال میں مدد جاری رکھنے کے عزم کا اظہار کیا۔ سعودی وزیرخزانہ کی دورہ پاکستان کے دوران اعلٰی سطح ملاقاتوں میں قرض، ادھار تیل کی سہولت اور اقتصادی تعاون بڑھانے کے علاوہ تجارت اور سرمایہ کاری میں اضافے پر اتفاق کیا گیا۔
پاکستان اور سعودی عرب کے درمیان اقتصادی تعاون مزید بڑھانے پر اتفاق ہوگیا۔ سعودی عرب نے پاکستان کو مکمل مالی تعاون جاری رکھنے کی یقین دہانی کرا دی۔ وزارت خزانہ کے مطابق سعودی وزیرخزانہ محمد بن عبداللہ الجدعان کے دورہ پاکستان میں سعودی عرب سے 5 ارب ڈالر قرض اور آئل فنانسنگ سہولت میں توسیع کی درخواست کی گئی۔ تیل سہولت مزید 5 سال بڑھانے کی تجویز بھی زیر غور آئی۔
حکام وزارت خزانہ کا کہنا ہے کہ پاکستان کو رواں ماہ تقریباً 4 ارب 80 کروڑ ڈالر قرض کی ادائیگی کے دباؤ کا سامنا ہے۔ ایک ارب 40 کروڑ ڈالر کے یورو بانڈ کی ادائیگی پہلے ہی کی جاچکی، ایسے میں زرمبادلہ ذخائر برقرار رکھنے کے لیے مزید مالی مدد ناگزیر ہے۔
دونوں ممالک نے تجارت، سرمایہ کاری اور معیشت کے شعبوں میں تعاون بڑھانے پر اتفاق کیا اور مضبوط برادرانہ تعلقات کی تجدید بھی کی گئی۔
سعودی وزیر خزانہ نے وزیراعظم شہباز شریف سے بھی ملاقات کی جس میں اسحاق ڈار اور فیلڈ مارشل عاصم منیر بھی شریک تھے۔ وزیراعظم نے شاہ سلمان بن عبدالعزیز اور محمد بن سلمان کیلئے نیک تمناؤں کا اظہار کیا اور سعودی قیادت کی جانب سے مسلسل مالی و اقتصادی حمایت پر شکریہ ادا کیا۔
ملاقات میں دونوں ممالک کے تعلقات کو مزید مستحکم بنانے کے عزم کا اعادہ کیا گیا جبکہ تجارت، سرمایہ کاری اور معیشت میں تعاون بڑھانے پر زور دیا گیا، سعودی وزیر خزانہ نے بھی تعلقات مزید مضبوط کرنے کے عزم کا اعادہ کیا۔
سعودی وزیر خزانہ محمد بن عبداللہ الجدعان اپنا ایک روزہ دورہ مکمل کرنے کے بعد وطن واپس روانہ ہوگئے، اسلام آباد ایئرپورٹ پر وزیر خزانہ محمد اورنگزیب نے انہیں الوداع کیا جہاں خوشگوار ماحول میں ملاقات بھی ہوئی۔
وزارت خزانہ کے اعلامیے کے مطابق ملاقات میں دونوں ممالک کے مضبوط تعلقات پر تبادلہ خیال کیا گیا جبکہ عالمی بینک اور آئی ایم ایف اجلاس کے دوران دوبارہ ملاقات کی توقع ظاہر کی گئی ہے۔ وزارت خزانہ کا کہنا ہے کہ سعودی وزیرخزانہ کا دورہ پاکستان دونوں ممالک کی شراکت داری مزید مضبوط ہونے کا اشارہ ہے۔

میڈیکل طالبہ کی مبینہ خودکشی کیس میں مرکزی ملزم گرفتار

میرپور خاص میں نجی میڈیکل کالج کی طالبہ کی مبینہ خودکشی کے معاملے میں اہم پیش رفت سامنے آئی ہے، پولیس نے مقدمے میں نامزد مرکزی ملزم لیکچرار عابد لغاری کو گرفتار کر لیا۔
پولیس کے مطابق ملزم کی گرفتاری کے لیے 4 انسپکٹرز پر مشتمل خصوصی ٹیم تشکیل دی گئی تھی، جس نے کارروائی کرتے ہوئے اسے حراست میں لیا۔
پولیس کا کہنا ہے کہ لیکچرار عابد لغاری پر طالبہ کو ہراساں کرنے اور ذہنی تشدد کا نشانہ بنانے کے الزامات ہیں، جن کی بنیاد پر مقدمہ درج کیا گیا تھا۔
حکام کے مطابق کیس میں نامزد دیگر ملزمان کی گرفتاری کے لیے بھی چھاپے مارے جا رہے ہیں، جبکہ مزید تفتیش جاری ہے۔