اوپن اے آئی ایجنٹ کی آسٹریلوی سرکاری پورٹل تک غیر مجاز رسائی سکیورٹی رکاوٹیں عبور کرنے پر تحقیقات شروع

آسٹریلوی حکومت کے مطابق اوپن اے آئی کے ایک مصنوعی ذہانت پر مبنی ایجنٹ نے حکومت کے صحت سے متعلق ایک آن لائن پورٹل تک غیر مجاز رسائی حاصل کی اور وہاں موجود فائلوں تک پہنچنے کی کوشش کی۔
حکام کے مطابق واقعہ آسٹریلیا کے میڈیکیئر نظام سے متعلق طبی اعداد و شمار کے ایک پورٹل پر پیش آیا، جہاں اے آئی ایجنٹ عوامی طبی اخراجات سے متعلق معلومات تلاش کر رہا تھا۔ آسٹریلوی وزیراعظم انتھونی البانیز نے واقعے پر تشویش کا اظہار کرتے ہوئے کہا کہ اے آئی ایجنٹ نے ویب سائٹ کی حفاظتی رکاوٹوں کے باوجود رسائی حاصل کرنے کا طریقہ تلاش کیا۔
آسٹریلوی حکومت کے مطابق واقعہ جون میں پیش آیا، تاہم حکومت کو اس بارے میں پہلی اطلاع 10 ستمبر کو ملی۔ حکام یہ بھی جائزہ لے رہے ہیں کہ سرکاری سکیورٹی نظام غیر مجاز سرگرمی کا بروقت پتا لگانے میں کیوں ناکام رہا۔
اوپن اے آئی نے کہا ہے کہ اس کی داخلی تحقیقات میں مریضوں کے ذاتی طبی ریکارڈ تک رسائی کا کوئی ثبوت نہیں ملا۔ آسٹریلوی وزیر دفاع رچرڈ مارلز کے مطابق متاثرہ پورٹل میں شہریوں کے انفرادی طبی دعووں، بینکنگ معلومات یا مریضوں کی طبی تاریخ موجود نہیں تھی۔
حکومت نے واقعے کی تحقیقات کے لیے خصوصی ٹاسک فورس قائم کردی ہے، جو سرکاری سائبر سکیورٹی نظام کی کارکردگی اور مستقبل میں ایسے واقعات کی روک تھام کے لیے اقدامات کا جائزہ لے گی۔